_Lei Rem Rap Turin_
By Rick Warren
March 31, 2023
“ _Tisa lam thil duh chu thihna a ni si a, Thlarau lam thil duh erawh chu nunna leh thlamuanna a ni_ .” [Rom 8: 6]
I nuna a eng emaw ber lai pawh kha thlak danglam tur chuan i thil ngaihtuah dan thlak hmasak a ngai ang. A chhan chu i thluak chu nangmaha Pathian Thlarauin hna a thawhna hmun chu a ni.
Pathian Thlarau chu i ke zungpuiah emaw, i chuap leh hnarah te emaw a thawk ngai chiah lo. I rilru kaltlangin a thawk ṭhin! Thinlung chu Pathian hnathawhna a ni tiin kan sawi ṭhin ngei reng a. Entirnan, hetiang hian kan sawi “Isua chu ka thinlunga lo cheng turin” ka sawm a. Mahse i thinlung chu i thluak chungchang kan sawina a ni zawk. I thluak kha i ngaihtuahna chu a ni ber a – I ngaihtuahna kha Pathianin a thlak tur chu a ni. Engkim siam remna hmun chu a ni.
Bible chuan Ephesi 4: 23-24 chuan hetiang hian a sawi, “ _In rilru thlarauvah chuan a tharin lo awm ula, mihring thar, thutak felna leh thianghlimnaa Pathian anga siam khân inthuam bawk ula_ ,” tiin.
Pathian anna nei tura siam i ni. Mahse chu chu a thleng nghal vut lem lo. Isua anna kawnga thang lian deuh deuh tur chuan hna hautak zet zet hma chhawn a ngai, thil tam tak herrem ngai a awm ang. Krista tana mi thar ni tur chuan i ngaihtuahna chu thlak danglam a ngai hmasa ang.
Chu chu engtin nge a lo awm theih? Setanan i thluaka ngaihdan eng emaw a rawn dah chuan chu chu thlemna a ni a. Pathianin i thinlunga ngaihdan eng emaw a dah chuan fuihna leh pawlna a ni thung.
I nun pumpui thil ṭhenkhat i telh dan leh, ṭhenkhat i paih dan turah ngunthluk taka ngaihtuahna i sen a a ngai ang. Thlarau Thianghlim ṭanpuinaa thlemna emaw Pathian pawlna indo zawk zawk chu nangma thutluknaa innghat a ni. I nun thununtu tur ngaihdan chu nangma thlan tur a ni ang.
Rom 8: 6 ah chuan hetiang hian kan hmu: “ _Tisa lam thil duh chu thihna a ni si a, Thlarau lam thil duh erawh chu nunna leh thlamuanna a ni_ ” tiin.
Pathian chuan nun tam, awmze nei leh dam chhan tlak neia nung turin a din che. Rinna leh thlarau nunah chuan ṭhang lian zel turin a duh che.
Mahse, chungte chu nitina i duhthlannaa innghat an ni. Thlarauvin a hruai dan che chu i zui thei ang em?
Ngaihtuah zui atan.
Engtin nge Pathian thu zir ṭhin nun chuan Setana thurawn aia Pathian thurawn zui turin a puih ṭhin?
Ringtu i nih chiah atang khan i ngaihtuahnaah chuan eng thil nge in thlak danglam?
Thlarauva puitlin zelna chuan engtin nge nun awmze nei zawk nei turin a ṭanpui?
*Khawiah nge i chatuan hmun i hman dawn?*
Bible chuan Pathian, a Fapa Isua Krista kaltlang chauh chuan vanram i kai thei a ni tih a sawi:
Nangmah chuan vanram i kai thei lo: “ _Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni_ ,” tiin. [Ephesi 2: 8-9]
“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.
Isua kuta i nun hlan tura i inpeih a nih chuan hetiang hian ṭawngṭai ang che: “Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamnatu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e.
[ *Lettu* : Peka]

No comments:
Post a Comment