_Hringnun I Nunchhuahpui Ngei Tur Chu_
By Rick Warren
March 09, 2023
I chauh tawngkhawng chang chuan engtin nge i hna i chawlh ṭhin? I chauh em em chang leh i phurritin a delh chauh chang che chuan, engtin nge thawk i lak ṭhin? Tv i en pawh a ni thei ang. Pawn lamah zanriah chhuakin chaw chhum buai vel chu i pumpelh a ni mai thei. A nih loh pawhin nuam tih zawng tak, infiamna eng emaw thawk lakna atan i hmang a ni thei.
Chung thil te chu anmahni mai chuan dik lo engmah a awm lo, mahse a engmah mai chuan an chhawk tak tak ngai lo vang che. I mu hahdam char char thei a, chu chuan i taksa hah chu an chhawk ang che – i thlarau erawh an chawlhtir kher lovang che.
I thlarau chawlh hahdamtir theitu chu pakhat chauh a awm: chu chu Pathian a ni. Pathian chauh chuan chhungril hahdamna nangmah chhawk theitu chu a pe ang che.
Isuan hetiang hian thu min tiam, “ _Nangni thawk rim leh phurrit phur zawng zawngte u, ka hnênah lo kal ula, keiman ka lo chawlhtîr ang che u_ ,” tiin. [Matthaia 11:28]
“Lo Inkhawm rawh” a ti satliah lo. Bible an zirna hmun emaw inhmuhkhawmnaa kal turin a ti lo che. Phurritin a delh chang che chuan thlarau chawlhna awmzia hre thiam tak tak chu mi pakhat chauh a awm. Chutiang hunah chuan, thil dang zawng zawng aia i mamawh tlat chu Pathian nena fianrial nun hman a ni.
Tichuan, Pathian chu i mi mamawh tak a nih chuan, a lamah chuan engah nge i hawi fo mai loh? Mi tam ber anga i khawsa a nih chuan, nangmah mai khan hmachhawn thei niin i inngai ang – Pathian chuan amah ko turin a duh che tih pawh chu i lo hre lo a ni thei ang. Bible-ah vawi eng emawzat chu, Pathian chuan hetiang hian min chah, “Min ko la. min bia la. Ka bulah lo sawi la. Ka nghawngkawl bat rawh” tiin a sawi.
Pathian nena fianrial hun in hman kha hun a vei ve leh deuh ta a nih chuan, a bul ṭanna lai tak pawh i buai ang. Hei hi Isuan a zirtirte ṭawngṭai dan tur a kawhhmuh chu a ni: “ _Nang erawh chu i ṭawngṭai hunin, i pindan chhûng rilah lût la, kawng khâr la, i Pa, a rûka awm hnênah chuan ṭawngṭai rawh; tichuan, i Pa, a rûka hmu ṭhîntu chuan a rûl ang che_ ,” tiin [Matthaia 6:6]
Pathian nena fianrial hun chu i hmang mumal ngai miah lo a ni thei a, i hmang pawh a ni thei a, mahse kar emaw thla liam ta emaw kha a ni daih thei. Chuvang chuan i phurrit chuan a delh hah hle che a ni ang. Ngawi rengin Pathian nen chuan fianrial hun in hman a ngai a ni. A kianga i ṭhut chang chuan, Bible chhiarna leh ṭawngṭaina hun atan hmang ang che.
Vawiin hian nun ruakin i khawsa em? I thil tih hmasak ber tur chu Pathian hnenah a ṭanpuina dil ang che. Krista bulah lo kal la, anin chawlh hahdamna a pe ang che.
Ngaihtuah zui atan.
Zing kara fianrial hun i hman chang chuan nilenga i hun hman danah eng nge danglam nia i hriat?
I rilru a hah chang chuan Pathian lam en tlat chu eng vangin nge a pawimawh?
Pathian muanna i chan hma chuan eng vangin nge Pathian chuan i koh hun a nghah kher ṭhin?
Muanna nun nei tura rahbi hmasa ber chu Isuaah a awm.
Pathian chuan a thatna chu a Fapa, Isua Kristaah chuan a lantir a. Bible pawhin hetiangin a sawi, “ _Pathianin khawvel a hmangaih em em a; tichuan, a Fapa mal neih chhun a pe a, amah ring tawh phawt chu an boral lohva, chatuan nun an neih zawk nan_ ." [Johana 3: 16]
Pathian chatuan thutiam chu a hlawhtlin theihnan amah rin chu i inpeih tawh em? A nih chuan he ṭawngṭaina tawite hian inhlan ang che: “Lalpa duh tak, Isua Krista chu i Fapa a ni tih ka ring e. Ka sual a ni tih ka puang a, i ngaihdamna ka dil a che. Isua chu ka sualte la bo turin a thi tih ka pawm a, i kaitho leh tih pawh ka hria. Isua chu chhandamtu atana pawm a, ka Lal ni a, amah zui turin vawiin aṭang hian ka inpeih e. Ka nun hi hruai la, i duhzawng min zirtir ang che. Isua hmingin ka dil a che. Amen.”
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e.
[ *Lettu* : Peka]

No comments:
Post a Comment