Monday, March 20, 2023

I TAWRHNATE KHAN ISUA ANG LEH ZUAL TURIN A PUI THEI CHE

 _Tawrhna i hmachhawn laiin khawiah nge Pathian?_

- Rick Warren

- March 20, 2023


"Fapa meuh pawh ni mah se, a thil tuarah te chuan thu âwih a zir zêl a." (Hebrai 5:8)


I nuna natna i tawrh zawng zawngte khan ṭhan len nan hun remchang a siamsak  che a ni. Hmangaih loh ni a i inhriat lai khan engtin nge hmangaih i zir? I buai nuai lai khan engtin nge thlamuanna i zir? I dawhtheih loh viau lai khan engtin nge dawhtheihna i zir?


Chung ziate chu harsatna i tawh lai khan Pathian khawngaihna avangin i zir chhuak ṭhin. I natnate chu puitlinna kawng rahbi pawimawh tak atan i hmang dawn nge i thlarau ṭhanmawh bawk atan i hmang dawn tih chu i duhthlanna a ni.


Isua hnungzui tura duhthlanna i siam khan, Pathian thil tum hmasa ber chu Lal Isua antir che a ni. Pathian chhungkaw zinga mi i nih chuan ṭhang lian turin a duh che! Chutiang a ṭhang lian tur chuan Isuan a kaltlang zawng zawngte a kaltlangpui che a ni. Lal Isua khan khawhar chang te, beidawn chang te, hriatthiam loh a nih chang te, sawisel a nih chang te leh nat changte a nei ve ṭhin.


Mahse Bible chuan, _"Fapa meuh pawh ni mah se, a thil tuarah te chuan thu âwih a zir zêl a, tichuan, ṭha famkima lo awmin, ama thu âwih zawng zawngte tân chatuana chhandamna bulpui a lo ni ta."_ tiin min hrilh (Hebrai 5:8 - 9).


Isua kha tawrhna hmanga tihfamkim a nih chuan nangpawh chutiang tihpuitlin i ni ang.


Thil ṭhenkhat hi chu natna hmang chauhvin i zir thiam thei ṭhin. Chutiang chuan natnate hian Pathian chawimawi tur te, midangte nen a inpawlhona ṭha nei turte leh zirtir nun ril zawk i neih theih nana a puih theih che chuan thilpek hlu tak a ni.


Korinth kohhrante hnena Paula'n lehkha a thawn khan, natna hmanga an ṭhan len dan a hria a. II Korinth 7:11 ah chuan, "Pathian duh zâwnga lungngaihnain a hrin chhuahte chu lo thlîr ila: taihmakna te, mahni inthen fai duhna te, sual huatna te, sual tih hlauhna te, a ṭha lam tih châk tlatna te, ṭhahnemngaihna te, sual chu hrem ngei ni se tia duhna te a neihtîr che u hi. Chûng thil zawng zawng laka in fihlîmzia tichiangtu chu nangniho hi in ni asin."_ tih kan hmu.


I natnate ṭhan len nana hmang tura Pathian i auh khan chung Isua anna kawng pasarihte chu nangmahah a lo awm ang. Chutia i tih chuan natnain a chhuahsan lovang che, mahse a siamthar ang che.


Ngaihtuah zui atan.


Natnate i tawrh laiin engnge i ṭawngṭainaah i thlen hmasak ber ṭhin?


I natnate hmang hian thlarau nuna ṭhan len i duh em? Engvangin?


Natnate kan tawrh lai chuan engtia ṭawngṭai tur nge hriat a har fo ṭhin.  I hun neih lte Pathian thu chhiar nan hmang la, natna i tawrh laia ṭawngṭai nana i hman theih tur chang zawng ṭhin rawh. Chang ṭhenkhat Pathian ṭanpui dilna chang emaw i natnate hmanraw ṭangkaia hmang tura ngenna changte zawng ṭhin la. Khawiah nge zawn tur i hriat loh chuan Sam aṭangin tan rawh.


[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...