_Tawrhna I Hmachhawn Laiin_
_Khawiah Nge Pathian?_
By Rick Warren
March 17, 2023
“ _Ani chuan manganna hmun ata a hruai chhuak che a_ ,
_Hmun thâwl takah thawveng takin a awmtîr che_ ,
_Thil tui tinrêng a hlui ta che a ni_ .” [Job 36:16]
A chang chuan Pathian chuan natna chu nangmah humhimna leh venna atan che a hmang ṭhin.
Thil ṭhenkhata natna chuan kawng danga thil pawi zawk thleng thei lakah a veng che; Nat theihna hlauhawm zawk lakan a humhim che. Chutiang chuan, natna chu malsawmna inthup a ni hlauh thei! Entirnan, khawsik chuan natna dang eng emaw enkawl ngai a hriattir che a. Natna te tham tak khan nunna atana hlauhawm ni thei chu a hriattir fo che.
Rilru natna i neih chu Pathian emaw midangte nen emaw in inlaichinna a ṭha tih a hriattirna che a ni thei. Natna chuan a ruka thang i dai palh theihna lakah a humhim che a ni thei bawk. Joba 36: 17 chuan hetiangin a sawi, “ _Ani chuan manganna hmun ata a hruai chhuak che a, Hmun thâwl takah thawveng takin a awmtîr che, Thil tui tinrêng a hlui ta che a ni_ ” tiin.
Josepha chanchin kha ngaihtuah teh – kum 40 a nih thlenga buaina a tawh tamzia kha. Thil dik lo tinreng a paltlang a ni ber mai. Chi inthliarna a paltlang a, pawngsualtu anga puhchhiat a ni a, chhungkaw innghirnghona lamin a paltlang. Tan inah chhan mumal mang lova khung hial a ni tawk. Tihduhdahna kha a kum tel a tuar tlawk tlawk a ni ber. Mahse Pathian chuan a veng a, a hruai a, thil ropui tak atan a tiṭhanglian a ni.
Genesis 50: 20ah chuan amah tinatu leh sala hralhtute hnenah chuan thu ṭha tak a sawi thei. Thil thleng hrang hrangte thlir kirin, natna a lo tawn tawhte chungchang chu hetiang hian a khaikhawm: “ _Min tihboral zawng in tum ngei a, Pathianin hmanraw ṭhaah a hmang ta hlauh zâwk a ni_ ,” tiin fim takin a khaikhawm thei a ni.
Pathian chuan i natna ngei pawh kha chutiang chuan a hmang thei. Mahse thil awm dan pumpui Pathianin a hmuh ang chu i hmu mai thei lo va, i lo buai ve chiam ṭhin.
I thil tawnte chu engmah lo mai nia i ngaih chang chuan i hnual rawih ṭhin ang, Johana 13: 7 chu I ngaihtuah fo a ngai awm e, Isuan, “ _Ka thiltih hi tûnah i hre lo; nimahsela, nakinah i la hria ang_ ” tia a sawi ang khan.
Tunah chuan thil awmzia tak tak in la hmu thei lo. I chunga thil lo thleng ṭhenkhatte chu he khawvela i awm chhung chuan i hre fiah mai ngai lo vang – mahse engtik niah emaw i la hria ang. Pathian hnathawh i nghah lai chuan Pathian chuan natna hmang chuan nangmah veng chein, a hualhim che a ni tih ring tlat ang che. I natna chu a thlawn hauh lo vang!
Ngaihtuah zui atan.
Pathian chuan eng ang hmanrua nge amah i rin theih nan leh a hnathawh a famkima hre thiam tur chuan a pek che?
Eng vangin nge natna chu kan ngaihtuahna sawrbing tura a pawimawh em em ni ang?
Pathian chuan eng ang natna lian zawk leh thil hlauhawm lakah nge natna satliah hmang chuan a chhanhim che nia i lo hriat ve tawh?
[ *Lettu* : Peka]

No comments:
Post a Comment