Monday, March 27, 2023

ENGIN NGE TIKHAWMUANG CHE?

 _Lei Rem Rap Turin_

- Rick Warren 

- March 27, 2023



_"Chutichuan, chhumpui nasa tak ang thlirtuten min hual vel avang hian, min tihnawk apiang leh sual keimahnia bet tlat chu i dah ve ang u, tin, Isua, kan rinna siamtu leh tifamkimtu lam chu enin, kan hmaa intlansiakna tur awmah chuan chhel takin i tlan zel ang u."_ (Hebrai 12:1-2) 


Ei leh ina i inkhuahkhirhin engnge i tih hmasak ber? Mi tam tak chuan an _fridge_ hawngin chhang te, ei tur siam sa te la chhuakin in ata an paih chhuak thuai ṭhin. An inkhuahkhirhna hlawhtlinna a nih beiseiin ei tur siam sa an leite chu paih bo thuai an chak ṭhin.


I nun bul ṭan ṭhat a ngai a nih tih i hriat ruala pawimawh deuh mai chu i tana ṭangkai lo leh hrisel lote paih chhuah hi a ni.


Hebrai 12:1-2 ah chuan heti hian kan hmu, _"Chutichuan, chhumpui nasa tak ang thlirtuten min hual vel avang hian, min tihnawk apiang leh sual keimahnia bet tlat chu i dah ve ang u, tin, Isua, kan rinna siamtu leh tifamkimtu lam chu enin, kan hmaa intlansiakna tur awmah chuan chhel takin i tlan zel ang u."_


Ei tur siam sa kan leite chuan kan taksaa nghawng a neih kan hmuhin kan rilru a kap tlat ṭhin. Rilru lama ei tur siam sa ang chu engtinnge kan tih tak ang le?


I nunah danglamna thlentir i duh chuan thla eng emaw chhung chu i TV i dah ṭhat emaw _internet_ i thlumzawm emaw kha i dah ṭhat a ngai mai thei. I rilru thlak danglam i duh chuan _internet_ khawvelin i rilru ei tur a chhawpte i tihtawp a ṭul ang. _Social media_ kaltlanga thil khaikhin duhna leh nawrtu che, leh thil ṭul lo tak takte kha i paih ngam a ngai ang.


Inlaichinna ṭha lo- ṭhian tak tak ni lo, ngaihzawng tak tak ni lo, Isua lak ata la hrang ṭhintu che kha i paih bo ngam a ṭul ang. Kawng dik loah an hruai che avangin. Tu emaw khaih chhuah i tum khan pawh thlak che a tum ve reng si chuan tu zawkin nge hnehna chang ang? Pawhthlak nih hi a awlsam zawk fo ṭhin.


I sual i puan a ṭul mai thei. I puang fo ṭhin em? I puan fo loh chuan i sual puan lohte kha a inchhek khawm zel a. Chu chuan Pathian nen in inlaichinna a nghawng anga, chu chuan i nunkawng zawng zawngah nghawng a nei ang. Nun siamṭhatna hlawhtling tak nei tur chuan Pathian nen in inkara tla zep ṭhinte i paih vek a ngai. I sual i puan lohte i thlauhthlak a ṭul tiin kan sawi thei bawk ang.


I nuna thil hrisel lo leh ṭangkai lote chu rilru put hmang dik lo, lehkhabu ṭha lo te movie ṭha lo, rimawi ṭha lo, chinṭhan ṭha lo leh ngaihtuahna la peng thei thilte hi an ni e kan ti thei ang.


Intlansiakna kawng i zawh mekah hian Isua lam i thlir theihna turin engnge i thlauhthlak ngai le?


Ngaihtuah zui atan.


I nun kha intlaksiakna ang, i thlen tum chu Isua an leh zual angin ngai ta la. Eng thilte nge thlarau lama i ṭhan lenna tur dal theite ni ang?


I nunah eng thil ṭha lo i tih ṭhinte nge thlah i harsat em em? Chungte chu i hneh theih nan Pathianin engnge a pek che?


Engtinnge sual puan hi chin ṭhana i neih theih ang? Chu chu engnge a pawimawhna?


[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...