Thursday, February 2, 2023

PATHIANIN A THLANG CHE A NIH CHUAN HRIAK A THIH ANG CHE

 _Pathian Thatna Hnuaia Nun Dan_ 

By Rick Warren 

— February 2, 2023


“A kotu che u a rinawm a, tih pawh a ti bawk ang.” [1 Thessalonika 5:24]

Pathian chuan i mamawh pe hmasa lo chein hna thawh tur a pe lovang che. Hriak thih nun chu hnathawh tur a pek che atana Pathianin a thuamna leh a tihchakna che a ni. 

Pathianin a mite a kaihthawhna nun chu i nun kaltlanga a thawh i duh em? Mahse a hriak thih nihna awmzia chu i hriat chian a ngai hmasa ang. Pathian hriak thih tih awmzia chu thu thenkhat i rilrua i vawn tlat a ngai ang. 

 1. *Pathianin ti rawh a tih* *chuan hriak a thih dawn che* *tih chu i beisei thei ang.* Isuan a zirtirte hnena a thuchah hnuhnung ber kha thil tih theih loh tawp tur a ni. Khawvel pumpuia Chanchin tha put darh kha thil theih loh a ni bawk. A thiltihtheihna kaltlang chauha tih theih tur a ni. Pathian chuan i chakna maia thawh theih loh tur hna a pe che ang a, mahse chu chu thawk turin a thuam chak ang che. 

“A kotu che u a rinawm a, tih pawh a ti bawk ang.” [1 Thessalonika 5:24]

 *2. Pathian hriak thihna chuan thil harsa a tiawlsam.* I thil neih, thahrui, finna, hriatna leh theihna kha a tawk zo lo ang - mahse Pathian chu a chak lo ve lo. Pathian hriak thihna nun chuan i buaina awlsam zawka chinfel turin a pui ang che a, i daihreiin, i kalthui thei lehzual ang. 

"Pa, lei leh vana chhungkaw tinreng hming chawi chhana hmaah chuan ka thingthi thin a..." [Ephesi 3:16]

 *3. Pathian hriak thihna chuan thil theih loh tih theihah a chantir.* I sumdawnna, nupa nun, hriselna, leh inlaichinna thuah chuan thil theih loh tawp tur chu i la ti thei ang. Pathian chu Pa thiltithei tak a ni a. Eng harsatna mah a thiltihtheihnain a hmachhawn theih loh a awm lo. 

 "Mihring tih rual loh hi Pathian tih theih a ni." [Luka 18: 27]

 *4. Pathian chuan mite mal i sawm theihnan hriak a thih che.* Isua chu harsatna tawk te, mitdel te, rilru na te, chin phung tha lovin a salbehte tanpui tura lo kal a ni a. Nang pawh mite thlamuan tura hriak thih i ni bawk. 

"Nazareth Isua chungchang thu kha, khatia Pathianin ani chu Thlarau Thianghlim leh thiltihtheihnaa a vurzia kha; ani chuan mi chunga thil tha leh, Diabola tihduhdah zawng zawng tidamin a fang vel thin a, a hnenah Pathian a awm avangin." [Tirhkoh 10:38]

 *5. Chona thar hmachhawn turin Pathian tuaitharna i mamawh ang.* Thlarau Thianghlim hriak thihna chu khawlkhawm lawk theih a ni lo. Vawiin harsatna hmachhawnna atan nimin lama hriak thihna i dawn chu a hman tlak loh. Naktuk, kar thar, nakum lama i harsatna thawh tur chu nimin lama hriak thihna i dawn chuan i hmachhawn thei lovang. 

A khawngaihna, hmangaihna leh thiltihtheihna chang fo turin Pathian nena in inzawm a ngai. Jakoba 4:2 chuan hetiang hian a sawi, "In chak a, in nei si lo va, tual in that a, in awt a, in nei thei si lo va, in inhnial a, in indova; in dil loh avangin in nei lo va," tiin. 

Ngaihtuah zui atan. 

Pathian chuan mal a sawm duh che tih ring ta la engnge i dil ang? 

I hmachhawp neih te chu nangma chakna hmangin nge Pathian chakna hmangin hlen chhuah i tum thin? 

Pathian chuan engtiangin nge hriak a thih che nia i lo hriat ve - a awmzia chu - hna thawh tur a pek ang ang che hlen chhuak tur chuan eng ang takin nge a thuam che? 

 *Lettu* : Peka

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...