_Ngaihven ru, Chanchin Ṭha ber chu_
- Rick Warren
- December 19, 2022
"Pathian chu mi zawng zawng chungah a ṭha a ni" (Sam 145:9, NLT)
Mi tam tak chuan i fel chauhin Pathian hnen aṭangin thilpek i dawng turah an ngai. Mahse chu chu Krismas Putar leh Pathian kan hriatpawlh vang a ni! Krismas Putar chungchangah chuan, "Fimkhur la, ṭap suh, Krismas Putar a lokal a nia" tiin kan inthlem ṭhin.
Mahse chutiang chuan Pathian chu a che ve lo. A malsawmna chungchangah chuan mifel leh misual a thliar hrang ve lo. Matthaia 5:45-ah chuan heti hian kan hmu, _"Ani chuan mi sualte leh mi ṭhate chungah chuan a ni a chhuahtir ṭhin a, mi felte leh mi fel lote chungah pawh ruah a surtir ṭhin a ni."_
A khawngaihna leh ṭhatnaah duhsak bik Pathianin a nei hauh lo. Mi zawng zawng- Pathian a awm lo a ni tite chungah ngei pawh Pathianin a khawngaihna a lantir vek a ni. A hnung i zui emaw zui lo emaw, englai pawhin Pathianin i chungah a khawngaihna a lantir reng ṭhin. Pathian khawngaihna ni lo sela chuan i thaw miah tawh lo mai thei. Sam 145:9-a kan hmuh ang hian, _"Pathian chu mi zawng zawng chungah a ṭha a ni."_ (NLT)
Hei hi khawvelin min zirtir nen chuan a inang lo hlauh a ni. I phu tawk ang zel i hmu ang tih hi he khawvelin min zirtir chu a ni. Chu chu Hindu-te chuan _Karma_ an ti. Chu chu kan tih apiangin engah pawh nghawng a nei ṭhin tih rinna hi a ni. I nun kal taa thil ṭha i tih avangin thil ṭha i tawng a, thil ṭha lo i lo tih avangin i chungah thil ṭha lo a lo thleng a ni tih rinna hi.
Mahse Pathian chu _karma_ lam hawia che a ni lova, khawngaihnaa thawk ṭhin a ni zawk. I phu ang tawk dawng zel dawn ni ta la he leia awmtlâk pawh hi i ni lovang. I phu ang tawk nei dawn ta la engmah neih i nei hauh lovang. Piang ve tur hian i phu reng em? Rawng hrang hrang hmu a, thil tuina te hre thei tur hian i phu reng em? Ngaihdam i phu em? Engmah kan phu lo. Hengte hi Pathian thilpek an ni zawk.
Luka 2:10-ah chuan angelten berampute hnenah, _"Hlau suh ulang, ngai rawh u, mi tin ta tur chanchin ṭha lawmawm em em ka rawn thlen che u a ni"_ tiin an sawi.
Hei hi Isua pian thu mipui hmaa puan a nih hmasak berna a ni. Tute tana puan nge? Mi zawng zawng tan a ni. Chumi awmzia chu mi chi hrang hrang te, sakhaw hrang hrang zuitu te, hausa leh rethei te, leh khawvel hmun hrang hranga hnam hrang hrangte tan a ni. Krismas nia angelten chanchin ṭha an puan khan ramri kham chin engmah an nei lo. Chanchin ṭha hre thei tur chin ti a indaidanna pawh a awm lo. Vawiin thleng hian chu chu a la dik reng a ni.
Krismas hi mi zawng zawng tan a ni - a chhan chu mi zawng zawng chunga Pathian a ṭhat avangin.
Ngaihtuah zui atan.
Engtinnge i chungah Pathianin a ṭhatna a lantir ṭhin?
I chungah Pathianin a ṭhatna a lantirna tur dal thei engte nge i nunah awm nia i hriat? A khawngaihnaa zalen taka i awm theih nan Pathian hmangaih hrechiang thei turin a hnenah dil rawh.
Krismas chanchin ṭha hi mi zawng zawng tan a ni. Tunkar chhung hian tu hnenah he chanchin ṭha hi i puan ve dawn?
[Lettu: Mapuia Fanai]

No comments:
Post a Comment