_Pathian Thatna Hnuaia Nun Dan_
Rick Warren
December 31, 2022
"Chuvangin, ka hrilh a che u, ‘Eng nge ka ei ang a, eng nge ka in ang aw?’ tiin in nunna thu leh, ‘Eng nge ka silhin ka fen ang aw?’ tiin in taksa thu lungkham suh u. Ei tur aiin nunna a thupui zawk lo vem ni? Silhfen aiin taksa pawh a thupui zawk lo vem ni?" Mathaia 6:25
I nun theihna atana i mamawh engkim chhuahna bul chu Pathian hi a ni. A ni chu Beram pu tha, chawm thina, hruai thintu che leh i mamawh chhâng thintu che kha a ni a. Hmun dang i ngaihtuah buai a ngai hauh lo. Sum tamna hmun Wall Street an tihah i zawn a ngai lova. Sorkarah pawh i zawn a ngai lova. I kawppuiteah emaw, i pension sum lakah emaw, i hna thawh laiah pawh zawn tur a ni lo a ni.
Thil eng emawah i thlamuana i nghah dawn chuan, chumi lak ata chhuhsak theih thil a ni tur a ni lova. I hriselna i hloh thei a. I hna i chân thei a. I lan mawina pawh a chuai thei a. I nun i chân thei a. I rilru a buai zo thei a. I kawng pawh i bo thei bawk a ni.
Mahse Pathian erawh a bo ve ngai lova. Tin, Pathianin a pek theih loh che thil engmah a awm hek lo. Philipi 4:19 chuan, "Ka Pathian chuan Krista Isuaa a ropuina ngahzia ang zelin in tlakchhamna tinreng pawh a phuhruksak ang che u" a ti.
Chuti eng vangin nge mite hi an lungngaih fo mai le? Lungngaihna hi he khawvela sual tlanglawn tak pakhat a ni ngei ang. Pathian hi englai pawhin a tha a ni tih theihnghilhna lian tak a ni a. Pathian thatna i theihnghilh hian,tawngtai aiah i mangang ta thin a, chibai bukna aiah i lungngai thin a ni.
Bible chuan, "Chuvangin, ka hrilh a che u, ‘Eng nge ka ei ang a, eng nge ka in ang aw?’ tiin in nunna thu leh, ‘Eng nge ka silhin ka fen ang aw?’ tiin in taksa thu lungkham suh u. Ei tur aiin nunna a thupui zawk lo vem ni? Silhfen aiin taksa pawh a thupui zawk lo vem ni?" (Matt 6:25) a ti a.
Chiang takin, eng thilah mah Pathian hian lungngai lo turin a duh che a ni. Mahse, lungngaih loh hi a har thin. Mihring zia a ni ve thova.
Chuti engtin nge lungngaih kan sim ang? Pakhatnaah chuan, i lungngaihna khan Pathian thatna lakah a tihrang che tih hria la. A dawt lehah chuan, thil tha ber atan lungngaih kher i duh lo a ni tiin rilru siam la. Tichuan, lungngaih aiin i vei te Pathian hnenah thlen zawk thin ang che.
Hei hi hre reng la: lungngaih tih rehna tha ber chu tawngtai hi a ni.
Ngaihtuah zui atan...
Lungngaihna hian i taksa, rilru leh thlarau engtin nge a nghawng thin?
Pathian chibai bukna hian lungngai lo turin engatinge a siam thin che?
I vei te Pathian hnenah thlenin tawngtai la, Pathian kutah nghat ang che. Tichuan i tawngtai chhanna chuan i thinlungah engtin nge a thawh tih ngaihtuah ang che.
(Lettu: Msa)

No comments:
Post a Comment