Ngaihven Ru! Chanchin Ṭha Ber Chu!
Rick Warren
December 17, 2022
Kum khata hun duhawm ber anga sawi thin a ni a. Mahse mi tam tak tan chuan chutiang a ni ve hauh lo. Duhawmna ai mahin, Krismas hun chhung hian lungngaihna i hmu tam zawk mai thei a. He khawvela thlamuanna aiin, rilru hahnain a luahkhat zawk mah maithei che a ni.
Eng dinhmunah pawh tun Krismasah hian awm la, Isua chuan i tan thil tha lutuk mai a nei a ni. "Nangni thawk rim leh phurrit phur zawng zawngte u, ka hnenah lo kal ula, keiman ka chawlhtir ang che u" (Matt 11:28) a ti.
He châng hi ka duhna em em chu mi tam takin Pathian an ngaihdan letling chiaha a sawi vang a ni. Tun Krismas chhung hian Pathianin a hnena kir tura a duh chuan, phut a neih tel an ring thin a ni.
Hetiang deuh hian a sawi an ring a ni ber a, "Lo haw la, dan ka lo hrilh ang che. Lo haw la, ka lo khuahkhirh ang che. Lo haw ta la, sakhua ka lo pe ang che. Lo haw ta la, puithuna thil ka lo pe ang che" tiin.
Mahse Pathian chuan chung thil chu engmah a sawi reng reng lo. A ni chuan, "Lo kal la, chawlhna ka pe ang che" a ti zawk a ni.
Chhiar nawn leh mah teh. Chawlhna tak tak i phurrit lak ata pek che a duh zawk a ni.
Chau leh rilru hah reng rengin i awm thin em? A chhan chu i theihna hmanga nun hman i tum thin vang a ni. Pathian chuan chung chu ti turin a duh reng reng lo che. Chu ai chuan, Pathian chuan amah a chawl a, a thiltihtheihna ring turin a duh mai che a ni.
Thuthlung Hluiah chuan, "Chau hnênahte chuan thiltihtheihna a pe thin a; chakna reng nei lote chu a tichak thin" (Isaia 40:29) a ti.
Thuthlung Tharah chuan, "Hlim taka chhelna leh dawhtheihna tinreng nei tura a ropuina chakzia ang zela chakna tinrenga lo chakin" (Kol 1:11) a ti a ni.
Hniam tulh tulh, nguai leh chau em em emaw lungngaiin tun Krismasah hian awma i inngaih chuan, Pathian hnenah lo kir ang che. Nangmah siamtu a ni a. I nun engkim a en a, a hre vek a - a la hmangaih tho che a ni. A ngaidam chein, a muanna leh chaknaa kir turin a sawm che a ni.
Vawiin hian a hnenah i kir duh angem le? I kir chuan, Krismasah hian chawlhna dik tak i hmu ang.
Ngaihtuah zui atan...
Krista tel lova chawlh i tum thinna, i hlawmchhamna thin engte nge?
Engtiangin nge chawlhna dik tak chu Krista nen i neih le? Eng angin nge a awm?
Pathianin ama chakna ngei hmangin engtin nge a tihchak che a, beidawng lo tura a puih thin che?
(Lettu: Msa)

No comments:
Post a Comment