Nun duhawm zawk nei tura inbuatsaih dan
- Rick Warren
- December 4, 2022
"Rinnain ram tiamah khan mi rama cham ang maiin a lo cham ta reng a, thutiam hmuhkhat a rochunpui tur Isaaka leh Jakobate nen chuan puan inahte an awm a" (Heb. 11:9)
Bible-ah hian Pathianin thu min tiam 7,000 aia tam mah a awm a —mahse, chung chu a tihlawhtling nghal vek ang tih erawh min tiam lo.
Krista zuitu i nih angin Pathianin a chang chuan i rinna a fiah ang tih i beisei thei a ni. Chutianga fiahna zinga pakhat chu Pathian thutiamte a lo thlen lawk loh hian a lo thleng a ni. “Fiah hun” tiin ka sawi ṭhin.
Niminah khan Abrahama’n "Fiah hun" a hmachhawn dan kan zirho tawh a. Fiahna hun pawh a hmachhawn tel bawk: _"Rinnain ram tiamah khan mi rama cham ang maiin a lo cham ta reng a, thutiam hmuhkhat a rochunpui tur Isaaka leh Jakobate nen chuan puan inahte an awm a"_ (Heb. 11:9).
Abrahama chuan a hriat loh hmun thlengin rinnain Pathian a zui a. Mahse, a hmun a va thlen khan a insiamrem nghal mai thei lo.
Chhuan thum chhung zet chu Abrahama leh a chhungte kha an pem kual ṭhin a. Pathianin Abrahama hnenah Israel a pek tur thu tiam mah se, ama hun ruatah a ti dawn a ni. Mahse Abrahama chuan Pathianin a hnena a thutiam a rin tlat avangin Pathian thu a awih chhunzawm zel a ni.
Pathian chuan a thutiam hlen chhuak turin chatuan hun a nei vek a. Chumi awmzia chu a thutiam ṭhenkhatte chu i dam chhung pawhin a thleng dawn lo tihna a ni. He khawvel i chhuahsan hunah a thleng famkim dawn a ni.
Chuvang chuan Pathianin a hrilhfiahnaah ni lovin, a thutiam chungah i nun siam turin a duh che a ni. Dik tak chuan Pathian hian i nunah engmah hrilhfiahna a bat lo che. Pathian chu Pathian a ni a, nang chu i ni lo. A hrilhfiahnate nghak tur ni lovin a thutiamte ring tlat turin a duh che a ni
Abrahama khan Pathian hnen aṭangin thutiam ropui tak a dawng a: Pathianin hnam Lian takah a siam dawn a ni! Mahse Abrahama chu Israel ram a lo thlen hnu leh mikhual ang maia a la awm lai khan heti hian Pathian a zawt ve fovin ka ring, “Engtikah nge, Lalpa? He thutiam hi min pek a. Engtikah nge i hlen chhuah dawn? A hun a la ni lo em ni?” Abrahama thlahte kha chhuan thum chhung puan inah an khawsa a, ama ramah pawh mikhual a ni.
Tunah hian fiahin i awm a ni mai thei. Chhanna i nghak a, mahse a reh tlawk tlawk niin i hria a. Heti hian i zawt a, “Engtikah nge, Lalpa? Engtikah nge he harsatna hi i buaipui dawn? Ka inzawmna? Ka sum leh pai dinhmun? Ka hriselna? Ka hmalam hun?” tiin.
Rinna awmzia chu a lo thlen hun tur pawh hre lova Pathian i nghah hi a ni.
Nghah hun laiah i awm em? Nghah hun kha khawhral mai suh. A thutiamte i zir a, i vawng tlat a, Pathian chu i ring tlat tih lantir rawh. Chutianga i tih chuan Pathianin i mizia leh i rinna a tipung ang.
Ngaihtuah zui atan.
Pathian thutiamte chu eng nge a nih engtin nge i hriat theih ang?
Pathian hi he dam chhung hian a thutiam ṭhenkhat a hlen chhuak lo a nih pawhin i ring em? Engvangin?
Eng kawngin nge Pathianin amah i nghah lai hian dawhtheihna a zirtir che?
*Pathianin i hnena a thutiam ropui ber*
Bible chuan, _"Pathianin khawvel a hmangaih em em a; tichuan a Fapa mal neih chhun a pe a, chutichuan amah chu tupawh a ring apiang an boral loh va, chatuana nunna an neih zawk nan”_ tiin min hrilh (Johana 3:16).
Vawiin hian Pathian chu a thutiam hlen chhuak turin i ring ang em? Heti hian ṭawngṭai ta che: "Lalpa duh tak, Isua Krista chu i Fapa a ni tih ka ring a. I hmaah ka sualte ka puang a, i ngaihdam ka dil bawk a ni. Isua chu ka sualnate la bo turin a thi a, i kai tho leh a ni tih ka ring. Isua chu ka Chhandamtuah ka ring a, vawiin aṭang hian a hnung zui ka duh a ni. Ka nun min hruai la, i duhzawng ti turin min ang che. Isua hmingin, Amen."
Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.
[Lettu: Mapuia Fanai]

No comments:
Post a Comment