Monday, December 5, 2022

A THEIH LOH MAW? PATHIANIN A CHHAN RING RAWH

 Nun duhawm zawk nei tura inbuatsaih dan*

- Rick Warren 

- December 5, 2022



"Rinnain Sari ngei pawhin, a tiamtu chu rinawma a ruat avangin, tar hnu tawhin chi pai theihna a hmu a" (Heb. 11:11)


Pathianin a ṭhan lentir mek lai chein chinfel theih loh ni a ngaih harsatnaten a fiah fo ṭhin ang che. Heng hi "Engtia tih tur nge ti a fiahna" tiin ka sawi ṭhin. "Engtinnge he thil hi ka chinfel ang le?" ti a i zawh ṭhin ang kha.


Pathianin Abrahama hnena a pek kha thil theih miah loh ni a lang a ni. Pathianin Abrahama hnenah khan ram tharah a hruai tur thu leh, chu ramah chuan awmna tur a pek tur thu leh chi ropui tak thlahtu a nih tur thu a tiam a. Chumai bakah Abrahama khan fa tam tak a neih tur thu leh chu ram chu an luah khah vek tur thu a sawi.


Ṭawngkam dangin sawi dawn ta ila, Abrahama hnenah khan ram ropui tak a rochun tur a pe dawn tihna a ni.


Mahse hei hi thil awmzia a ni: Pathianin Abrahama hnena he thu a tiam lai hian Abrahama kha kum 75 lai ni tawhin fa a la nei lo a. Kanan ram, a hnua Israel ni ta ramah a pem a. Chuta a awm lai chuan a nupui rai hun a nghak a ni. Kum 99 a nih thlengin fapa a la nei miah lo.


Chu chu chinfel theih loh harsatna ti a i koh chu a ni.


Bible-in min hrilh danah chuan Pathianin fa an neih tur thu  Abrahama leh Sari te a hrilh khan an nui tih a tarlang. Engtinnge fa an neih theih tehlul ang?


Hei hi "engtinnge ni ti a fiahna" chu a ni. Hebrai 11:11-ah chuan heti hian kan hmu, "Rinnain Sari ngei pawhin, a tiamtu chu rinawma a ruat avangin, tar hnu tawhin chi pai theihna a hmu a." An fapa chu Isaaka tiin a hming an phuah a, a awmzia chu "nuihza" tihna a ni.


"Chutichuan, mipa pakhat lakah (ani chu mitthi ang a ni si a) vana arsite anga tam, tuifinriat kama tiau vaivut chhiar sen loh anga tam an lo chhuak ta a." (Heb. 11:12)


Pathian nuih hnuhnung ber a ni!


Pathianin tih theih loh tur ni a ngaih ti tura a tih hun che a la tam dawn. Mahse engkim hrethiam tur emaw engkim tithiam tur emawin a duh kher lo che. Ke pen chhunzawm zel dan pawh hre turin a beisei bawk lo che.


Engkim a hria a, a duh dan leh a hun ruatah engkim a chingfel zel dawn a ni tih i hriat a duh a ni. Engtinnge thilmak a thlen ang tih hre miah lova beiseina neih hi rinna chu a ni. Chu rinna chu i lantir chuan Isua rinna kawngah i ṭhang lian tihna a ni.


Ngaihtuah zui atan.


Engvangin nge Pathianin i nuna hna a thawh dan tur a hmuhtir zel lo che ni a i hriat?


Vawiin hian Pathianin thilmak a tih i ring em? Engvangin?


Harsatna i chinfel theih lohte tifel turin Pathian i ring a ni tih engtinnge i lantir ang, a tih dan tur lo hre lawk miah lo mahla?


[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...