Nungchang siam dan_
- Rick Warren
- December 12, 2022
"Harsatna leh tihduhdahna karah pawh lawmna kan hmu thei ang, kan tan ṭhatna tur a ni tih kan hre si a- dawhtheihna min zirtirtu a ni tlat. Dawhtheihna chuan nungchang ṭha a siam si a." (Rom 5:3-4)
Hna i thawhna hmunah harsatna i tawk ngai em? Tawk teh reng ang. Tupawh, tu tan pawh thawkin eng hna pawh thawk se eng emaw laiah harsatna an tawk ngei ngei.
Chung harsatnaah chuan i kal dan tur Bible-in a kawhhmuh diam che. _"Harsatna leh tihduhdahna karah pawh lawmna kan hmu thei ang, kan tan ṭhatna tur a ni tih kan hre si a- dawhtheihna min zirtirtu a ni tlat. Dawhtheihna chuan nungchang ṭha a siam si a."_ (Rom 5:3-4)
I nawmna tur aiin i nungchang/zia siamna kawng hi Pathianin a tuipui daih zawk. Duat em em ringawt che hi a tum a ni lova, a ṭha thei ang bera chhuah che hi a tum chu a ni. I nun leh i hnathawhna chungchanga a thiltum chu i nun nawmna siam a ni lo; ṭhanlentir che hi a tum ber a ni a, chutianga i nun ṭhan lentir tur chuan harsatnate a hmang ve fo.
Hnathawhna kawnga harsatna i tawh hnuin Pathian hnenah chu harsatna chu engvanga tawk nge i nih zawt suh. "Hemi aṭang hian engnge zir se min duh? Engnge min zirtir i tum? Engnge min hliahtu? Eng nungchang nge siamṭhat ngai awm le?
"Engnge ni ta?" tiin Pathian i zawt a. He thudik awlsam tak hi hre reng rawh: i hna i thawh laiin i tan Lalpan hna a thawk ve zel tih hi.
A chang chuan thlemnate hi harsatna thlentu che a ni thei- mahse thlemnate pawh i ṭhatna turin Pathianin a hmang thei bawk. Ringtu tam tak chuan ring loten thlemna an ken tel fo ṭhin avangin chung ring lo mite chu an thawhpui an duh ṭhin lo. Mahse chu erawh a dik hauh lo. Ring lo mite lak aṭanga thlemna i tawh ang tho kha ringtute hnen aṭang pawhin i tawk ang. Thlemna tawh hrim hrim hi sual a ni lo bawk, thlemna inhnehtir kha sual chu a ni. Bible chuan nang leh kei ang thoin kawng tinrengah Isua pawhin thlemna a tawh thu min hrilh, mahse sualah a tlu ngai lo.
Khawiah pawh thawk la i damchhung chu thlemna i tawk reng dawn. Mahse chung thlemnate chu i ṭhat nan Pathianin a hmang thei. I nungchang siam nan a hmang thei. Thlemna i tawh apiangin duhthlanna i nei. Thlemna do turin duhthlanna i nei, i inhnehtir thei bawk.
Thlemnaa i luh apiangin a hliam ṭhin che. Thil ṭha tih i tum apiangin thlemnate hi i ṭhanna tur rahbi tuktu an ni.
Ngaihtuah zui atan.
Harsatna leh thlemna i tawh lai pawhin engvangin nge Pathianin lawm tura a duh che? Chutianga tithei tur chuan engnge ngai ni a i hriat?
Pathian hnenah "engvangin nge" tih aia "engnge ni" ti a zawh hian engtinnge i thlir dan a tih danglam?
Hna i thawhnaa thlemna do zo turin Pathianin engnge a pek che?
[Lettu: Mapuia Fanai]

No comments:
Post a Comment