Monday, December 12, 2022

DANGLAMNA TAK TAK THLEN TUR CHUAN RINNA NEIH A NGAI

 Nungchang siam dan_

- Rick Warren 

- December 11, 2022



"Tichuan, keimahnia thawk ṭhin thiltihtheihna ang zelin, kan dil leh kan ngaihtuah zawng zawng aia nasa zawk ti theitu hnenah ngei chuan, chatuanin chhuan zawng zawng thlengin, kohhranhovah leh Krista Isuaah chuan ropuina awm rawh se. Amen." (Ephesi 3:20)


Ni liam taah te khan i nuna danglamna tak tak thlen theih dan tur kan zirho tawh a. Danglamna tak tak thleng tur chuan Pathian thutak hriat a ngai a, i thlarau in i then fai a ṭul a, chenhonaa rinawm taka awm a ṭul bawk. Thlarau nuna ṭhan lenna kawng dang ang bawkin danglamna tak tak thleng tur chuan rinna a ngai a ni.


Ṭawngkam danga kan sawi dawn chuan Pathian ṭanpuinain i inthlak danglam thei a ni tih i pawm a ngai a ni.


Engtinnge Pathianin danglamna nun nei tura a puih che? Kawng hnih a awm. Nangmaha a Thlarau awm khan a siamṭha thei che a, a thu, Bible hmangin a siamṭha thei bawk che.


Ephesi 3:20-ah chuan heti hian kan hmu, _"Tichuan, keimahnia thawk ṭhin thiltihtheihna ang zelin, kan dil leh kan ngaihtuah zawng zawng aia nasa zawk ti theitu hnenah ngei chuan, chatuanin chhuan zawng zawng thlengin, kohhranhovah leh Krista Isuaah chuan ropuina awm rawh se. Amen."_


I nunah khan engnge i thlak danglam duh ber? Eng anga lian pawh nise Pathian tan chuan lian lutuk a awm thei lo.


Mahniin i nun i siam danglam thei lo a ni mai thei. A chhan chu mahnia danglamna nun nei tura siam kan ni tlat lo. Pathian thiltihtheihnain a ni i nunah danglamna a lo thlen. Engtinnge chu Pathian thiltihtheihna chu i neih ang? Rinnain. Amah i rinna ang zelin Pathianin a thiltihtheihna a lantir ṭhin.


Philippi 4:13 hi kan tarlan nen khian a inang riau, mahse Amplified Bible-ah chuan i la hriat ngai loh tur angin a dah tlat: _"Engkim ka tithei [min kohna ang takin] min tichaktu leh thiltihtheihna min letu zarah chuan [a tum hlena a awm theih nan- Isuaah chuan tlakchham ka nei si lova; engkimah ka inring a ni . . . chhungrila chakna leh inrintawkna mi  petu avang chuan.]"_


Isua Krista thiltihtheihnain Pathianin a kohna ang zel chein engkim i tithei. A hnung i zui rual chiah khan a thiltihtheihna i nunah a lo awm a ni.


Danglam i duh chuan 'ka ti thei a ni' tih rilu i put a ngai- i tih theih te avanga chapona lam ni lovin nangmah kaltlanga Pathianin a tihtheihzia rinnain.


Matthaia 9:29-ah chuan, _"In rin angin in chungah thleng rawh se"_ tiin Isuan a sawi.


Danglam i duh ang chen zelin i danglam. Pathianin malsawm che i duh ang chen zelin a ni malsawmna i dawn ni. Pathianin danglamna thlen harsa tak karah pawh rinna nen chuan a tidanglam thei tih i rin a ngai a ni.


Ngaihtuah zui atan.


I nuna danglamna thlentir i tumin i chaknaah nge nangmaha Pathian chaknaah i innghah zawk? Engnge a rah chhuak?


Engvangin nge Pathianin eng chena danglamna nge i duh a thlantir che ni a i hriat?


Engtinnge Isua Krista thiltihtheihnain Pathianin a kohna ang zel chein engpawh i tithei a ni tih a hriattir che?


*Isua i la ring lova a hnung zui turin i la inpe lo a nih chuan engah nge i nghah khawmuan kher ang?*


Pathian hmangaihna hi i hlawh chhuah a ngai lo va, vanram kawng mahnia i insah kuak a ṭul hek lo. Bible chuan heti hian a ti, _"Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e."_ (Ephesi 2:8-9)


Pathian hnena i nun hlan tura i inrin chuan heti hian ṭawngṭai rawh le:


"Isu, nang ka ring che anih chuan thil ka lo tihsual tawhte min ngaidam ang tiin min tiam tawh a, ka damchhan ka zir anga, engtikah emaw chuan i chatuan hmunah min la hruai ang.


"I hmaah ka sual ka puang a, min chhandamtu i ni tih ka pawm e. Chhandamna chu rinna kaltlanga khawngaihna  avanga lo awm a ni, thiltih vang ni lovin i tih hi ka pawm a. Ka lal atan ka thlang a che. Min kohna ka damchhan tihlawhtling turin Thlarau Thianghlim kaltlanga i chaknaah innghah ka thlang e. 


"Ka damchhung zawngin mahni tana nung tawh lova i tana nun ka duh e. Ka nun i tan ka hlan a, i chhungkaw zinga min pawm turin ka ngen a che. Isua hmingin, Amen."


Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.


[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...