Thursday, November 3, 2022

“TIH LOH TUR” RUAHMANNA DUANG RAWH

 Nun Duhawm zawk nei tura inbuatsaih dan

By Rick Warren

November 03, 2022

“Engkim Lalpa chuan heti hian a ti: “In awm dân hi ngun takin chhût teh u.” [Haggaia 1:5]

Hun harsa tak i paltlang hnu chuan nunphung pangngaia khawsa turin i inpeih leh tawh ang. Mahse chutianga i khawsak hnu chuan, nunphung eng emawzat i rilrua i awmtir a ngai ang. Ni eng emaw chen kan sawiho tawh ang khan i ngaihdan pawh a phir viau thei a, hun harsa chungchanga zirlai kan zir tawhah khan thil pawimawh zir chhuah pawh i nei nual awm e. Tichuan heng thil ṭhenkhatte hi i hmabak chu an ni: Engkim thlifim rawh.  

Hripui, nupa inṭhenna, dam lohna emaw thil dang harsa eng emaw ber aṭanga nun pangngaia i let leh hnu chuan, “Awle, tun hmaa ka lo tih tawh ṭhin ang khan engkim kan ti leh teh ang” ti ngawt suh. Engvangin? A chhan chu harsatna chuan mi a thlak danglam. Hun harsa i pal chhuah hnu chuan tun hmaa mi ang kha i ni tawh lo. 

Tun hmaa i tihdan hlui, nungchang hmasa leh chin ṭhan tawha let leh ngawt lovin, Pathian chuan i nun siamṭhatna hun remchang pek che a duh. Hun harsa a thlen hmaa i thil lo tih tawh ṭhin, tun hnua i kalsan hlauh tur thil a awm ang. 

Hmanlai Judahoten anmahni hruai darhtute aṭanga an let leh huna nun ngaia an let leh dawn khan zawlnei Haggaia chuan an tan thuchah hetiang hian a puang a: “Engkim Lalpa chuan heti hian a ti: “In awm dân hi ngun takin chhût teh u.  Tam tak in chîng a, tlêm tê in thar a; in ei a, in tlai si lo; in sin a, in lum si lo, inhlawhfa hlawh chu ip pawpa thlâk ang mai a ni,” tiin [Haggaia 1: 5-6] 

Haggaia ṭawngkamah hian lungawilohna thu a hmuh theih: Ka ei mawlh mawlh a, ka la rilṭam thova; ka in chamchi a, ka tui a hal reng tho. Sawi dan danga kan sawi dawn chuan, hun harsa in tawh hma thilah lungawina in hmuh chuan si loh chuan, eng vangin nge, let leh kher in duh tihna ang a ni. 

Mumal taka “in kawngte chhut ngun dan chu” “tih tur” ruahmanna mai ni lovin “tih loh tur” hmachhawp ruahman a ni. In thil tih ṭhenkhatte chu an dik lo ngawr ngawr mai lo – hun tam tak i khawhralna ṭhenkhat phone te, television te, bazar te chu anmahni mai chuan sual an ni lem lo. Chhunzawm a tul kher loh chhan chu thil ṭul ber an ni lo. Chuvangin, i “tih loh tur” ruahmanna thilah chuan telh ngawt mai rawh. 

Hun harsa tak hnu hian Pathian chuan i nun chu din ṭhat leh a duh a, tun hma zawng aia ṭha leh hrisel zawka dinthar leh a duh. Khawvel i hmachhawn leh tak tak hma chuan ngun taka chhut nawn turin i hun chu hmang ang che. 

Ngaihtuah zui atan. 

Vawiin hian i nun chhut nawn rawh. I thil lo tih tawh ṭhin chu a engte kha nge “tih loh tur” ruahmanna huangah i telh ang? 

Hun harsa chuan engtin nge a thlak danglam che? I kiang vel khawvel chu i hmuh dan chu engtin nge a thlak danglam? 

Hun harsa i hmachhawn laia i tih theih loh hun harsa a liam tak hnua tih leh i tum chu eng nge ni? 

[ *Lettu* : Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...