Friday, November 4, 2022

BUL TAN TURIN HMANHMAWH SUH

 Nun Duhawm zawk nei tura inbuatsaih dan

By Rick Warren 

November 5, 2022


“He inlârna hi hun bîk nei a ni a, A thlen hun thlîr reng la, a daw lo vang. A muan pawhin nghâk deuh la, A thleng ngei dâwn, a tlai dâwn lo.” [Habakkuk 2:3]

Ni eng emawzat liam ta chhung chu hun harsa,tuarna, khawharna leh beidawnna piaha nun ṭha zawk dinthar leh dan kan zirho ta a. Vawiin chuan hun khirh hnu lama nun ṭha zawk neih dan kan zir chhunzawm ang: *Muang marin che rawh.*

Hun khirh tak hnu lama muangmara chet chhuah chu engnge a awmzia ni ang? Hmanhmawh takin che chhuak tur tihna a ni. Kal dem dem rawh. Thil eng emaw ti tura zalenna i neih vang ngawtin hmanhmawh takin bul i ṭan leh ang tihna a ni mai lo.

Nunphung pangngaia hmanhmawh taka let leh i duh hun chuan heng thil pathumte hi hria ang che:

*1. Tun hmaa chakna i neih ang kha i nei tawh lo.*

Ka lo daihriat tawh aṭangin hun khirh paltlang chu a hahthlak takzet tih ka hria. Battery-a bulb vuah ang deuh a ni. Bulb I vuah tam poh leh a thahrui (battery) chu a liam chak ang. Chuvangin buaina chu a chhunzawm zel chuan i chakna pawh a liam chak zel ang.

*2. Pathian chu a hmanhmawh ngai lo.*

 Bible khawi laiah mah Isua tlan chiam thu a inziak lo. A ṭhian Lazara a thih lai khan, entir nan, Isua chu chawhma kal leka awm a ni. Mahse, Lazara awmna khua thleng tur khan Isua chu ni thum a thang tlat. Khua a thlen chuan Lazara chu a lo thi daih tawh. Eng vangin? Isua khan Pathian thu thu a ni a, ruahmanna ṭha zawk a nei tih a hria – Chuvangin Isua kha a hmanhmawh ruai a ngai lo.

*3. Pathian hunruat chu sawisel bo a ni.*

Hun harsa i paltlang changin dawhtheihna i tlachham a, thil tih zung zung i duh a, hriat tur pawimawh tak chu Pathian chuan a thil tih chu chiang takin a hria tih chu a ni. Lazara chungchangah chuan Pathian khan Lazara kaihthawh mai aia ruahmanna lian zawk a nei a ni. Pathian ruahmanna chu Lazara kaihthawh a ni! Mahse chu ruahmanna chuan Isua chu muangmara chet a ngai a, Pathian hun ruat chu hmakhalh theih a ni lo.

Zawlnei Habakuka khan a nun hluia let leh nghal mai duhtute hnenah thuchah mumal tak a nei a. Habakuka kaltlangin Pathianin hetiang hian a sawi: “He inlârna hi hun bîk nei a ni a, A thlen hun thlîr reng la, a daw lo vang. A muan pawhin nghâk deuh la, A thleng ngei dâwn, a tlai dâwn lo.” [Habakkuk 2:3]

Pathian tur hmanhmawh hi buaina bul a ni fo. Thuthlung Hlui hunah chuan Pathian khan a mite kha hmasawnna chu bawh ruak ruak a ngai lova, a tahtawl tetea chan chi niin a sawi. Chu chu kei chuan Fimkhur taka kaldan tiin ka sawi. Pathian ruahmanna pakhat chu mi zawng zawng aia hunbi muang zawk a ni thei.

Pathianin muangmara kal tura a duh chhan che chu muangmara chet chuan a tichak che tih a hria. Israel faten Ramtiam an pan lai khan, harsatna tam tak an paltlang. Pathian chuan hetiang hian a sawi, “I lo puna ram chu I luah khah hma chuan zawi zawiin ka hnawhchhuahsak hret hret zawk ang che,” tiin. [Exodus 23: 30]. Pathian chuan a tahtawl te tea a kal chauhin an hlawk dawn tih a hria.

Tichuan, hei hi hria ang che, i nunphung pangngaia let leh tura beih chiam a ngai lo. Chu aiah chuan, i nun tana Pathian ruahmanna i rin pumhlum lai chuan i hmachhawpte chu muangmara chet chhuahpui turin inbuatsaih ang che.

Ngaihtuah zui atan.

I nun khawi laiah khan nge kal muan i mamawh a, muangchang zawkin engtin nge i nun i hman ang?

Khawi laiah khan nge hun khirh liam hnu chuan “Nun pangngaia let leh tuma” i lo hmanhmawh ruai? Eng nge lo thleng?

Pathianin a tlai changa mi a chher hriam tawh entirna i hriat han sawi teh.

*Vawiin hian Isua i zui dawn em?*

Bible chuan hetiang hian a sawi, “Pathianin khawvêl a hmangaih êm êm a; tichuan, a Fapa mal neih chhun a pe a, amah ring tawh phawt chu an boral lohva, chatuan nun an neih zâwk nân.” [Johana 3: 16]

Pathian chuan a thutiam hlen chhuak turin i ring thei ang em? He ṭawngṭaina tawite hmang hian ṭawngṭai rawh: “Lalpa duhtak, Isua Krista chu i Fapa a ni tih ka pawm a. Ka sual a ni tih hi ka pawm bawk, i ngaihdamna ka rawn dil a ni. Isua chu ka sualte min lakbo sak turin a thi a, i kaitho leh a ni tih ka ring bawk. Isua chu min Chhandamtu a ni tih ka pawm a, ka Lal a nih anga zui ka duh bawk vawiin aṭang hian. Ka nun hi hruaiin i duhzawng tih min zirtir ang che. Isua hmingin ka dil a che. Amen.”

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e.

[*Lettu*: Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...