Sunday, November 13, 2022

RUAHMANNA SIAM THEI LO TUR KHAWPIN HLAUHNA INDALTIR SUH

 Nun duhawm zawk nei tura inbuatsaih dan

- Rick Warren 

- November 13, 2022


"I hnate chu LALPA kawltir rawh. Tichuan i thil ruahmante chu tihnghehin a awm ang." (Thufingte 16:3)

Pathianin a siam chhan che tipuitling turin, a ruahmanna leh i ruahmanna kha ṭah takin an kaltlang thei. Hemi chungchangah hian Nehemia nun hi entirna ṭha tak a ni. Nimin khan Nehemian Pathian ropuina tur atana ruahmanna a siamte zinga a rahbi hmasate pahnih kan zir tawh a nih kha.

A ruahmannate a kalpui zel theih nan Nehemia khan heng rahbi pathumte hi a siam chhunzawm a ni.

*Rahbi 3-na: Hlauhna lo thleng turin ring rawh, mahse chu chuan chawlhtir che suh se*

A lam pana Nehemia a lokal khan, lalin engvanga lungngai em em nge a nih a zawt a. Khang hun lai khan lal hmaa lungngai tak hmel put kha sual a tling tlat mai a, nimahsela Nehemia khan Jerusalema kira khawpui din thar leh tura chawlh lak dil a tum ve mek bawk a.

Nehemia khan hlauhna a hmachhawn dan kawng hnih kan hmu:

• *A veizawng a sawi chhuak.* Nehemia chuan heti hian a chhang, _"Tin, kei chuan lal hnênah, "Lal chu kumkhuain dam reng rawh se; mi thlahtute thlan awmna khua chu a ramin a kawngkhârte chu a kang vek si a" (Nehemia 2:3). I  vei dan chin kha i ṭhan dan chin a ni.

• *A ṭawng chhuah hmain tawitein a ṭawngṭai.* _"Chutichuan lal chuan ka hnênah, ',Eng nge ni i dil?' a ti a. Chutichuan van Pathian hnênah ka ṭawngṭai ta a."_ (Nehemia 2:4) A chang chuan ṭawngṭaina hi rang tak, ri miah lo va "Lalpa min pui rawh" tia kan  sawi pawh hi a ni thei. 

Pathian ṭihtute chuan hlauh an nei ngai lo tih hi tunhma aṭanga rin dan mak tak mai a ni a. Engmah a ni lo! Hlauh neih loh hi huaisenna a ni lo. Huaisenna chu hlau chung chung pawha hmalam pan ngamna hi a ni.

*Rahbi 4-na: Bitum chiang tak nei rawh.*

Nehemia khan lal hnenah chiang takin a duh tak a thlen: _"Lal remtihzâwng a nih a, i chhiahhlawh hian i mit ka lo tlun thin chuan, Judai ramah mi thlahtute thlan awmna khuaah mi kaltir la, khua chu ka va din leh ang e"_ (Nehemia 2:5).

Bitum chiang tak nei tur chuan mahni ngei zawhna pathum i inzawh a ngai: Engnge nih ka duh? Engnge tih ka duh? Engnge neih ka duh?

Pathian i hmuh len dan a zirin i tum pawh a lian a ni tih hria la. Pathian tiat thiltum neih chuan Pathian a tihropui bakah a chungah rinna i nghat a ni tih a lantir.

*Rahbi 5-na: Hunbi ruat rawh.*

Nehemia 2:6-ah chuan heti hian kan hmu,  _"Tin, lal chuan ka hnênah, (lalnu pawh a kiangah chuan a thu a) 'Eng chen nge i thang ang a, eng tikah nge i lo haw leh ang?' a ti a. Chutichuan lal chuan lawm takin mi kaltir ta a; tin, keiin hunbi ka tiam a."_ A hun ruattu kha Pathian nimahse Nehemia khan hunbi a la tuk ta cheu, ruahmanna mumal tan a neih theih nan.

I thiltum khan hunbi tuk a neih loh chuan, tumbik a nei lo tihna  a ni mai. "Engtia rei nge hun a duh dawn?" tiin zawt la. I calendar-ah chhinchhiah rawh. Hunbi tuk awm lo duhthusam chu engmah lo mai a ni tih hre rawh. Khawiah mah a chhuak lovang." 

Naktukah chuan Nehemian nunkawng ruahmanna a siama rahbi hnuhnung pahnih a siamte kan thlirho ang. Lo hmaih hauh suh ang che!

Ngaituah zui atan.

Vawiin ka zirlai i chhiar hnu hian engtinnge i hlauhnate i thlir dan a danglam?

Engtinnge Pathianin ruahmanna mumal nei tura a fuih che? Heng zawhnate hian kaihruai che sela: Engnge nih ka duh? Engnge tih ka duh? Engnge neih ka duh?

Hunbi tuk neih hian hlauhna a chawk chhuak fo. Engtinnge Pathian thiltum mila hunbi tuk thlir thiamna hian Pathian thiltum kan thlir dan a tihdanglam? Engtinnge i nunah ruahmanna i siamin pawimawhna an neih?

*Hlauhna tel lovin nun dam kawng awm chhun chu Pathian nen in inkar boruak tihṭhat a ni.* Chu chu i nuna Isua tel tura i sawm khan i ti thei a ni mai. He ṭawngṭai hmang hian bul ṭan rawh: "Lalpa, Isua ka rin chuan ngaihdam ka nih tur thu min tiam a. Tunah hian i ngaihdam ka rawn dil e. Misual ka ni tih ka hria a, nang chauh hian ka sualte i thaichhe thei tih ka hre bawk e.

"Isua Krista, ka sual avangin i thi tih ka hria a. I tho leh a thihna thiltihtheihna i la bo tih ka hria e, chatuana i hnena ka chen theih nan. Ka nuna sual thiltihtheihna pawh i la bo tih ka hria e. Sual hawisana rinawm taka i hnung zui turin min pui ang che.

"Min chhandam avangin ka lawm e. Ka chhandamna thawh chhuah ngai lovin, phu lo mahila i khawngaihna min chantir avangin ka lawm e. Min hmangaih avang te, min chhandam avang te leh i chhungkuaa min pawm avangin ka lawm e. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia,

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...