Nun duhawm zawk nei tura inbuatsaih dan
By Rick Warren
November 10, 2022
“Fahrahin ka kalsan lo vang che u; in hnênah ka lo kal leh ang.” [Johana 14:18]
A chang chuan i duh loh leh ngainat loh dan anga i awm tlat chang a awm. Dik tak chuan, ni eng emaw zat chu mihring nun thlipuiin a chhem len hlauhawm khawpa i awm chang a awm ang a. Chutiang hunah chuan hringnun thlipui hlauhawm tak lakah chuan engtin nge i him theih ang? Ni eng emaw chen aṭang khan thlipui laka him dan kawng thum kan zir ta a: Thlarauva i chhungte chu zawm tlat rawh, i thil zirte chu nunpui la, Pathian ropuina lam chu thlir ang che.
Hei hi kawng palina chu a ni: Isuan engtiang takin nge a ngaihsak che tih ngaihtuah rawh.
Isua chuan i thil buan mek ringawtte chu a en lo, engtin nge i buan tih pawh a ngaihtuah. A ngaihsak mai che a ni lo va, a tih tur pawh fel takin a ti ṭhin.
Isua tui chunga a kalna thu ziahna Marka 6: 47-48 ah khan Isuan a hmuh thu, mite a ngaihsakna thu kan hmu: “Khua a lo thim a, lawng chu dîl laiah a awm tawh a, ani erawh chu amah chauhvin khawmualah a la awm a. Thliin a ni lo lama a nem avâng chuan mangang taka lawng an kar chu a hmu a; khawfîng chah dâwn vêlin dîl chungah chuan an lam panin a kal a, kal pelh a tum a.”
Isua zirtirtu khan harsatna chi li an hmachhawn: A thim a, dil lai takah an awm a, anmahni maiin an awm a, “thli kha anmahni su zawngin a tleh.”
Chu chu Isuan engtin nge a hmachhawn? Tuipui kamah dingin an tih tur a lo hrilh satliah mai lo. Anmahni lam panin a kal mai zawk a – tui lamah ngei chuan – an harsatna hmunah chuan. Hetiang hian a sawi, “Thlamuang takin awm rawh u. Keimah ka ni alawm, hlau suh u” (Marka 6:50) Tichuan Isua chu lawngah chuan a lawn kai a, thlipui chu a lo bang ta a.
Hun harsa takah chuan chu chu Isuan a tih chu a ni. A awmna hmun kalsan khawp hialin a rawn pan che a ni – i awmna ang angah – a lo inrawlh duh.
Thiante u, chu chu Chanchin Tha chu a ni. Pathian chu khawvelah keimahni ang ni turin a lo kal a. Kan harsatna zawng zawng inbelin kan sualte avangin kraws-ah chuan a lo thi ta a ni. Vanram atangin tih dan tur a rawn sawi ngawt lo. Kan hnenah lo kalin “Buaina in chinfel theih loh chu ka chinfelsak ang che u” a lo ti a ni.
Eng ang dinhmun nge i paltlang mek ka hre lo. Hei hi ka hrilh duh che: Kalsan emaw i inti mai thei, mahse a ni lo. Pathianin a hmu che a, a ngaihsak che a, i kiangah a awm a – thlipui thim ber hnuaiah pawh.
Johana 14:18 chuan hetiangin a sawi, “Fahrahin ka kalsan lo vang che u; in hnênah ka lo kal leh ang.”
Eng harsatna pawh hmachhawn la, Isuan a ngaihsak chein i kiangah a lo kal duh tih hria ang che.
Ngaihtuah zui atan.
Marka 6:48 in a sawi dan ang khan buaina Isuan a hmuhpui atan che a duh loh neih chang i nei em? Nangmah maia harsatna chinfel duh chang i nei em? Han sawifiah teh.
Isua chu leilung leh van zawng zawng siamtu a ni a, tuite pawh tiamin, Isua tui chungah a kal a ni tih kha pawm harsa tih chang i nei em? Eng vangin nge?
He fianrial thuzir i chhiar hnu hian, i thian tu emaw thlipuia tang mek hnenah chuan thurawn eng nge i pek ang?
*I nunah Krista chu i la sawm ngai lo a nih chuan engah nge vawiinah hian i sawm mai loh?*
He ṭawngṭaina hmang hian bul ṭan ang che: “Ka sual a ni tih hi ka pawm a, i ngaihdamna ka rawn dil a ni. Isua chu ka sualte min lakbo sak turin a thi a, i kaitho leh a ni tih ka ring bawk. Isua chu min Chhandamtu a ni tih ka pawm a, ka Lal a nih anga zui ka duh bawk vawiin aṭang hian. Ka nun hi hruaiin i duhzawng tih min zirtir ang che. Isua hmingin ka dil a che. Amen.”
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e.
[*Lettu*: Peka]

No comments:
Post a Comment