Chatuan Nihphungte
Rick Warren
Oct 1, 2022
Pathian tan chuan, i nimin te, i vawiin leh naktuk zawng zawngte hi a inzawm vek a. Ringtu zawng zawng hnenah, "I tan nun duhawm tak mai ka ruahman a. I tan thatna leh zahngaihnate hi a awm reng a, i nun chhung a zui zel ang che. Chu zawng chauh chu a la ni lo! A tawpna atan thil tha tak ka ruahman cheu a ni" a ti a ni ber a.
Vawiin, nimin leh naktuk hi Davida chuan thiam tak maiin a sawifiah a, "Tichuan LALPA inah kumkhuain ka awm reng ang" (Sam 23:6) a ti a. Davida hian ringtute hnenah tawpna awm dan tur a sawi a: Vanramah kan kal dawn tih hi!
Pathian nen chuan a tha tulh tulh zel mai a ni.
Paula chuan hetiang hian a sawi ve thung a, "Kan awmna leia in hi thiat mah sela, vanah, in kuta sak loh, chatuana awm tur, Pathian hnen ata in nghet chu kan nei tih kan hre si a" (2 kor 5:1) tiin.
Chatuan hi engtia rei tak ni ang maw? Chatuan daih a ni tawp mai!
I taksa hi engtikah emaw ala thi ang a, mahse nangmah tak thi si lovin. I taksa tan tawpna a ni ang a, mahse chu chu i tan tawpna a ni ve kher lovang. Hmun pahnihah, a khawi emaw zawk zawkah hian chatuan hmun i hmang dawn a ni - Vanram emaw hremhmunah emaw hian. Chatuan daih tura siam i ni a, zawhna awm ta chu khawiah nge chatuan chu i hman ang tih hi a ni.
Christiante hian an hmalam hunah hian engvangin nge huaisenna an neih? Bible chuan, "Chutichuan, taksaa kan awm chhung hian Lalpa hnenah kan awm lo tih hriain, kumkhuain muang takin kan awm thin; muang takin kan awm, ka ti, taksaa awm lova Lalpa hnena awm kan duh zawk" (2 Kor 5:6,8) a ti a.
Engtikah emaw ila thi ang a. Krista hi i pawm chuan, Vanramah i kal anga. Natna te, lungngaihna te, tawrhna, manganna leh hlauhna lakah i zalen famkim tawh ang.
Pathian chuan i lungngaihna zawng zawng a tibo tawh ang a, "An mit ata mittui zawng zawng a hrufai ang a; Thihna a awm leh thei tawh lo vang a, Lungngaih te, tah te, nat te pawh A awm leh tawh hek lo vang; Thil hmasate chu a ral ta,” a tih ka hria" (Thup 21:4) ang khan.
Isua zuitu angin, he thutak hi i ring thei ang: a tha ber hi ala thleng dawn chauh a ni!
Ngaihtuah zui atan...
I nuna mi hi eng ber nge chatuan daih tur awm le?
Chatuan i thlirna hian i ni tin nun, i tum, i ruahmanna, i hun ruat, leh midang nen inlaichinna te engtin nge a tih danglam?
Chatuan nun Pathian nena i hmanna turah i chian viauna hian i ni tin nunah engtin nge a lan le? Engvangin nge?
(Lettu: Msa)

No comments:
Post a Comment