Saturday, September 10, 2022

MI DANGTE RAWNGBAWL TURA KOH I NI

 Kohna mila nun: Engvangin nge khawvelah hian ka lo pian ve?

- Rick Warren

Sept 10, 2022


Rom 14:12 "Chutichuan kan zain Pathian hnenah mahni chanchin kan sawi theuh tur a ni."

He khawvela i nun a kin hunah chuan, Pathian hmaah i la ding anga, tichuan midangte rawng i bawl dan a la enfiah dawn a ni. Bible chuan, "Chutichuan kan zain Pathian hnenah mahni chanchin kan sawi theuh tur a ni" a ti a (Rom 14:12)

Chumi nghawng awm thei angte han ngaihtuah teh. Pathian chuan nangma tana i hun leh tha i hman zat leh, midang rawngbawlna atana i sen dan a teh ang.

Chumi hunah chuan, mahni hmasialna chu thil awihawmloh mai a ni dawn a ni: 'ka buai lutuk a', emaw 'mahni tum dan ka nei a', emaw 'ka hna emaw, ka intihlim a, ka pension hun atan ka inbuatsaih' tih ang zawng zawngte kha. 

Chhuanlam zawng zawngah, Pathian chuan hetiang hian a chhang ngei ngei ang: "A pawi hle mai, chhanna diklo a ni. Ka siam che a, ka chhandam che a, ka ko bawk che a. Rawngbawl nun nei turin thu ka pe che a. Chu chu a englai kha nge i hriatthiam loh?" tiin.

Ringlote vaukhanna Bible hian a sawi tho a, "Amaherawhchu kawhmawh bawla thutak zawm lova, fel lohna zawm zawktute chungah chuan thinurna leh thinrimna te, hrehawmna leh lungngaihna nasa takte a awm ang, mihring thil tisual apiangte thlarau chungah a awm ang" a ti a (Rom 2:8). Tin, Kristian mahni tan chauha nungte pawhin an chatuan lawmman an chang ang.

Bible chuan midangte kan tanpui hian kan nun hi a famkim thin a ti a. Hetiang hian Isua chuan a sawi a: "Tupawh a nun humhim duh apiangin a chan ang a; tupawh keimah avang leh Chanchin Tha avanga nun chan apiangin a humhim ang" (Mark 8:35) a ti a ni. 

Chutiang bawkin thutak chu Matthaia leh Luka ziakah kan hmu nawn leh a:

• "Tupawh a nunna hmu chuan a chan ang a; keimah avanga a nunna chan chuan a hmu ang" (Matt. 10:39).

• "Tupawh a nun humhim duh apiangin a chan ang a; tupawh keimah avanga a nun chan apiangin a humhim ang" (Matt. 16:25)

• "Tupawh a nun humhim duh apiangin a chan ang a; tupawh keimah avanga a nun chan apiangin, chu mi ngei chuan a humhim ang" (Luka 9:24)

• Tupawh a nun humhimna zawng apiangin a chan ang a, tupawh a nun chan apiangin a humhim ang. (Luka 17:33)

I hrethiam em? He thutak hi a pawimawh em em avangin Biblea Chanchin Tha buah vawi 5 lai a inziak nawn a. Midang rawng i bawl loh chuan, i nung mawl ve tawp tihna a ni a - a chhan chu nun chu rawngbawl tura tih a nih vang a ni.

Pathian hian i lak atangin eng nge a beisei le? Midangte hmangaih leh hmasial lova an rawngbawl dan zir turin a duh che a ni.

Ngaihtuah zui atan...

Mi dangte rawng i bawlsak hian, chu i rawngbawlna chuan engtin nge a nghawng che?

Eng vangin nge midangte hmangaih leh rawngbawl sak dan zir turin a duh che? Chu chuan ama chungchang engtin nge a sawi?

Pathianin i rawngbawlna tura a kohna che, mahse i hlamchhiah si engnge ni le? Chutiang chuan engtin nge rawng i bawl tan theih ang?

(Lettu: Msa)

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...