Thursday, September 29, 2022

CHATUAN ENG ATANGA HARSATNA THLIR DAN KAWNG THUM

 Chatuan Nihphungte 

By Rick Warren

— Sept 29, 2022 


“Chung lama thil awmahte chuan in rilru nghat tlat rawh u, leia thil awmahte chuan nghat lovin.” [Kolossa 3:2] 

Chatuan enga i nun i hman tawh chuan, buainaten an tihnual zung zung tawh lovang che. I beidawng mai lo bawk ang, a chhan chu i hmabaka nangmah hmuaktu che chu i thil neih tawh zawng zawng aia ṭha zawk a ni tih i hriat chian avangin. 

Bible chuan II Korinth 4: 16-18 ah hetiang hian a sawi, “Chumi avâng chuan kan zâm lo ve, kan pâwn lam mihring hi awngrawp telh telh mah sela, kan chhûng lam mihring chu ni tin siam tharin a awm zâwk a ni. Rei lo te chhûnga kan hrehawm tuar nêp tak hian chatuan ropuina, khaikhin rual loh khawpa nasa chu min siamsak a ni. Thil hmuh theihte chu kan thlîr lo va, thil hmuh theih lohte chu kan thlîr zâwk si a. Thil hmuh theihte chu a ral mai dâwn a, thil hmuh theih lohte erawh chu chatuanin a awm ang,” tiin. 

Tunah khan eng buaina nge i hmachhawn mek ka hre lo, mahse an nihna ziarang pathum ka hrilh thei ang che: 

•Pakhatna, a awm reng dawn lo. I damchhung hun a daih a nih pawhin chatuan daih a ni chuang lovang. 

•Pahnihna, i buaina tawn mek chu nangma tihsual vang a niin a ni lo emaw, Pathianin i nun atan thil thaah hman a duh a, a hnenah chung harsatna chu i hlan chuan, i nun thlengin alo chher ang. 

•Pathumna, chatuan atan Krista avanga i tuarna avang chuan lawmman pek i la ni ang. 

Vanram i thlen hun chuan, Isua awmpuina chu ropui ti takin i la tem ve ang. Krista chenchilhna avanga ropuina chuan a tuam lo che a nih chuan, i rilru ngaihtuahnaa lo lut tur chu hei hi a ni: “Eng nge ka ngaihtuah? Eng vangin nge mite lawmna zawng mai maia ka hun ka lo khawhral? Lar tumna maw? Khawvelah sum ka lo khawl khawm ve chiam a maw? Pathian rawngbawlna atan hun ka nei lo, ka pe hman lo, ka sem hman lo, inlaichinna atan ka hman lo, thil pawimawh ber atan hun ka lo nei lo.  Anih chuan, eng vangin nge thil pawimawh ber atan chuan ka hun ka lo pek theih loh? 

Kan tih tur tam berte chu – thil ṭhate pawh an ni ang – chatuan an daih lo ang. I hun hman mek darkar tinte pawh mai khan chatuan hun i hman dan turah pawimawhna an nei vek. I thutlukna siam zawng zawng. I ngaihtuahna zawng zawng. I thiltih zawng zawng. I ṭawngkam tin kha. I rilru puthmang zawng zawng. I chak zawng apiang. I thilṭha tih zawng zawng. I thilsual tih zawng zawng. 

Kolossa 3: 2 chuan hetiang hian a sawi, “Chung lama thil awmahte chuan in rilru nghat tlat rawh u, leia thil awmahte chuan nghat lovin.” 

Pathian chuan vanrama lawmman te chu dawng tlak i nih dawn leh dawn loh i awm dan aṭanga enin a fiah ṭhin che. I damchhan mila i nun chiah chuan heng zawhnate hi i inzawt chamchi ṭhin: Chatuan an daih ang em? Ka sum hi a phu em? Ka hun a phu em? Ka hmingṭhatna nena thleng phal chi a ni em? 

Chung zawng zawng aia pawimawh zawk i inzawh tur chu he zawhna hi a ni: Chatuana awm tur Pathian Ram atan chuan eng nge danglamna a thlen ang? 

Ngaihtuah zui atan. 

I ngaihtuahnate vanram thila i chhunkhah chuan engtin nge i hun tawn mek i thlir dan chu a thlak danglam ang? 

Pathian hnena buaina thlen tih awmzia chu eng nge ni? 

Ral mai tur khawvel thil atan chuan eng tianga nasain nge i hun, i rilru leh chakna te i lo senral ve tawh? Engtin nge i ngaihtuahna chu I thlak danglam ang? 

Pathian chuan a chhungte zinga mi atan a duh che 

Pathian chuan amah hmangaih turin a siam che a, chu chu i hmuh chianna ber chu kraws a ni. Isua thihna leh thawhlehnaah chuan, chatuan atana a chhungte zinga mi ni turin Pathian chuan hna a thawk. Eng ang thil pawh lo ti tawhin, khawi hmunah pawh lo awm tawh la, Pathuan chatuan chhungte zingah chuan chanvo neiin an lo nghak mek che. Sawmna chu zau taka hawn a ni. Ring la chang mai rawh.  

I inpeih tawh em? He ṭawngṭaina hmang hian bul i ṭan thei ang: “Lalpa duhtak, ka thih hun chuan keimah chanchin ngei hi ka lo sawi dawn a ni tih ka hria a. I lakah thil ka tisual a ni tih ka hria a, ka duh dan anga nungin, i duh dan nilo zawnin ka nung ṭhin. Tun aṭang ngei hian chu chu thlak danglam ka duh e. Ka sual kalsan a, i lam lo pan ka duh e. 

“Ka sual zawng zawng aia Isua thi tura i rawn tirh avang khan hremna ka pumpelh ta a, lawmthu ka rawn sawi e. I ngaihdamna chu ka phu lo tih ka pawm a. I khawngaihna chauh chuan min chhandam thei tih ka hria e, Lalpa. Hmun famkima lut tur chuan ka ṭha tawk ngai dawn lo tih pawh ka hria. 

“Isu, min hmangaih em avangin ka sualte i phur a, lawmthu ka hrilh a che. Vanram kai tlaka min siam a, min chhandam turin i khawngaihna ka rawn ngen e. Ka ring che, Isu. I thutiam ang takin min chhandam nghal dawn tih ka hria, chiang takin, ka pumin, chatuan atan. Isua hmingin ka dil e. Amen.” 

Isua hminga i ṭawngṭai zo chiah a nih chuan, he email Rick@PastorRich.com ah hian min lo hriattir ang che. Isua nena in zin kawng atana thuziak pawimawh a thlawna lo thawn che ka duh e. 

[*Lettu*: Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...