_Chatuan Nihphungte_
- Rick Warren
Sept 24, 2022
Vanram hi Pathianin a chhungte awmna tura a siam a ni a.
Pathianin lei siam a rilruk lai khan, vanram pawh a ngaihtuah tho a. Eng vang nge ni ang le? A chhan chu he leia cheng reng tura tih i nih loh vang a ni. Hei hi thil awm zawng zawng a la ni hauh lo a ni.
Chu chu thil tha tak a ni a, a chhan chu hmun tha famkim lo lutukah hian chen reng i duh ka rin loh vang a ni. Pathian chhungkua i nih angin, hmun tha famkimah la chen ve i duh ngei ang.
Chatuan atana Pathian thil tum hi a hmangaihna lanchhuahna ropui tak a ni a. Bible chuan lei leh van zawng zawng hi chatuana a kianga cheng tura chhungkuate tan a siam a nih thu a sawi a. A mal em vanga siam pawh a ni hek lo, amah mai pawh khan a famkim vek zawk a ni. A hmangaihna lantirna turin a anpuiin mihringte a siam a, tichuan a chhungkuaah a la lut thei anga, a kiangah kan cheng thei dawn bawk a ni.
Ephesi 1:5-ah chuan, "A khawngaihna ropuizia fak turin ama lungduha lawmzawng angin Isua Krista zarah ama tan faa siam tura min lo ruat lawk tawh avangin" a ti a.
Pathian chhungkua sawina thumal a awm a - kohhran tih hi a ni. He khawvela thil awm chatuan thlenga awm tur chu kohhran - rinna leh thuawihna hmanga Pathian chhungkuaa telte chauh hi an ni.
Bible chuan, "Rochan chhe thei lo, bawlhhlawh kai lo, chuai thei lo, vana in tana khek chu hmuhna turin (1 Pet 1:4)" a tih ang khan.
Chatuan daih tura siam i nih avangin, chatuan hmun i thlenna tur i thlan a ngai dawn : Vanramah emaw hremhmunah emaw.
Isua chu i nuna Lalah i siam chuan, Pathian fa i nih anga roluahtu nihna leh chantuan in atan Vanram i pawm a. Chu roluahtu nihna chu i lak ata laksak theih i ni lo. Pathian thilpek mak tak a ni zawk. Chatuan hmun i hmanna tidanglam lovin, tuna i nun dan a thlak zawk a ni.
Bible chuan Hebrai 13:14-ah chuan, "Hetah hian khaw hmun nghet kan nei si lo va, khaw lo la awm tur chu kan zawng zawk a ni" a ti.
Pathian chhungkuaah i tel ve chuan, helaia kan nun ang mai piah lamah thil tam tak a la awm a. He lei hi i in tak a nih lohna i hrethiam tan ang a. I kaltlang chauh mai a ni!
Ngaihtuah zui atan...
I nun hi chatuan nen tehkhinin a tawizia i hria ang a, Isua zuitu i nih angin beisei tur i ngah sizia i hriat hian i nun engtin nge i thlirdan a tih danglam?
Engtin nge Pathian hi i chatuan Pa anga i lo hriat thin dan le? A fa nih chu eng nge a an?
Vanram chanchin i ngaihtuah hian mi dang hrilh ve turin a tur hmanhmawh che em? Eng vang nge?
(Lettu: Msa)

No comments:
Post a Comment