Kohna mila nun: Engvangin nge khawvelah hian ka lo pian ve?
- Rick Warren
- September 12, 2022
A hmangaih ni turin Pathianin a siam che.
Bible hian Pathianin hmangaihna a nei a ti lo va, "Pathian chu hmangaihna a ni" a ti (1 Johana 4:8) . Hmangaihna chu Pathian nihna a ni a, Pathian chu hmangaihna a ni.
Bible chuan heti hian a ti, "Nangin engkim i siam a, I duh avanga awm leh siam a ni bawk si a" tiin (Thupuan 4:11).
Pathianin a thilsiamte aṭanga hlimna a hmuh avangin engkim mai hi a siam a ni. Hmangaih a duh bawk a. Lungpui zawng zawng te, thing leh thlai zawng zawng te, ramsa zawng zawng te, arsi zawng zawng te leh mihring zawng zawngte hi Pathianin a hmangaih vek a ni.
Sam 149:4-ah chuan, "LALPA chu a mite chungah a lawm si thin a" tiin kan hmu.
I hun zawng zawngah Pathianin hlimna a hmu. Engvangin maw? A siam che i ni tlat. Ani chu i Vana Pa a ni.
Mi ṭhenkhat chuan thil eng emaw sakhuana kawk bik riau an tih hian Pathian an tihlim niin an ngai ṭhin. Mahse chu aia thutak hlat a awm awm lo ve. Pathian siam i nih avangin i nihna anga i awm mai khan Pathian a lawm a ni.
Pathianin a hlim nana a siam che i ni a, amah hmangaih let ve i zir a duh a ni. "Zirtirtu, dan thupekah hian engnge ropui ber?" ti a an zawh khan Isuan Bible bu pum zirtirna hlawm khatin a chhang (Mat. 22:36).
Isuan heti hian a chhang: "Lalpa, i Pathian chu i thinlung zawng zawngin, i thlarau zawng zawngin i rilru zawng zawngin i hmangaih tur a ni,’ tih hi. Chu chu thu pek ropui leh pawimawh ber a ni." (Mat. 22:37-38).
Hringnun hi hmangaihna chungchang vek a ni. Chu chu i hriatthiam loh chuan i nuna Pathian thiltum - i thinlung zawng zawng, thlarau zawng zawng, rilru zawng zawng leh chakna zawng zawnga, Pathian i hmangaih tur a ni tih hi i hmaih dawn tihna a ni.
Zing ka thawh veleh ka kein lei a rah hmain heti hian ka ṭawngṭai ṭhin: "Lalpa, ni thar a lo her chhuak leh ta. Vawiin hian hna engmah ka hlen loh chuan hriat chian leh zual che ka duh a, hmangaih leh zual che ka duh a ni."
Ni ṭha taka hmang lova in hriain, thil tih sual tam tak nei, sual kawnga tlu, lungngai leh na nei chunga ni i vui liam pawha, tlema Pathian hmangaih leh zual i zir a ni tih i hriat khan, engmah lovin ni i vui liam thlawn hauh lo a nia.
Pathianin ti tura a tih che ang chiahin i ti a nia.
Ngaihtuah zui atan.
Engvangin nge mite hian Pathian hmangaihna leh an chunga a lawmna hi an pawm thei tlat lo nia i hriat?
Engatinge mite hian Pathian siam chhan ber- thinlung zawng zawng, thlarau zawng zawng, rilru zawng zawng leh chakna zawng zawnga, Pathian hmangaih tur tih hi an ṭhelh fo nia i hriat?
Nun hi hmangaihna a ni tih i hriat chhuah tak tak chuan, chu chuan engtinnge vawiina i thil dah pawimawhte a tihdanglam ang?
*I sualna chu engpawhnise, Pathianin a hmangaih che*
A hmangaih atan Pathianin a siam che a, sualah tlu mah la a hmangaih reng che. A hmangaih em che avangin, a Fapa Isua chu, i sualte nuai bo tur leh a chhungkuaa seng lut tur chein a rawn tir a ni.
Pathian hmangaihna i la pawm miah lova, Isua i nuna cheng tura i la sawm ngai miah lo a nih chuan, tunah hian chu hun ṭha chu i neih ka duhsak che a ni. Heti hian ṭawngṭai teh le: "Lalpa, ka hrethiam vek lo, mahse min hmangaih avangin ka lawm e. Min chhandam tura Isua i rawn tirh avangin ka lawm e.
Ka sual ka puang a, i ngaihdamna ka rawn dil e. Ka chhandamtu atan Isua ka mamawh a, vawiin hian ka nuna lo chêng turin ka sawm duh a. A hnung zuia a thu anga awm ka duh e.
Ti tura min duh chu tih zel ka duh. Nang hmangaih che leh rin che a, i chhungkuaa chatuana awm ka duh e. Isua hmingin, Amen."
Lal Isua hnenah i inhlan thar a, lal leh chhandamtu a i pawm a nih chuan khawngaihin Rick@PastorRick.com-ah hian min lo be dawn nia. Lal Isua nen nitin hun in hman theih nana puitu che atan thil tangkai tur lo thawn che ka duh a ni.
[Lettu: Mapuia Fanai]

No comments:
Post a Comment