Thursday, June 23, 2022

LAWM THUSAWI TAWNGTAI THILTIHTHEIHNA

 Hlimna Nun Kawng

Rick Warren

— June 23, 2022

 

“Engah mah mangang suh u, eng thilah pawh ṭawngṭaiin, in mamawh chu Pathian hnênah thlen ula, lâwmthu hril zêl chungin dîl rawh u. Tichuan, mihring hriat sên rual loh Pathian thlamuanna chuan, in thinlung leh in rilrute chu Krista Isuaah chuan a vênhimsak ang che u.” [Philippi 4:6-7]

Philipi 4: 6-7 ah hian Bible pumpuia zirtirna zawm harsa ber pakhat kan hmu thei: “Engah mah mangang suh u, eng thilah pawh ṭawngṭaiin, in mamawh chu Pathian hnênah thlen ula, lâwmthu hril zêl chungin dîl rawh u. Tichuan, mihring hriat sên rual loh Pathian thlamuanna chuan, in thinlung leh in rilrute chu Krista Isuaah chuan a vênhimsak ang che u.”

Kan nitin nuna kan thil tawn ṭhenkhat, a hlauhawm deuh bikte phei chu en liam mai mai a harsa fo, mahse Pathian chuan a tih dan a hria. Engkim ṭawngṭainaa hlan turin min ti a, a thiltih zawng zawng avanga lawmthu sawi turin min ti. Lawmthu sawi ṭawngṭaina chuan thlamuanna a thlen ṭhin. Pathian chuan i lungngaih rual chiah khan i ṭawngṭai tur a ni tiin a chah che.

Nu leh pate chuan lawmthu sawi ṭawngṭai thiltihtheihna chu an hre awm e. Nu leh pa tam berte chuan an fate zinga thil dil hrat tak “ka lawm e” tih nachang hre leh si lote chu an lawm teh chiam lo vang.

Chutiang chiah chuan Pathian chuan thil a thlir a ni. Ani chuan in thil mamawh leh duhzawng in dil hun chu a lo nghak reng a. Thuthlung Tharah hian vawi 20 chuang “dil rawh u” tih thu a sawi a ni. Mahse, lawm chunga dil turin a chah thung.

Bible chuan in thil dil chu sawi chiang turin mite a chah a – Amah fakna thuah nen. “Thil engkimah lawmthu kan sawi e” ti mai lovin Pathian chuan i lawmthu sawina chu chiang taka sawi turin a duh che.

Ka nupui hnenah “I chungah ka lawm hle mai” tia ka sawi chang chuan a chhan sawi chiang turin min ti ṭhin. A chunga ka lawm chhan leh amah avanga kan lawmnate chu chiang taka sawi turin min duh ṭhin. Pathian pawhin chutiang chuan a duh. Chuvangin, i ṭawngṭai changin, Pathian hnenah i lawmna chhan tak chu sawi ṭhin ang che. 

Rinna nei thuk lehzual tur chuan thil lo la thleng lo chungah pawh A hnena lawmthu sawi lawk turin min duh. Pathian chunga lawmthu sawi lawk duhna i neih chinah phei chuan – Amahin hna a thawh hma ngei pawhin - thilmak a thleng ang.

I lawmna a nasat poh leh Pathian hnathawh chu a nasa zual sauh ang. Bible chuan Pathian chu a mite faknaah a cheng ṭhin tiin a sawi hial. I lawmthu sawina chu i nuna A thiltihtheihna lan chhuahna atan a hmang thei a ni.

Awle, ngun takin ngaihtuah la, Pathian chunga i lawmna hrang hrang avang chuan Ama chungah lawmthu sawi ang che.

Ngaihtuah zui atan.

Engtin nge lungawina chuan Isua lam a hawitir che a, a ngaihhlut zawng a chhuitir che?

Engnge Pathian chunga lawmna bik tak i neihte chu? Fianrial hun hmangin Pathianin chung thil a tihsak che avang chuan lawmthu sawi rawh.

Pathianin hmalam huna mal a la sawm dan tur che nia i beisei chu eng nge ni? Chungte avang chuan Pathian hnenah lawmthu sawi rawh – a lo thlen hma ngei pawhin.

[ Lettu: Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...