By Rick Warren
— June 9, 2022
“Nimahsela, tisaa nun hi ka chan ni sela, chu chu ka hnathawh rah ni ang sela, chutichuan, a eng nge ka thlan zâwk dâwn zawng ka hre lo. A lai laklawhah hian a ngaihna hre lovin ka awm mai a ni; kal chhuaha Krista hnêna awm châkna ka neih avângin, chu chu a ṭha zâwk êm êm si a. Nimahsela, nangmahni avângin tisaa awm reng hi a ṭûl zâwk a ni. Tin, chu chu ka rin tlat avângin ka awm reng dâwn tih ka hria, a ni, rinnaah chuan in lo ṭhan lenna tûrin in zaa hnênah ka awm reng dâwn tih ka hria.” [Philippi 1:22-25]
I buaina ni lova i damchhan leh tih tur chauh i ngaihtuah chuan lawmna i nei thei ṭhin, i nun chu buaina hrang hrangin a hual vel chang pawhin.
Rom khawpui tan ina Paula a tan lai khan putar a ni tawh. A in leh lo aṭanga hla tak a ni bawk. Tihhlum a hmabak a. A neih zawng zawng chhuhsak a ni – a ṭhian te, a zalenna, a rawngbawlna leh a mimal nun chenin, darkar 24 chhung ngawt tan in vengtute nen an phuar zawm a ni. Paula tan khan hun hlimawm tak a ni chiah lo.
Mahse, Paula nun aṭang khan an lak sawn theih miah loh a awm a; chu chu a damchhan kha a ni. Paula khan a damchhan kha a thlir lui fan fan ṭhin, thil dang zawng zawng a hloh vek hnuah pawh. Eng nge a damchhan chu? Mite kaltlanga Pathian rawngbawl a ni.
Philippi 1:22-25 ah chuan hetiang hian kan hmu, “Nimahsela, tisaa nun hi ka chan ni sela, chu chu ka hnathawh rah ni ang sela, chutichuan, a eng nge ka thlan zâwk dâwn zawng ka hre lo. A lai laklawhah hian a ngaihna hre lovin ka awm mai a ni; kal chhuaha Krista hnêna awm châkna ka neih avângin, chu chu a ṭha zâwk êm êm si a. Nimahsela, nangmahni avângin tisaa awm reng hi a ṭûl zâwk a ni. Tin, chu chu ka rin tlat avângin ka awm reng dâwn tih ka hria, a ni, rinnaah chuan in lo ṭhan lenna tûrin in zaa hnênah ka awm reng dâwn tih ka hria,” tiin.
Viktor Frankl-a thuziak “Mihringin a nun awmzia a zawnna” [ Man’s Search for Meaning] tih kha ka theihnghilh tawh ngai lo. Frankl-a chu Juda Psychiatrist niin Germany-a Nazi hovin tang ho an tihhlumna hmunah hruai a ni a. A chhungte leh ṭhian ṭha zawng zawngte chu boruak rimchhiaa hrai hlum leh tihhlum an ni. A lehkhabu phek pakhata a ziakah chuan ni khat chu Gestapo [German sipai a ruka thil chhui chi] hmaah chuan saruak ngalngatin a ding ran mai a. A tan in thawmhnaw leh a inneih zungbunte chu an khawm malh malh a. Chutianga an hmaa engmah nei lova a din lai chuan Nazi hoten an chhuhsak theih reng reng loh a thil neih chu a hre chhuak ta a: chu chu a duhthlanna a hman dan leh hun khirh tak a hmachhawn dan chu a ni.
Midangten i chunga an thiltih chu engmah i thlak danglam thei lo a. I kianga mite thiltih pawh i thlak thei hek lo. Mahse chutiang buaina i hmachhawn dan chu i thuneihna a ni thung.
Midangte rawng bawlsak rawh, nangmah i nat lai ngei pawhin. Ngaihdamna thlang bawk rawh. Pathian thutiam thlir tlat tumin i kiang vel thilte chu en kan ang che. Chutiang duhthlanna chuan rinna nasa zawk a neihtir che ang a. Tichuan, i rinna chuan lawmna nasa zawk a pe ang che.
Ngaihtuah zui atan.
I rinna innghahna kha i dam chhan thil a ni chiah em?
Eng vangin nge Pathianin midangte ngaihtuah a, an rawng bawlsak turin a duh che, hun harsa i paltlang lai pawhin?
I buaina emaw i damchhan emaw thlir i tum tlatna chuan engtin nge Pathian i rin dan a tarlan ṭhin?
*Pathian ngaihdamna changin Krista nena bul ṭan turin i inpeih em?*
Pathian chuan Isua ringtute tan chuan thiam loh channa reng a awm tawh lo tiin min tiam a. I sual laka tlan tur chein Isua chu a rawn tir a. Krawsa a thihna chuan i thil lo tihsual tawh zawng zawng leh i la tihsual nawn ṭhin turte chu a man a pe tlak tawh. Tichuan, i sualna atana halral thil hlana inhlan tur leh i felna ni turin Isua chuan Pathian, Pa nena inzawmna in neih leh theih dan tur kawng a dapsak ta che a ni.
Chu thu lawmawm chu chutah chuan a tawp mai lo. Pathian chuan Isua pawh thihna aṭangin a kai tho va, sual leh thihna hnehtu a nihzia a tarlang. Tichuan vanramah chatuana i chenpui theihna turin a buatsaih che a ni.
Isua Krista hnena i nun pumpui hlan tura i inpeih chuan he ṭawngṭaina holamte hian ṭawngṭai ang che: “Lalpa duh tak, misual ka ni tih ka hria a, i ngaihdamna ka rawn dil e. Isua Krista chu i fapa a ni tih ka pawm a. Ka sualna avanga thiin nunnaah i kaitho leh tih ka ring. Min chhandamtu atana pawm a, ka Lal ni turin ka zui duh e, vawiin aṭang ngei hian. Ka nun hi hruaiin i duh dan min zirtir ang che. Isua Krista hmingin ka dil e. Amen”
He ṭawngṭaina hi i hlan thei a nih chuan, he mailah hian Rick@PastorRick.com min lo bia ang che. Isua nena inzin kawng atana thuziak pawimawh tak tak lo thawn che ka duh a ni.
[ Lettu*: Peka]

No comments:
Post a Comment