Hlimna nun kawng
- Rick Warren
- June 27, 2022
"Hmu tawh reng inti ka ni lo va, famkim tawh reng inti pawh ka ni hek lo; 'Krista mi man chhan chu ka man thei dah law maw' tiin a umin ka um zawk a ni. Unaute u, manah ka inngai lo." (Philippi 3:12-13)
Mi inngaitlawm apiangte hi mi hlim theite an ni. Zir leh ṭhan an chawlhsan ngai lo.
Bible chuan heti hian a ti, "Rinnaah chuan in awm emaw, nangmahni ngei inchhin thin ula; nangmahni ngei in fiah thin rawh u. A nih loh leh, nangmahniah Isua Krista chu a awm tih nangmahni ngeiin in hre fiah lo vem ni? Duh loh in nih nghal loh chuan." (2 Kor. 13:5)
I infiah fo ṭhin em? Hei hi han tichhin teh: Zing i thawh apiangin heti hian Pathian hnenah zawt ṭhin rawh, "Vawiin hian engnge ka thawh tur ṭul le?" Hei hian inngaihtlawmna nun a keng tel, mahse chu chuan hlimnaah mi a hruai lut ṭhin.
Paula khan tlawmna nun neiha ṭhan len leh zir zel a pawimawhzia a hrechiang hle. Philippi 3:12-13ah chuan heti hian a ti, "Hmu tawh reng inti ka ni lo va, famkim tawh reng inti pawh ka ni hek lo; 'Krista mi man chhan chu ka man thei dah law maw' tiin a umin ka um zawk a ni. Unaute u, manah ka inngai lo."
Paulan helai thu a ziah lai hian Rome khuaah tan inah a tang mek a, kum lamah pawh a upat hnu lam a ni tawh bawk. Mi puitling tak a ni a. A hun hnuhnung lam a hmang ṭan mek a ni a. Mahse a hun a la thlen loh thu a sawi tlat. "Thlarau nunah thlen chin tur ka thleng e" tiin sawi thei dawn chu ni ila Thuthlung Thar bu tam zawk ziaktu Paula hi a ni ngei ang. Mahse Paula khan, "Ni lo, ka la thleng lo ve. Ka la ṭhang mek a, ka zir mek a ni, Krista ang zel turin" tiin a sawi a ni.
Paula nun entawna Krista anna kawnga kan ṭhan lenna daltu thang pakhat chu chapona hi a ni. Engvangin? A chhan chu engkim nei tawha i inngaih khan thlarau kawnga puitling turin ke i pen lo fo ṭhin. A lehlamah chuan, inngaihtlawmna hian hlimna a thlen ṭhin, zirtir theih i nih avangin.
Hlimna leh inngaihtlawmna hi an inkawp tlat, a chhan chu "Engtinnge kawppui ṭha zawk ka nih theih ang? Engtinnge ṭhian ṭha zawk ka nih theih ang? Engtinnge pu ṭha zawk ka nih theih ang? Engtinnge Isua zuitu ṭha zawk ka nih theih ang?" ti a mahni a inzawhtir theih che vang a ni.
Vawiin hian Sam 139:23-24 tih hmang hian tlawm taka ṭawngṭaiin hlimna turin ke pen rawh: "Aw Pathian, ngun takin min en chhuak la, ka thinlung hi hria ang che: Mi fiah la, ka ngaihtuahnate hi hria ang che: Tin, keimahah hian suahsualna kawng rêng rêng a awm nge awm lo en la, Chatuan kawngah chuan mi hruai ang che."
Ngaihtuah zui atan.
Nikumah khan engtinnge thlarau nunah i ṭhan len? I ṭhang a ni tih entir nan i nunah miten engnge an hmuh theih le?
Thlarau nuna i ṭhan lenna kawngah engvangin nge puitu tur chein i ṭhianzaho, pawl te tak tete anga kal ve bek bekte kha an pawimawh?
Engvangin nge zirtir theih mite hi an hlim bik?
[Lettu: Mapuia Fanai]

No comments:
Post a Comment