Wednesday, August 5, 2026

INDONA KARAH PAWH PATHIAN DAWHKANAH CHUAN CHAWL RAWH

_Pathian Thatna Hnuaia Len_

- Rick Warren
- August 5, 2026
"Mi dotute mit hmuhah ka hmaah hian dawhkan i buatsaih ṭhin a," Sam 23:5.

Lal Davida chuan rilru lama beih a tawhna te, a chanchin a chhe zawnga thehdarh a nihna te, taksa ngeia beih a nihna te a hre chiang hle a. Tlangval a nih laiin zawlnei Samuela chuan Israel lal atan hriak a thih a, mahse Saula chu a la lal reng a. Davida chu thah a tum ta a. Davida chu Saula laka biruin, ram pumah dik lo takin a chanchin an thehdarh a. Mahse Davida chuan a thungrul duh lo, a chhan chu Pathian thinlung ang pu mi a ni a, lal ni tura buatsaih mek a nih vang a ni.

Davida'n Pathian chungchang heti hian a sawi, "Mi dotute mit hmuhah ka hmaah hian dawhkan i buatsaih ṭhin a," a ti (Sam 23:5).

Davida hi a mangang hle niin a lang em? Lang lo ve. Amah a inven nan a tha zawng zawng a hman ral a ngai lo, a chhan chu amah veng tura Pathian a rin tlat vang a ni. 

Beihna i tawh lai te, miin an hriatthiam loh lai che leh i chanchin a chhe zawnga thehdarh a nih laiin Pathian ringa chawlh chu rinna leh inngaihtlawmna nasa tak ngai a ni. Chutiang a thlen chuan i chhunga awm zawng zawng hian eng emaw ti tura thawh chhuah a chak ṭhin. Nangmah beitute chu engtin nge i lo tih ṭhin? I tilet ve lo va. Pathian kutah i dah mai ṭhin a ni.

Pathian chu nangmah vengtu atan ring rawh.

Pathian hian nangmah venhim chauh a duh a ni lo va, nangmah nena inpawlna neih a duh a ni. The Message Bible chuan Sam 5:11-ah heti hian a ti: "Nangmah beltute erawh chu an hlim ang a, lawmin an au kumkhua dawn si a, anmahni chu i hum ang a, i hming ngainatute chuan an chhuang ang che," tiin.

Sam 23-na leh Sam 5-naah hian ruaiṭheh emaw, inkawm khawmna hun remchang lo takah hun ṭha chauh ni lovin, beih i tawh lai tak pawha buatsaih a nih thu a tarlang a ni. 

Tunah hian indona nasa tak karah i awm a nih chuan Pathianin a hria e. I hna te, i hriselna te, i rilru put hmang te emaw, i zahawmna atan te i bei a ni mai thei. Indona a kal mek lai hian Pathianin fuihna tlem tal pe tur chein ruai buatsaihsak che a duh a ni.

Pathian chuan  indona hmunah ruai buatsaih a duh a. Chutiang fuihna chu Isua hnena i manganna, i natna leh i thununna i hlana a thutiamah i chawlh chuan vawiin hian i tan a awm reng e.

Pathian fa i nih chuan i Pa vana mi chuan a chhuang hle che a ni. Sawiseltute chuan an hua, an hek, an ngaihthah, an nuihzat emaw dawtin an hek che pawh a ni mai thei, mahse  i chunga Pathian malsawmna awm chu an dang thei lo.

Bible chuan heti hian a sawi, "Ruai ṭheh inah chuan kei mi hruai a, ka chunga a puan zar chu hmangaihna," (Hla Thlan Khawmte 2:4), tiin. 

 Ngaihtuah zui atan

Tunah hian eng indonaah nge i awm mek? Eng dodalnain nge en reng che?

Pathian hnena i invenna hlan turin eng thil nge i thlah ngai ang?

Indo laia chawlh chuan engtin nge ṭha zawka bei turin a puih che?

[ *Lettu: Marova Punte* ]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...