Wednesday, July 8, 2026

MANGANNA TIHREH DAN

_Pathian Ṭhatna Hnuaia Len_

- Rick Warren
- July 8, 2026
_"Chuvangin, ka hrilh a che u, 'Eng nge ka ei anga, eng nge ka in ang aw?' tiin in nunna thu leh, 'Eng nge ka silhin ka fen ang aw?' tiin in taksa thu lungkham suh u. Ei tur aiin nunna a thupui zawk lo vem ni? Silhfen aiin taksa pawh a thupui zawk lo vem ni?" Matthaia 6:25._

Pathian hi i nunna atana i mamawh zawng zawng lo chhuahna bulpui a ni a. Ani chu Beram Vengtu Ṭha tak, chaw pe a, hruai a, i mamawh phuhruksak ṭhintu che a ni. Khawiah mah i zawn buai a ngai lo. Kawtthler lama i zawn kual a ngai lo va. Sawrkar lam i thlir a ngai lo va. I nupui/pasal te, i pension sum emaw, i hna lam emaw i thlir a ngai lo.

I himna tur eng emaw thila i innghat dawn a nih chuan, laksak theih miah loh thilah i innghat tur a ni. I hriselna i hloh thei a. I hna i hloh thei. I hmel ṭhatna i hloh thei. I chhungkua i hloh thei. I nunna i hloh thei. I rilru fim pawh i hloh thei a. I kawng pawh i bo thei.

Mahse Pathian chu a bo ve ngai lo. I mamawh engpawh, Pathianin a pek theih loh che engmah a awm lo. Philippi 4:19 chuan, "Ka Pathian chuan Krista Isuaa a ropuina ngahzia ang zelin, in tlakchhamna tinreng pawh a phuhruksak ang che u," a ti.

Chuti a nih chuan eng vangin nge mi hi an mangan em em mai ṭhin le? Manganna hi khawvela sual tlanglawn ber a ni mai thei. Pathian chu engtiklai pawhin a ṭha reng tih kan theihnghilh rah a ni. Pathian ṭhatna i theihnghilh chuan ṭawngṭai aiin i buai phili a, amah chibai buk aiin i mangang zawk ṭhin.

Bible chuan, "Chuvangin, ka hrilh a che u, 'Eng nge ka ei anga, eng nge ka in ang aw?' tiin in nunna thu leh, 'Eng nge ka silhin ka fen ang aw?' tiin in taksa thu lungkham suh u. Ei tur aiin nunna a thupui zawk lo vem ni? Silhfen aiin taksa pawh a thupui zawk lo vem ni?" Matthaia 6:25 a ti.

Chiang takin, Pathian chuan engmah ngaihtuah buai lo turin a duh che. Mahse manganna hi sim a har a. Mihring zia ve reng a ni.

Chuti a nih chuan engtin nge mangan hi i bansan ang? Ni lo la awm leh turah Pathian Thuin manganna chungchang a sawi dan kan en ho dawn nia. Mahse, a hmasa berin manganna hian Pathian ṭhatna dawng turin a dâl che tih i hre dawn nia. A thunun che i phal tur a ni lo tiin thutlukna siam rawh. I manganna chu ngaihtuah reng lovin, Pathian hnenah hlân zawk rawh. Manganna tihtawp dan ṭha ber chu ṭawngṭai ṭan nghal hi a ni.

Hei hi hre reng rawh: Pathianin enkawl tura a lo tiam tawh chu phurh i tum ve kher a ngai lo. I mamawh engkim lo chhuahna bul a ni tih pawm la, heti hian ṭawngṭai rawh: "Lalpa chu mi vengtu a ni a, ka tlachham lovang," (Sam 23:1) tiin.

Ngaihtuah zui atan

Manganna hian taksaah engtin nge a nghawng che a? Rilru lamah emaw Thlarau lamah engtin nge a nghawng che?

Eng vangin nge Pathian chibai buk hian manganna a tihreh?

Tunah hian i manganna kha ṭawngṭaina hmangin Pathian hnenah hlân rawh. I ṭawngṭai laiin i thinlunga danglamna i tawh dan kha ngaihtuah zui ang che.

[Lettu: Marova Punte]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...