Sunday, June 28, 2026

SAWI FELNA LAM AIIN INREM LEHNA DAH PAWIMAWH ZAWK RAWH

_Malsawm Nih Theihna Kawng_

- Rick Warren 
- June 28, 2026
_"Nimahsela, engkim hi Pathian hnên ata chhuak a ni a; ani chuan Krista avângin amah nên inremin min siam a, inremna rawngbâwl hna min pe a. Khatia, Pathianin Kristaah chuan khawvêl hi amah nên inrema a siama, an bawhchhiatnate chu bawhchhiatnaa ruatsak lova, inremna thu min kawltîr kha."_ (2 Kor. 5:18-19).

Innghirnghona avanga inlaichinna chhe tawh siamṭhat i duh chuan sawi fel tumna lam aiin inrem lehna i dah pawimawh a ngai.

Heng thil pahnihte inkar hi zau tak a ni.

Inrem lehna kan tih chuan inlaichinna siamṭhat lehna a kawk. I kawppui hlui kha i nei leh ang tihna lam a kawk lo; in inremtawn tihna a ni zawk.

Sawi felna chuan kan thu inhmu lohna zawng zawng sawi fel tumna a kawk a - chu chu a thleng ngai lovang. Thudik tak chu, nupa inkarah, ṭhian inkarah, thawhpuite nen kan inkarah kan pawmtlan theih loh tur thil a awm reng dawn - mi hrang kan nih tlat avangin. Mahse inpawm thei lo ni miah si lovin kan inpawm lo thei. Chu chu puitlinna kan tih chu a ni a. Chu chu finna chu a ni a. Chu chu Krista anna kan tih chu a ni.

Inantlan vekna tel lo pawhin inlungrualna kan nei thei. Duh dan inang vek lo chung pawhin ke kan pen rual thei. Ka nupui, Kay-i nen hian kum tam tak kan innei tawh, thil tam takah kan duhdan a inang vek bik lo. Mahse ke kan pen ruala kan inchhawm dawl ṭha em em a. Kan inrem em em a ni.

Nupa kan kawm ṭhin aṭangin hengte hi kan zir chhuak: Inlaichinna siamṭha leh tura ke inpenin kan thu inchuh kha thil pawimawh ber an ni tawh ṭhin lo. In inhnialna nasa tak takte kha engzat chiah nge thil te takte avang anih? Thil te tak te avangin kan inhmu thiam lo ṭhin, mahse a takah chuan khang thil kha kan inhauh chhan a lo ni miah lo - thil lian zawk a awm ṭhin. Thil te tak te chunga inlungrual tum lovin, in inlaichinnaa in let leh a ngai zawk. 

Kan chheh velah indona tam tak a awm a. Kan chenna khawvel hi inṭhenna, inhnialn, huatna, chi inthliarna leh lam ṭang zawnnain a khat a ni ber. Chung chuan inlaichinna a tichhe ta ṭhin a ni. Ei leh bara tlak chhiatna, sorkar keh chhiatna, inneihna keh chhiatna, nun keh chhiatna leh thinlung keh chhiatna kan tawk tam hle.

He khawvel, indona hrang karah hian ringtu i nihna angin inrem lehna thu puangtu ni turin ka cho duh che. Mite pawt ṭhentu ni lovin inrem lehtirtu nih tum rawh.

2 Kor. 5:18-19 ah chuan heti hian kan hmu, _"Nimahsela, engkim hi Pathian hnên ata chhuak a ni a; ani chuan Krista avângin amah nên inremin min siam a, inremna rawngbâwl hna min pe a. Khatia, Pathianin Kristaah chuan khawvêl hi amah nên inrema a siama, an bawhchhiatnate chu bawhchhiatnaa ruatsak lova, inremna thu min kawltîr kha."_ 

Isua zuitu i nih chuan inrem lehna rawngbawlna hna i kutah a awm. Kal chhuakin mite hnenah hetianga puang tura koh i ni, "Pathianin amah nen inlaichinna in neih leh theihna turin engkim a ti tawh. I sual man a pe tawh a. A hmelma i nih a ṭul lo. Nangmah kha a ngai pawimawh che a ni."

Pathian nen inrem rawh u. Pathian nen inrem rawh. Chu remna chu mite hnenah tlangaupui rawh.

Ngaihtuah zui atan.

Tu emaw nena in inlaichinnaah khan engah nge in inrem loh a, chu inrem lohna chu i la tihfel loh le?

Chu inrem lohna chu chin fel tum lam ai maha inrem lehna turin eng kawngah nge ke i pen ang?

Engtinnge in chhungkuaah, hnathawhna hmunah, khawtlangah inrem lehna hna i thawh theih ang?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...