_Malsawmna Nih Theihna Kawng_
- Rick Warren
- June 14, 2026
_"Hmeichhe khawngaihna zawldawh tak nei mi chuan zah a hlawh ṭhin."_ (Thufingte 11:16, MSG)
Hruaitu ni tur chuan zawldawhna neih hmasak ngei ngei a ngai. Hruaitu nih i duhna chu khawiah pawh ni se - kohhran, sorkar, sumdawnna, in, sikul emaw khawtlanga pawlh emaw pawh nise zawldawhna i neih hmasak a ngai.
The Message chuan Thufingte 11:16 thu hetiang hian a letling, _"Hmeichhe khawngaihna zawldawh tak nei mi chuan zah a hlawh ṭhin."_ - hei hi mipa tan pawh a ni. Zawldawhna chuan zahna a keng tel ṭhin, zahna a awm loh chuan tumah hruaitu an ni thei tak tak lo.
Isua kha "thinlunga zawldawh leh inngaitlawm tak" a ni (Matthaia 11:9). Kawng engkimah mi chak a ni. Hruaitu chapote ngawihtirin biak ina dawhkan te pawh a nam tlu rum rum thei. Mahse a thin a ram lo. A theihna te a thunun vek. Mi zawldawh tak a ni.
Isua tih lohah chuan Mosia kha Bible-a mi inngaitlawm tak kan hmuh tlemte zinga mi a ni - a tlawmna khan zawldawhna a entir.
Mosia kha hruaitu chak tak a ni tih i ring ngei ang. A hun laia mi thiltithei ber Pharoa kha hnehin Pathian mite chhuah zalentir turin a ti thei. Mosia khan Pathian lo chu engmah neih a nei lo - mahse chu chu a tawk em em si. Mahse Mosia khan hruaitu anih hmain zawldawhna nun a lo nei tawh.
Mosia chungchang kan Bible chuan heti hian a sawi: _"Mosia chu lei chunga mi zawng zawng aia mi inngaitlawm (zawldawh, ngilnei, fel lohna reng nei lo) a ni"_ (Numbers 12:3, AMP).
Mahse Mosia khan zawldawihna kha a pianpui niin a lang bik lo. A thin ramna te, thinchhiatna te leh a thunun zawh loh ṭhinna te kha a nuna sual bet ve reng niin a lang.
Ṭum khat chu Mosia kha a thin a rim em avangin Aigupta mi a that a. Ṭum dang lehah chuan tlang aṭangin Pathianin Thupek Sawm a pek kenga a rawn chhuk khan Hebrai mite khan milim chibai an lo buk a. A thinrim a so sang thut a Thupek Sawm ziahna lung kha a vawm keh a ni tih kan hmu. Tin, a thinrimna avangin ramtiamah a lut thei ta lo bawk.
Chutiang anih chun engtinnge mi thin ram tak mai kha Bible-in Isua tih lohah mi zawldawh tak a ni a tih theih? A chhan chu Mosia kha zirtir theih a nih vang a ni. Miin a nuna thlak danglam ngai lai an hrilh khan a lo thinrimpui miah lo. Inzir nan a hmang hlauh thung.
A zawldawh a. Chu chuan zahna a hlawhtir a. Chu zahawmna chuan hruaitu ṭhaah a siam a ni.
Mosia ang khan thinrimna hi i sual a ni ve mai thei. I inpe hma lutuk emaw, i dawh thei lo emaw, i thatchhia emaw pawh a ni thei. Engpawh sual la, zawldawh leh zirtir theih nih tum rawh. Chu zawldawhna chuan mite zah nih a hlawhtir ang che.
Ngaihtuah zui atan.
Hruaitu zawldawh deuh hriat i nei em.?
Zawldawhna hi faktlak niin i hria em? Engvangin?
Zirtir theih tih hi engnge a awmzia? I nun engah nge zirtir theih ni turin Pathian i dil ang?
[Lettu: Mapuia Fanai]
No comments:
Post a Comment