_Pathian tan hian enganga pawimawh nge i nih_
By Rick Warren
— December 30, 2025
“Chawngzawng panga dar tangka pahnihah an hralh ṭhin lo vem ni? nimahsela an zinga pakhat mah Pathianin a hmaih ngai si lo. In samzaite lam pawh hi chhiar vek a ni asin. Hlau suh u; chawngzawng tam tak aiin in hlu zawk a ni..” Luka 12:6-7
Pawimawhna nei lo hlein inhre mah la, Isuan a hrereng che tih lo chiang hle ang che.
Zakaia kha pa hausa tak a ni a, nimahsela khawhar takin a awm a ni. Pa tawi tak anih avang khan miin an nuihzat deuh ṭhin pawh a ni maithei e. Chhiahkhawntu a ni leh zel a, chuvang chuan mi zawng zawngin an hua a ni.
An khuaah Isua a lo kal tih a hriat khan, Zakaia chuan hmuh ve a duh a. Nimahsela harsatna pakhat a awm a. Mipui tam tak an lo pungkhawm a, Zakaia kha a tawi em avangin a hmu ve thei lo a ni.
Mi zahawm tak nimahsela Zakaia chuan thil zahpuiawm tak tak pahnih a ti a. Pakhatnaah chuan, mi zawng zawng a tlanpel a, thingah a lawn a ni. A hun laia mite ngaihdan turah a buai lo. Isua hmuh kha a duh ber chu a ni.
Isuan Zakaia lawnna thing awmna hmun a thlen chuan thil mak lehzual a rawn ti ve leh tlat mai. Bible chuan, “Isua chu, chu mi hmun a thlen chuan a dak a.” (Luka 19:5).
Mipui tam tak zingah Isua chu a chawl lawk a, Zakaia lamah chuan a rilru a pe tlat a ni.
Zakaia lungphu ran tur zia chu i ngaihtuah em? Isua hmel hmuh mai chauh kha a beisei a ni a. Nimahsela Isua chuan ding meuhin Zakaia chu a lo ko ta si a. Ama nun ngei pawh inngaihsak hlei thei lo kha Isuan a lo ngaihsak em em ta si a ni.
Tunah hian engnge i paltlang mek ka hre lo. Sum leh paiah chuan awm thei pawh ni la. Inlaichinna kawngah i buai maithei. Thlarau lamah phei chuan chaklo tak pawh i ni maithei e. Tumahin i dinhmun chu an hre lo a ni.
Nimahsela Isuan i awmna a hria a, i lamah a rilru a pe a. A hrereng che a ni. Engtiklai mahin a mit ala sawn ngai lo a ni.
Bible chuan, “Chawngzawng panga dar tangka pahnihah an hralh ṭhin lo vem ni? nimahsela an zinga pakhat mah Pathianin a hmaih ngai si lo. In samzaite lam pawh hi chhiar vek a ni asin. Hlau suh u; chawngzawng tam tak aiin in hlu zawk a.” (Luka 12:6-7).
Tunah khan khawharin i inhria em? I khawhar lo! Pathian chu hla takah a awm lo. Nangmah ngaihtuahin i kiang hnaiah a awm reng a ni. I pawimawh avangin Pathianin a ngaihtuah che a ni.
Ngaihtuah zui atan
* An hmangaihna an tihlanna kawngah engtiangin nge miin i lamah chet an lak?
* I thlarau lam nun ṭhanlenna chu Pathian hmaa i inrintawk theihna tur leh a chenchilhna i chan zel theihnan engtinnge hma i sawn theih ang?
* Pathianin i engkim a ngaihtuahin i ring em? Chu chuan amah nena in inkungkaihna engtinnge a tih danglam?
*[Lettu: Sangpuia]*
No comments:
Post a Comment