Saturday, December 13, 2025

PATHIAN CHUAN ENG LAI PAWHIN I CHUNGAH KHAWNGAIHNA A LANTIR

_Thlirna Thlak Danglam_

- Rick Warren 
- December 13, 2025
_"Kan Pathian min Chhandamtu chuan kan chungah a zahngaihna leh hmangaihna a lantir lai khan thil ṭha kan tih vang ni lovin a khawngaihna avang zawkin min chhandam a. Kan sualte tleng faiin, Thlarau Thianghlim kaltlangin pianna thar leh nunna thar min lo pe a ni." _ (Tita 3:4-5, NLT)

I paltlang mek chu engpawh nise beiseina nen i nung thei ang. Chu chu Bible-in chanchin duhawm min pek chu a ni.

Petera lehkhathawn pakhatna bung khatnaah khan beiseina nena i nun theihna tur chhan panga i hmu ang. Nimin khan a chhan hmasa ber kan zir: *Pathian i thlan hmain aman a thlang che.*

Vawiin chuan a chhan pahnihna kan zir ang: *Pathianin khawngaihna leh lainatnain a enkawl ṭhin che.*

Petera khan ringtu ni tawhte hnenah heti hian a ziak a, _"Kan Lalpa Isua Krista Pathian leh Pa chu fakin awm rawh se. Ani chuan a khawngaihna nasa tak ang zelin, mitthi zing ata Isua Krista thawhlehna avangin beiseina nung hmu turin min hring leh a."_ (1 Petera 1:3)

Petera khan Pathian chu khawngaihna nei mi a ni mai lo - Pathian chu a *khawngaihna nasa tak* avangin a fak a ni.

Pathian khawngaihna leh lainatna i hriatchian poh leh Petera ang khan mak i ti zual sauh ang. Kan phu hauh loh a ni a. A hlutna kan ban phak hauh loh a ni. I thawh chhuah theih emaw i hlawh chhuah theih thil emaw a ni lo. Thil thlawn pek a ni.

Pathian khawngaihna chu a hmangaihnaah che a innghat. Tuna a hmangaihna aia nasa khan i inhmangaihtir thei tawh lo a. Tuna aia tlem khan i inhmangaihtir thei hek lo. A awmzia chu a khawngaihna che a danglam ngai lo tihna a ni.

Pathian thu, Bible chuan heti hian a ti, _"Kan Pathian min Chhandamtu chuan kan chungah a zahngaihna leh hmangaihna a lantir lai khan thil ṭha kan tih vang ni lovin a khawngaihna avang zawkin min chhandam a. Kan sualte tleng faiin, Thlarau Thianghlim kaltlangin pianna thar leh nunna thar min lo pe a ni."_ (Tita 3:4-5, NLT)

Hei hi hriatthiam a ṭul lutuk. Ringtu i nihna zawna thil i tihsualin i chungah Pathian a buai lo. Siamṭhat nghal che a tum lo a, i nun chawh buai tumin ke a pen nghal lo.

Heti hian Pathianin a ti: I chungah khawngaihna a lantir ṭhin. Engvangin? Isua Chhandamtu a i pawm rual khan Isua Krista thisena hliah khuh i nih tlat tawh avangin.

I buai apiangin Krista avangin Pathianin khawngaihnain a thlir ṭhin che. Chu chuan beiseina a pe thei che a ni.

Ngaihtuah zui atan.

Engvangin nge mi tam tak tan Pathian khawngaihna leh lainatna hi pawm a harsat i rin?

Pathian hmangaihna tiam chin nei lo i hre fo a. Mahse engtinnge Pathian khawngaihna pawh hi tiam chin awm lo a ni tih i hriat?

I hmelhriat tunge Pathian khawngaihna leh lainatna hriattir ngai? Tunkar chhung hian hnenah chu thu chu engtinnge i tlangaupui theih ang?

*Chhandam i nih nan Isua i ring tawh em?*

Bible chuan a Fapa Isua Krista i rin chauhin vanram i lut thei tih min hrilh. Pathian hmangaihna leh vanram hi thawh hlawh chi a ni lo. Bible chuan heti hian a ti, _"Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e."_ (Ephesi 2:8-9)

Isua ringin a hnenah i la inpe lo anih chuan nghak khaw tlai tawh lo la. Heti hian ṭawngṭai rawh le:

"Isu, ka sualte i hmaa ka puana nang ka rin che chuan chhandam ka ni ang a, vanramah i hnenah ka chen ve tur thu min tiam a. Vawiin hian ka sualte puangin ka Chhandamtu i ni tih ka pawm e. Chhandamna hi ka thiltih vang ni lovin rinna avanga khawngaihnaa lo thleng a ni tih ka pawm e.

"Isu, i hmangaihnaah hahdam ka duh a. Ka thawh chhuah emaw ka lei emaw a ngaih loh avangin ka lawm e. I tan ka inhlan a, i chhungkuaah min lo pawm ve ang che. I hmingin ka dil e, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...