Sunday, December 21, 2025

PATHIAN BE PAWP TURA PHALNA PEK RENG I NI

_Thlirna Thlak Danglam_

- Rick Warren 
- December 21, 2025
_"Chu Krista Isua kan rin avang chuan zalen tak leh ngam taka Pathian hnen luh theihna kan nei."_ (Ephesi 3:12, NIV)

Isua chhandamtua i pawm chuan zalenna ropui tak pathum a pe che. A hmasa ber chu hriatna thiang tak a ni a. I sual a ngaidam che a i thiam lohna a nawt reh a ni.

Zalenna pahnihna chu mahnia Pathian hnen thlen theihna a ni. A chhungkaw zinga mi a fa i ni a, engtik lai pawhin khawi hmunah pawh - ni khata darkar 24 chhung, kar khata ni 7 chhung, amah i be thei.

Khawvel pumpui hian Pathian hnen thlen theihna a nei tih hi ngaihruatna mai a ni. A dik lo a ni! Pathian a Fapa Isua Krista kaltlang chauha a hnen thlen theihna min pe.

Bible chuan heti hian a ti, _"Chu Krista Isua kan rin avang chuan zalen tak leh ngam taka Pathian hnen luh theihna kan nei."_ (Ephesi 3:12, NIV)

Concert-naa duh hun huna luh theihna "phalna" min pek ṭum ka nei tawh a. Dawhsan phena mite hnenah va kalin duh duh kha ka be thei a, tuma'n min dang thei lo!

Chutiang zalenna chu Pathian chhungte zinga i tel huna i neih tur a ni. Pathianin englai pawha a hnen thlen theihna tur a pe che. Sawmna emaw inhriattirna emaw i neih a ngai lo. A chhan chu a fa i ni a, nilengin, nitin, englai pawhin a hnen thlen theihna i nei.

A chang chuan miten, "Pu Rick, khawngaihin min ṭawngṭaisak rawh" an ti ang, anni aia ka ṭawngṭaina a ṭhat zawk an rin vang a ni mahna. Keimah ang thoin Pathian biak pawh theihna an nei. Engtik lai pawhin, eng vang pawhin Pathian an be thei a ni.

Ṭawngkam thiam a ngai lo a, i lu i kun emaw, lirthei khalh lai i tihdin emaw, hnathawh lai i chawlh emaw a ngai kher lo. Nilengin i ṭawngṭai zawm zat thei, i tawpnaah i chhunzawm leh mai anga. Chutiang chuan Pathian ka be fo.

_"Pathian lalṭhuttleng hmaah zalen takin kan kal thei. Kan mamawh hun apiangin khawngaihna leh zahngaihna kan dawng thei,"_ (Hebrai 4:16) hi zalenna ropui a va ni em. 

Pathian chhungte zinga i lo telin hriatna fiah tak leh mahnia Pathian biak theihna zalenna pek i ni. Naktukah zalenna pathumna: thil ṭha tih theihna, tih kan zir ang.

Ngaihtuah zui atan.

Ṭawngṭai kaltlanga Pathian duh duh huna i biak theihna kha engin nge dal?

Engtinnge i ṭawngṭaina i tihkhirhkhan?

Nilenga Pathian i biakin eng thil nge i sawi theih ang? 

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...