_Isua Tih Danin_
- Rick Warren
- November 12, 2025
_"Nimahsela, ani chu thlalerahte a kal hrang a, a ṭawngṭai ṭhin a,"_ Luka 5:16.
Tunlai khawvel innawr tawtna leh rilru hahna khawvelah hian ṭawngṭai hi thlarau lama tawtna laka sûtna pindan a ni.
Chu chu Isuan a hria. Chanchin Ṭha i chhiar chuan, ni tina rilru hahna chhawk zangkhaina atan ṭawngṭai turin Isua chu a kal sawn daih ṭhin. Marka 1:35-ah chuan, "Tin, zingah khawvar hma daihin a tho va, a chhuak a, thlaler hmunah a va kal a, chutah chuan a ṭawngṭai a," a ti.
Châng dang hian hei hi Isua tih ṭhin dan a ni tih a tilang: "Nimahsela, a chanchin thu chu a thang lehzual sauh va, mipui tam tak a thu hriat duh leh an nâte tihdam duhin an rawn inkhawm chiam a. Nimahsela, ani chu thlalerahte a kal hrang a, a ṭawngṭai ṭhin a," (Luka 5;15-16).
Isuan ṭawngṭai ṭul a ti a, Pathian bula awm a duh a nih chuan, eng ang taka tam nge nangin hun i mamawh ang? "Ṭawngṭai tam turin ka buai lutuk," i ti a ni maithei. Thudik tak chu, Pathianin a chhun khah theihna tur che a hun i pek loh chuan mi dangte hnenah engmah pek tur i nei lovang.
Bible chuan, "Ngawi ula, Pathian ka ni tih hi hre rawh u," (Sam 46:10) a ti. Tih ṭhana, Pathian nena fianriala inpawlna hun i hman chuan a chhûng khatin, a tinung thar che ang a, a siam ṭha leh dawn che a ni. I buai nasat poh leh hetiang hun hi i mamawh a ni.
I nuna hmun âwl chu Pathian aw ngaihthlak nan engtin nge i han siam ang?
A hmasa berah chuan, hun eng emaw chen chu i ngawih a ngai a ni. Pâwn hmun khawilai emaw, a nih loh leh inchhung kil sir khawi lai emaw zawng la. Tichuan ṭhu la, "Aw, Lalpa ka hnenah sawi duh i nei em?" tiin zawt rawh. Ngawi rengin awm la, ngaithla ang che.
Pathian chuan i rilruah ngaihdan a pe maithei che a. A nih loh pawhin chawplehchilhin Pathian Thu chhiar turin a ti maithei che a ni.
Thil eng emaw vanga i mangan avangin ṭawngṭai laia ding taka ngaihtuah i harsat maithei. I manganna ngaihtuah reng ai chuan, a Thu hmangin i harsatnaah Pathianin hruai zawk che sela, tichuan Pathian Thu chu i ngaihtuah chhunzawm dawn nia.
Pathianin biak che a duh a. Ni tina i buaina kha dah ṭha a, amah ngaihthlakna hun insiam turin a duh che a ni.
Ngaihtuah chhunzawm atan.
I buai deuh hun a lo thlenin Pathian tan hun i pe tam zawk nge i pe tlem zawk?
Eng thilin nge i rilru tibuai? I buaina laka pui thei tur che Pathian Thu chu eng nge ni ang?
Tunkar chhung hian calendar kha han en la. Pathian nena inpawlna hun i neih chhinchhiah a awm loh chuan, tunah khan i hun kha lo zuah rawh le.
[ *Lettu: Marova Punte* ]
No comments:
Post a Comment