_Isua Tih Danin_
- Rick Warren
- November 02, 2025
_"In chunga ka tih ang hian nangni pawhin in tih vena turin ka tihhmuh che u a ni si a."_ (Johana 13:15)
Isuan amah zuitute hnenah heti hian a sawi: _"In chunga ka tih ang hian nangni pawhin in tih vena turin ka tihhmuh che u a ni si a."_ (Johana 13:15). Nang pawh Isua zuitu i nih chuan chu chu i tih dan tur a ni.
Nimina kan thuzirah khan Luka 14:18-19 kan en a, Isuan mi chi nga a ṭanpuite kan zirho: mi rethei, thinlung kehchhia, tan ina tang, mitdelte leh rahbeha awm te.
Isuan heng mite chanchin hi i ngaihven a duh a, anmahni i ngaihsak a duh bawk. Isuan midang a ngaihsak dan kawng panga te kan tarlang ang a. Nang pawh hetianga ti tur hian a duh che.
A hmasa berah chuan chanchin ṭha hril rawh. Eng dang zawng aia Pathianin a duh chu mite hnena an harsatna zawng zawng chhanna chu Isua a ni tih i hrilh hi a ni. Pathian siam an ni a, an tan Isua a thi a, anmahniah Thlarau Thianghlim a cheng a ni- Pathianin ngaihdamna, dam chhan leh vana chenna turin a buatsaih a ni tih an hriat nan. He thu hi a mal malin hrilh la, biak inah hruai tum la, in ṭhianho zingah hruai lut rawh.
Pahnihnaah chuan thinlung keh chhiate thlamuan rawh. Hliam tuarte hi i kiang velah tam tak an awm. Tute pawh hian midangin min hmuhpui emaw hmuhpui lo emaw natna kan nei ṭheuh. A chang chuan hliam tuarte zawn chhuah dan ṭha ber chu midangte hliamtu kan zawn hi a ni; hliam tuar chuan midang a hliam ṭhin tlat. Tichuan an chunga hmangaihna lantir dan tur zawng la ṭawngṭainain an nun dawmkang rawh.
Pathumnaah chuan, tan ina tangte hnenah zalenna thu puang rawh. Tan ina tang reng ṭhin kha i hre lo a ni mai thei, mahse eng bawih emawa awk chu kan hre vek ṭhin- chin ṭhan ṭha lo bawiha tang te, taksa hrisel lohna bawiha tang te, sum leh pai indaih lohnaa tang te, thuruk hlui laka tangte nen. Pathianin an zalenna turin a thutak i hriattir a duh a ni: _"Thutak chuan bawih a ban ang che u."_ (Johana 8:32)
Palinaah chuan, mitdilte hnenah mitvarna thu tlangaupui rawh. Hetah hian Isua thlarau lama mitdelna leh inlaichinna lama mitdelna a sawi. I hmangaih khan thil a tisual i hmuhin i lo buai vena tur a ni lo i ti a ni mai thei. Mahse i ngaihsak chuan i tihtur a ni. Bible aṭangin thutak i kawhhmuh thei a, an mamawh thutak an hriat nan kawng i kawhhmuh thei bawk.
Panganaah chuan, rahbeha awmte chhuah zalen rawh. Tute nge rahbeha awmte chu? Mi kawng hrang hranga hnuh kual hnuh kuala awmte hi an ni. Mimal rahbeh tawk te kan hria a, pawlho hetiang anga rahbeh tawkte pawh kan hre bawk. Rahbeh tawkte hnuchhawn lova anmahni hmachhawn a i ngaihsak kha Isua duhzawng a ni.
Isuan a ngaihsakzawngte i ngaihsak hian amah i ngaihsak a ni tih Isuan a sawi kha hre reng rawh!
_"'Ka ril a ṭamin nangnin ei tur mi pe a; ka tui a halin in tur mi pe a; mikhual ka nihin mi thleng a; saruak ka nihin puan mi sintir a; ka dam lohvin mi kan a; tan ina ka awmin ka hnenah in lo kal si a," a la ti ang' . . . Tin, Lalber chuan an hnenah, ‘Tih tak meuhvin ka hrilh a che u, heng ka unau te berte zinga mi pakhat chunga in tih chu ka chunga ti in ni,’ tiin a la chhang ang."_ (Mat. 25:35-36, 40)
Ngaihtuah zui atan.
Tute nge ni an chungchang i ngaihven a mahse i ngaihsak miah loh? Chung mite i ngaihsak theih dan kawng khat engnge?
Isuan hliam tuarte i ngaihsakin amah i ngaihsak ang a ni a ti a. He thudik eng danglamna nge a siam che?
Engtik laiin nge i ringtupuiin a ngaihsak che,- i thinlung a keh chhiat laiin nge thlarau lama i mit a del laiin?
[Lettu: Mapuia Fanai]
No comments:
Post a Comment