_Isua Tih Danin_
- Rick Warren
- November 08, 2025
_"Mahni ta ta mai en lovin, mi dang ta pawh en theuh zawk rawh u."_ (Philippi 2:4)
Midangte nen inzawmna ṭha tak neih i duh chuan i mamawh buaipui hmasa lovin an mamawh buaipui hmasa rawh. I natna ni lovin an natna ngaihsak hmasa la. I duhzawng ni lovin an duhzawng ngaihtuah hmasa rawh. Chinese thufing chuan heti hian a ti: "Hriatthiam nih i duh hmain hriatthiam hmasak tum rawh."
Bible pawhin chutiang chiah chuan a sawi. Miin i dinhmun an hriat i duhna aiin midangte i ngaihsak hmasak a ṭul. Hriatthiam hmasak i tum ang. Chu chu inzawmna hmasa ber i siam dan tur a ni.
Philippi 2:4-ah chuan heti hian kan hmu, _"Mahni ta ta mai en lovin, mi dang ta pawh en theuh zawk rawh u."_
Hei hi kan khawvel kalphung nen a inperhsan hlauh. Kan pian tirh aṭangin kan seilenna khawvelin min zirtir chu mahni chauh inngaihtuah turin a ni.
Hringnun chungchangah hian thudik pahnih a awm. A hmasa zawkah chuan khawvel hi nangmah helin a vir kual lo (pawimawh berah a nei lo che tihna). A ṭhawng viau ang che tih ka hria! Pathian mitah chuan mi bik i ni thung. Chhan neia siam i ni a. Mahse khawvelin a ngaih pawimawh ber i ni lo.
A pahnihna chu: midangte mamawh phuhru hmasa tura i rilru i pek chuan i mamawh a pe ang che. I mamawhte neih i duh chuan midangte mamawh pek hmasa tum rawh. Engvangin? A chhan chu Pathianin mahni hmasial loh i zir a duh. Amah anga midangte hmangaiha thil phal i zir a duh a ni.
Matthaia 6:33-ah chuan heti hian kan hmu, _"A ram leh a felna chu zawng hmasa zawk rawh u. Tichuan chung zawng zawng chu a pek belh chhah dawn che u nia."_
Pathian ram tana i nun chuan a ngaih pawimawhte i dah hmasa ber ang - chu chu midangte an ni. Mahni inngaihtuah lovin midangte ngaihtuah hmasa la, an mamawhzawng ngaihtuah hmasa rawh. Chu chu Isuan midangte a en dan a ni, Isua khan Pathian ram a ngaihtuah a ni.
Inzawmna hi ngaihthlak, zir leh Isua anga hmangaihah hian a inṭan a ni.
Ngaihtuah zui atan.
Engin nge midangte ngaithla thei tura pui ṭhin?
Midangte ngaih pawimawh tih hian mahni mamawh ngaihthah tur tihna a ni em? Engvangin?
I nunkawng engah ber nge Pathianin a pek che i mamawh? Chumi kawngah chuan engtinnge midangte i puih theih ang?
[Lettu: Mapuia Fanai]
No comments:
Post a Comment