Thursday, November 20, 2025

I SUM HMAN DAN ṬHA BER

_Sum Enkawltu Fing Aṭanga Zir Tur_

By Rick Warren
— November 20, 2025
““Ka hrilh a che u, khawvêl sum lem hian in tân ṭhian siam rawh u; sum a ral hnuah chatuan rama lawm luh in ni thei ang.” [Luka 16:9]

Sum hi hmanrua a ni a – hmanrua chu hman tur an ni. Isua ngei pawh khan, “Khawvêl sum lem hian in tân ṭhian siam rawh u,” a ti hial a nih kha. 

A ṭawngkam hman hi han ennawn leh ngat teh u: “siam.” Isua chuan sum hmangaih tur emaw khawlkhawm tur emaw chibai buk turin a ti lo che u. Hmang turin a ti che u. 

Pathianin pawisa a pek che u hman dan ṭha ber chu eng nge ni ta ang? I rosum neih ral mai theite chu chatuan daih atan hmang ang che. Ṭawngkam danga kan sawi dawn chuan, ral mai thei pawisa chu chatuan daih thil awmze nei atan hmang rawh. 

I sum neih chu thil ṭangkaia hman dan tam tak a awm a – mahse a hman dan ṭha ber chu mite vanrama an luh theihna tur atana hman chu a ni. 

Luka 16: 9 chuan hetiang hian a sawi, “Ka hrilh a che u, khawvêl sum lem hian in tân ṭhian siam rawh u; sum a ral hnuah chatuan rama lawm luh in ni thei ang,” tiin.  

He chang hi miten an hre sual fo. Hemi awmzia hi ṭhiante sumin i lei tihna emaw i chhandamna i lei dawn tihna emaw a ni lo. A awmzia chu i sum leh paite chu pawisa hmangin inlaichinna chatuan daih i siam thei ang.  

Chu chu kawng eng emaw zatin i ti thei ang. Mission rawngbawlnaa i ṭhiante zin chhuak an awm changin sum faiin i ṭanpui thei ang. I ṭhian zinga ring lo mi chu chawi eiah sawmin Chanchin ṭha i hrilh theih nan anmahni i buaipui thei ang. Harsatna tawk mek i ṭhiante chu lehkhabu anmahni ṭanpuitu i leisak thei bawk ang. 

I “khawvel sum” kha chatuan daih tura hman dan kawng tam tak a awm thei ang. 

Thurawn eng emaw ka lo pe teh ang che: I sum chu thil holam mai maiah hmang suh, thil holam mai mai chuan chatuan an daih dawn lo. Mihring leh Pathian Thu chauh chuan chatuan an daih dawn. I sum peipunna ṭha ber chu eng thilah nge i hre thiam ta em? Sumdawnna [Stock market-ah] emaw ram zuarnaah [real estate-ah] emaw a ni lo vang. Pathian Thu leh mihringah a ni ang. A chhan chu chung thilte chu nakin huna i la hnutchhiah tur thilte an ni lo. 

Vanram kan thlen hun chuan van mipuite chuan lo lawm che sela ka duh a ni – he khawvela i sum rawngbawlna avanga vanram kai mi tam tak awm sela ka duhpui che. Isua chuan, “Vânah, sûlrûl leh tuiêkin a ei chhiat lohnaah, rûkruten an reh pawha an rûk hek lohnaah chuan, in tân rote khâwl khâwm zâwk rawh u; i ro awmna apiangah i rilru pawh a awm ang,” tiin min chah.
[Matthaia 6:20-21]. 

Ngaihtuah zui atan. 

• I sum chu eng ang thil ṭha tih nan nge i hman? 

• Pathian rawngbawlna atana hmang lova sum i hmangaih tlat chang leh i khawl mai duh zawk chang chu a awm em? 

• I sum chu chatuan daih thil eng emaw atan i hmang ve tawh em? 

[ *Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...