Wednesday, September 10, 2025

NANGMAH NI TURIN PATHIANIN A SIAM CHE

 Nun Atana Hmanraw Bawm


- Rick Warren

- September 10, 2025



"Nangmah ngeiin ka rilru i nei a, ka nu pum chhungah mi khuh a," Sam 139:13.


I nitin nun kha Pathianin a duang vek a. I thâwk ṭan hmasak ber khan i chunga thil thleng tur engkim a hre lâwk vek a ni.


I nuin a pai hma daih chein Pathian rilruah chuan i lo awm tawh a. Tun thlenga i la thâwk theihna  chhan hi i chanpual emaw, hun remchang emaw, vanneihna emaw, thil thleng palh emaw vâng a ni lo.


Vawiin thlenga i la nun theihna chhan chu i chakna leh theihna zawng zawng nen Pathianin a duh vang che a ni.


I nu leh pate chu an ṭha emaw, an sual emaw, an pawimawh lo emaw pawh ni se Pathianin a hmang ṭangkai vek a ni. Siam i nihna tura thil pawimawh DNA an nei a. Nung turin Pathianin a duh che a ni. A tir aṭangin Pathianin i tan thil ruahman a nei a, chu a thil tum chu hlenchhuak turin a duh che a ni.


Nangmah ni turin a duh che a ni.


Bible chuan, "Nangmah ngeiin ka rilru i nei a, ka nu pum chhungah mi khuh a. I hnenah lawmthu ka hrilh ang che, hlauhawm tak leh mak taka siam ka ni si a, i thiltihte hi mak tak a ni a, chu chu ka nunna hian a hre chiang hle a ni. A ruka siama ka awma lei hmun hnuaihnung bera mawi taka siama ka awm lai khan ka ruhrel chu i lakah thupin a awm lo. Ka riruang la famkim lo chu i mitin a hmu a, i lehkhabuah chuan ka pengte zawng zawng hi ziak vek a ni a, a ni telin siamin a awm zel a, pakhat mah la awm hmain (Sam 139:16).


Pathianin a siamna chhan che chu chatuana a hmangaih theihna tur chein a ni. I nu leh pa ten i DNA chu an lo thawh ve a ni thei, mahse Pathian siam i ni. Nausen lo piang satliah i ni ngawt lo. I pianna turin Pathianin a lo ruahman lâwksa vek a ni.


Pathian kutchhuak ṭha ber i ni. A hmangaih theihna tur che leh he khawvela a thil tum i hlenchhuah theih nan a siam che a ni. Sik leh sa danglam ṭhinah hian i tana a thil tum chu hmuh harsa i ti a ni maithei. Mahse a awm a ni tih ringhlel ngai suh. I pian hma daih khan Pathianin thil tum a pe che a ni. 


Ngaihtuah chhunzawm atan.


Nungdam tura Pathianin a tihna che hi eng angin nge i ngaih? I nun atan eng thudik nge i hman ṭangkai ve ang?


Pathianin nangmah  ni turin a siam che a. I nun khawilai berah emaw khan nangmah ni lova inhriatna i nei em? Chutiang chu eng vangin nge a awm i phal?


Pathianin mak tak leh ropui takin a siam che avangin i fak tawh em? Tunah hian ṭawngṭaiin i hun hmang la, a siam che avangin Pathian hnenah lawmthu sawi rawh le.


[ Lettu: Marova Punte ]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...