Wednesday, September 24, 2025

I HARSATNAAH PATHIAN HNENAH LAWMTHU SAWI LÂWK RAWH

_Harsatna Paltlang Tura Pathian Dil_

- Rick Warren
- September 24, 2025
"Mipuite a fuih zawh chuan sipaite hmaa kal chunga Lalpa chawimawi leh a thianghlim mawizia fak tura hla satu turte a ruat a, Lalpa hnenah lawmthu sawi rawh i, a ngilneihna chu kumkhuain a awm dawn si a, ti rawh u," a ti a, 2 Chronicles 20:21.

Lal Jehosaphata chanchin aṭang hian i ṭawngṭaina chhân a nih hmaa Pathian hnena lawmthu lo sawi lawk hian thil a tih theihzia a tilang chiang hle.

Hmelma sipai rual thum zet an hmachhawn ṭumin Jehosaphata chuan  remhre tak maiin heti hian a han ti a, "Mipuite a fuih zawh chuan sipaite hmaa kal chunga Lalpa chawimawi leh a thianghlim mawizia fak tura hla satu turte a ruat a, Lalpa hnenah lawmthu sawi rawh i, a ngilneihna chu kumkhuain a awm dawn si a, ti rawh u," a ti a, 2 Chronicles 20:21.

Hei hi sipai rual danglam tak buatsaih dan tur niin i pawm em?Hmelma sipai ten Israel sipai rual ṭingṭang leh tawtawrawt nena kal an han hmuha an rilru tur chu han ngaihtuah mah teh.

Zaipawlte pawhin a ngaihna hre lovin mak an ti ve ngei ang. Mahse Jehosaphata chuan indona chu Lalpa indona a ni tih a hriattira, amah an rin chuan a hlawhtlintir ngei ang tih a hrilh bawk a. Chuvang chuan hnehna an chan turah lawmthu an sawi lâwk thei a, an rinna entir nan sipai rual hmaah zaipawl an dah a ni.

Ṭawngṭaina leh fakna hi rinna puanchhuahna a ni. "Lalpa, ka tlâkchhiatnaah min enkawl avangin lawmthu ka hrilh a che. Ka natnaah min enkawl avangin lawmthu ka sawi e. He buaina hi min chinfelsak avangin lawmthu ka hrilh a che," i tih khan lawmthu i lo sawi lâwk tihna a ni.

Thil a tih tawh hnua Pathian hnena lawmthu sawi tur hian rinna nasa tak neih a ngai hran lo. Harsatna a lo thlen hmaa lawmthu i lo sawi lâwk hian rinna tak tak chu a entir zawk a ni.

Hei hi Pathian hnena lawmthu sawi lâwk thil tihtheihna chu a ni, "Hla an saka an han fak veleh chuan Amona thlah te, Moaba thlah te, Seir tlanga mite, Juda-ho bei tura lo thawkte châng rutu tur Lalpan a dah a, tichuan, an tlâwm ta a," 2 Chronicles 20:22.

Jehosaphata sipaite chuan an kut pawh an kân lo (an rimawi tum tih loh chu). Engtin nge indonaah chuan hnehna an chan theih? Pathian hnenah lawmthu an sawi lâwk a ni. Pathian chuan a enkawlin hmelma te lakah a chhanhim dawn tih an ring a. Indona an hmachhawn dan aṭangin an rinna an lantir a. Pathianin harsatna a paltlangtir tur chu an lo thlir mai a ni.

I harsatnaah khan engtikah nge Pathian hnenah lawmthu i han sawi ṭan ang? Thil zawng zawng i duh laiin i dil leh si a. Pathian chu dawna, thama, nawra, 'aw' tihtir i tum a ni maithei.

Pathian chuan i nunah hlawhtlinna thlentir a tuma - amah ring turin a sawm che a ni.

Ngaihtuah chhunzawm atan

Harsatna i neih Pathianin ti tura i nghah chu eng nge? Engtia rei nge i lo nghah tawh?

Tunah a hlawhtlinna hmu rih lo mah la, Pathianin a pe dawn che a ni tih ring chungin i rinna chu engtin nge i puanchhuah ang?

I ngaihtuahna zawng zawng Pathianin a hria a nih chuan eng vangin nge rinna puang chhuak tura a duh che ni ang?

[ *Lettu: Marova Punte* ]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...