_Tumruhna Danglam_
- Rick Warren
- August 03, 2025
_"Engati nge khandaiha thi mai tura Pathianin he ramah hian min hruai le aw! Kan nupui fanaute chu man tur mai an ni dawn si a: Aigupta rama kir leh hi kan tan a th zawk dawn lawm ni aw?" an ti a."_ (Number 14:3)
Kum 1979-ah khan Texas-a Forth Worth-ah Pathian thu ka zirlai ka zo a, chumi lai chuan Pathianin California chhim lamah Saddleback Kohhran bul ṭan tura min kohna aw ka hria a. Ka ṭhian, ka zah em em hnenah Pathianin min kohna ni a ka hriat chungchang chu ka hrilh a.
Heti hian ka hnenah a sawi a, "Rick, chu chu ka hriatah chuan ngaihtuahna ṭhing ber a la ni. California-ah i kal chuan i reh nghal vang vang ang. A thleng ngai lovang" tiin. Chu a thusawi chuan min tihnual hle mai!
Pathian duh dan anga nun i tum apiangin tute emaw chuan an dodal ang che. Pathian kohna che i chhan lohna turin Setanan a theih apiang hmangin a bei ang che.
Mi tlem te tak tak chauhin Pathian kohna an chhanna chhan chu a tam zawkin mi nawlpui ngaihdan kalh an duh loh vang a ni. Pathianin a kohna che anga i kal dawn anih chuan miin a ni lo zawnga an fuihna che i hnawl ngam a ngai - a nghawng tur chu engpawhnise.
Number 14:2-3ah chuan heti hian kan hmu, _"Israela thlahte zawng zawng chu Mosia chungah leh Arona chungah an phunnawi a: pungkhawmho zawng zawng chuan an hnenah, 'Aigupta ramah khan Pathianin min tihlum ta then sela aw! A nih loh leh thlalerah hian min tihlum then mai sela aw! Engati nge khandaiha thi mai tura Pathianin he ramah hian min hruai le aw! Kan nupui fanaute chu man tur mai an ni dawn si a: Aigupta rama kir leh hi kan tan a ṭha zawk dawn lawm ni aw?' an ti a."_
Harsatna an tawh chiah khan Israel fate khan Ramtiam hmuna zalenna aiin Aigupta rama saltan kha an thlang leh tlat a ni. Pathianin a koh chhan tih aiin an nunhluia kir leh kha an duh zawk tlat.
Mahse an hruaitu zinga pakhat Kaleba kha huaisenna danglam tak nei a ni. Hlau chung pawhin Pathian puihna hmangin an harsatna te hmachhawn a tum a. Pathian kohna chhang turin a ni lo lama ṭawng khumtute thusawi a ngaithla duh tlat lo.
Kaleba kha a ni lo lama sawiseltu a tawng a ni mai lo a, tharum hmanga tihṭhaih a ni bawk. Number 14:10-ah heti hian kan hmu, _"Nimahsela pungkhawmho zawng zang chuan lunga den an rawt a. Chutichuan LALPA ropuina chu inbiakna puan inah Israela thlahte zawng zawng hmaah a lo lang a."_
Pathian awmpuina avangin Kaleba leh Joshua kha an him a ni. Chutiang chiah chuan nang pawh chhanhim i ni ang.
Pathian kohna i chhan phawt chuan sawiseltu i tawng ngei ngei ang. Chuvangin sawiselna hnawl turin tunah khan i rilru siam rawh. Pathian awmpuina chang turin bei tlat rawh.
Ngaihtuah zui atan.
Hmalam pana huaisen taka kal aiin eng nunhluiah nge i let leh?
I mi hmangaih leh rinzawng takte hnen aṭanga fuihna thu i dawn i zir chianin eng ang takin nge Pathian kohna lama kal tura an fuih che? Eng zat chiahin nge a ni lo lamin fuih che?
Engvangin nge a chang hian mi nawlpui ngaihdan emaw ṭhiante min fuihna emaw kalhzawnga kal a harsat em em?
[Lettu: Mapuia Fanai]
No comments:
Post a Comment