Tuesday, March 11, 2025

MIDANG TANA KAN ṬAWNGṬAI HIAN DAMNA A THLEN

_Hringnun Damna Rahbi_

By Rick Warren 
— March 11, 2025
“Joba chuan a ṭhiante pathum tana a ṭawngṭai chuan Lalpan Jona chan chu a tiṭha leh ta a; Lalpa chuan Joba chu ahmaa a neih let hnih a pe leh ta a.” Joba 42:10

Joba lehkhabuah hian ṭawngṭai thiltihtheihna leh damna a chan chungchang ropui tak kan hmu a. Joba tluka ngaiawh leh tura mamawh nasa an awmlo hial awm e. Pathian hmangaihtu leh a rawngbawltu a ni a - nimahsela ni khat thilthuah engkim deuh thaw - hausakna, damna, fanaute a chan vek a ni.

Joba chu a nat em avangin lei ah chuan a tlu a, a taksaa natna a tuar avang leh a lusunna avang chuan a ni. Joba ṭhiante pathum chu an lo lang ta a. Bible chuan, “Ni sarih leh zan sarih leiah an ṭhutpui a, tumahin a hnenah thu kam khat mah an sawi lo; a natna chu na emin an hria a ni.” (Joba 2:13).

Hetah hian thil chhinchhiah tur pawimawh tak a awm a: Ṭhianten natna an tuarlaia a chang chuan kan tih theih ṭha ber chu hmel inlan hi a ni. An tawrhnat poh leh ṭawng tlem hi a ngai zual a ni. Chu taka chu ‘telve rawngbawlna’ a ni — engmah i sawi a ngai lo; tel ve tawp mai rawh. 

Nimahse chutianglo deuh chuan, Joba leh a ṭhiante kha an ṭhu ringawt lo deuh a, thurawn an pe ṭan ta a. A ṭangkai vek lo reng a, Pathian chungchangah buaina an tichhuak zawk mah a ni. Lalpan Joba hnênah heng thute a sawi hnuin Lalpa chuan Elifaza Temani mi hnênah chuan, "I chungah leh i ṭhian pahnihte chungah khan ka thinurna a nasa a ni: ka chhiahhlawh Joba angin ka chungchang thu dik takin in sawi si lo. Chutichuan, tunah bâwngpa pasarih leh berâmpa pasarih kengin ka chhiahhlawh Joba hnênah va kal ula, in tan hâlral inthawi va hlan rawh u; tin, ka chhiahhlawh Joba chuan a tawngtaisak ang che u a, chu chu ka lo pawm ang a, in atzia ang zel chuan ka ti lo vang che u; ka chhiahhlawh Joba angin ka chungchang thu dik takin in sawi si lo va," a ti a. (Joba 42:7-8).

Pathianin a sawi hi chhinchhiah la, “Joban a ṭawngṭaisak ang che u,” tih hi. Hetah hian tu ber nge buai nia i hriat le? Joban a engkim a chan vek a ni. Ni e Pathian chuan Joba hnenah midang tana a ṭawngṭaisak phawt loh chuan damna a nei let dawn lo a ti a ni.

Job 42:10 ah chuan, “Joba chuan a ṭhiante pathum tana a tawngtai chuan Lalpan Jona chan chu a tiṭha leh ta a; Lalpa chuan Joba chu ahmaa a neih let hnih a pe leh ta a.” Joban a hloh aia nasa zawk chu Pathianin a pe let a ni tih kan hmu!

I nunah hrehawmna nasa tak a lo thleng anih pawhin. Tun dinhmunah hian channa nasatak i nei anih pawhin. Nangma tan chauh ṭawngṭai lo vang che; midang tan- ṭhenawm khawveng, kohhran leh khawvela natna tuartute tan ṭawngṭai la, i nunah Pathianin damna a peklet tur che chu thlir tawp mai rawh.

Ngaihtuah zui atan

* Nangman i tuar mek laia midang tana ṭawngṭaisak chu engtianga harsa nge ni?

* Ṭhiante natna tuar mek thurawn pekloh chu harsa i ti ve tho em? A lehpekah chuan i ṭhiante natna tuar an awmin engtin nge i ṭanpui ang?

*  Ṭhenkhat natna an tawrh reng lai pawha nangmah ṭawngṭaisak theitu che i hria em? An ṭawngṭaina chuan i nunah engnge awmzia a neih?

*[Lettu: Sangpuia]*

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...