_Hringnuna Damna Rahbi_
By Rick Warren
— February 20, 2025
“Ama duhzâwng tih tum tûr leh ti thei tûra nangmahnia thawktu chu Pathian a ni si a.” [Philippi 2:13]
Pathian beiseina leh thlamuanna chang tur leh, amah chu hre chiang turin nangmah leh nangmah i in hriat chian a ngai - chu mi hnuah chauh chuan engtiangin nge a thlak danglam theih che i hmu ang.
Thil inthlak danglam reng rengin thil ṭha lo pahnih a hring zel. Pakhatna, “Hun leh theihna inthlak danglam turin ka nei lo.” Ka buai lutuk – tihtur ka ngah lutuk, chinfel tur buaina ka ngah lutuk.
Pahnihna, “Eng thil nge ka sawi? Pathian chuan min thlak danglam thei lo. Vawi za tam ka tum tawh a, midang zawngte ka ti hnual a ni, Pathian pawh tiamin” tihte a ni thei bawk.
Chu ngaihdan chu thil pawm dan dik lo, thil inthlak reng reng chu i chakna hmanga i tih tur angin a hriattir che. Chu ngaihdan chuan a tihah chein a tibeidawng che. Nangmah chakna rinchhana nangmah leh nangmah infuih dawn chuan i beidawng leh ṭhin ang. Pathian chuan kawng ṭha zawk a kawhhmuh thei che.
Isaia 40: 28-31 chuan kan chakna chu Lalpa aṭanga lo chhuak a ni tih min hrilh: “In rilruin in hre ngai lo vem ni? In bengin in hre ngai lo vem ni? Kumkhaw Pathian, Lalpa, kâwlkil Siamtu chu, a chauh ngai lohva, a hah ngai hek lohzia hi; a hriat thiamzia chu zawn chhuah rual a ni lo. Chau hnênahte chuan thiltihtheihna a pe ṭhîn a, chakna rêng nei lote chu a tichak ṭhîn. Tleirâwlte meuh pawh an chauvin an hah ang a, tlangvâlte pawh an tlu dêr ang; Lalpa nghâktute erawh chuan an chakna chu an siam ṭha leh ang a; mupuite angin thlain an thlâwk chho vang a, hah lovin an tlân ang a, chau lovin kein an kal ang” tiin.
Thil inthlak danglam tak tak theitu chu i chakna a ni lo. Pathian chakna nangmahnia awm zawk chu a ni. Hei hi han mitthla teh: I theihnate chu chawngzawng te ber ang vel nasa taka a thla zap chiam ang chu a ni a. Beiseina nen khawvel i thlir a, beiseina nen sawtah, beiseina khitah, beiseina nen kutah i invai vel a – i nunah beiseina i zawng a nih kha. Nangmaha thil tih i tumna lamah i chau zo ta a ni.
Pathian chakna erawh chu mupui ang vel a ni a, thlipui su zawng pawhin a thlawk vawn vawn thei ṭhin. Mupui chuan harsa a ti viau lem lo – an thlawh san chhan chu thlipui su tura siam an nih vang a ni. Chutiang chiah chuan Pathian chuan sang taka thlawk tur chuan a siam che a, nangma chakna hmanga kal kala kal turin a siam lo che.
A chakna hmang tur chuan hmun hrang hranga i kal kual dun dun kher a ngai lo vang, “Lalpa, ka mamawh che. A tahtawl tetein ka ring a che” ti phawt mai rawh. Chutiang hmunah chuan a hmangaihna, chakna leh thiltihtheihna chuan a chawi sang ang che.
Philipi 2: 13 chuan, “Ama duhzâwng tih tum tûr leh ti thei tûra nangmahnia thawktu chu Pathian a ni si a” tiin min hrilh. Pathian chuan inthlak danglam turin duhna a pe che a, nangma lama chakna i neih loh lai pawhin, nangmahah chuan rahbi thar rap turin thiltihtheihna a pe che. Nangma chakna rinchhan lova Pathian chakna leh thiltihtheihna i rinchhan chiah chuan Pathian chuan i nun a tidanglam ang.
Beiseina chu taima lehzuala chet chhuah a ni ber lova, rinna nasa zawk nena kal chu a entir zawk. He thutak hi hre tur leh a ke bula let fo tur chuan Pathian chuan a duh che, a chhan chu amah ngei chu sang taka thlawk thei tura puitu che chu a ni.
Ngaihtuah zui atan
Engtiangin nge buai taka hnathawh leh mahni leh mahnia beidawnna chuan kan nuna Pathian hnathawh a dal ṭhin?
Isaia 40 chuan Pathian chuan chak lote chakna a pe ṭhin tih a sawi. Chak lo taka i lo awm lai chuan engtin nge Pathian chuan chakna a lo pek tawh che?
“A tahtawl te tea” Pathian kuta tlukluh chu engtihna nge ni, chu chu i nunah chuan engtin nge i lo sengluh theih ang?
[ *Lettu:* Peka]
No comments:
Post a Comment