_Sawinghin rual loh_
Rick Warren
11 Nov, 2024
“Mi hmangaihtu chu ka hmangaih a, Ṭhahnemngai taka mi zawngtute chuan mi hmu ang.”
THUFINGTE 8:17
Daniela khan harsat laia tawngtai dan min zirtir a.
Chung kawng ruk-te chu Daniela 9 ah khan kan hmu a. Nimin lamah khan, chumi kawng hmasa ber: Pathian chu kan biak hmain keimahniah thu kan sawitir thin ang tih kan zir a nih kha.
Harsat laia min chhan theihna tura kan tawngtai dan tur kawng hnihna chu i ngaihtuahna te kha Pathian lam hawitirin, amah zawn a ni.
Daniela chuan Daniela 9:3ah khan chutiang chiah chuan a ti a, "Tawngṭaina leh dîlna zawngin Lalpa Pathian lam chu ka hawi a.”
Pathian nena in inzawmna piah lamah hei hi in inzawmna bulthut atana thurawn pawimawh tak chu a ni. Mi tu pawh hi an lam i ngaihsak a, an thusawi i ngaihthlak thin chuan in inzawmna i ti nghet zual thin ang. Kum 40 chuang kan innei ta a. Ka nupui hian min biak hian, a lam ka hawi thin. Chu chu a lawm em em a. A chhan chu, lakpen awm miah lovin alamah ka rilru ka pe tih a hriat vang a ni.
Midang lam hawia i inher hian i ngaihsak tih a tilang thin a. Pathian nen pawh chu chu i ti thei a ni. I taksa nen khan Pathian lam hawi thin la. I theih phei chuan kal chhuakin, van lam hawiin tawngtai thin ang che. I taksa pumpui mai kha Pathian hnenah i ngaihsak zia lantir nan i hmang dawn tihna a ni a, chu chuan inngaitlawmin a aw hre thei turin i inphahhniam tih a tilang a ni.
Taksa nena a lam hawi hi i ngaihsakna leh i zawnna lantirna hmasa ber a ni a, chu chu harsat laiin a pawimawh em em a ni- kan nun zawng zawngah pawh.
Amosa 5:4ah chuan, Pathian chuan, "Mi zawng ula, in nung ang" a ti a. Pathian i zawn tak tak hma chuan i la nung lo tihna ang a nih chu.
Pathian chuan i zawn chuan hlawhtlina tiam che a. A ni chuan, "“Mi hmangaihtu chu ka hmangaih a, Ṭhahnemngai taka mi zawngtute chuan mi hmu ang.”
(THUFINGTE 8:17 )
Harsat laiin Pathian hnen atanga hriat a, tanpuina dawn i duh em? Pathian i ngaihsak theihna turin i ngaihsakna dan tur kawng i ngaihven a ngai a nih chu. I hmel a lamah hawi la, i thinlung zawng zawngin amah chu zawng la. Chutah chuan nunna awmzia tak tak chu i hrefiah ang.
Ngaihtuah zui atan...
I nun kawng pengah te khan eng ang takin nge Pathian i zawn khan i ngaihsak thin? Han ngaihtuah vang vang teh.
Taksa tel kher lo pawh a Pathian hmaah inngaitlawm tak chunga kan awm theih dan han sawi teh?
I tawngtai hian englaiah nge i rilru lakpen a nih thin? Engtikah nge i rilru zawng zawnga i tawngtai theih thin?
(Lettu- Msa)
No comments:
Post a Comment