Thursday, October 17, 2024

THUTAK PATHUM TIHUAISEN THEITU CHE

Tihnghin Rual Loh

By Rick Warren
— October 17, 2024
“Pathian hmangaihtu, ama ruat anga a kohte tân chuan, an ṭhatna tûrin engkimin a thawhsak ṭhîn tih kan hria.” [Rom 8:28]

Engtik hunah emaw chuan i nun khan i chunga thuneitu tu emaw aṭang chuan thil dik hauh lo ti tura nawrna a la hmachhawn ang – chutiang hunah chuan inngaitlawm, zahawm tak sia an ngaihdan thlak tura i chet a ngai ang. Chutiang chiah chu Daniala khan Lal Nebuchadnezzar-a dan pek kalh zawnga a chet kha a ngai ta a nih kha. 

A chang chuan miten ti tura an tih che chu i tana thil ṭha a ni thei a, a chang chuan thuneitute nena inrem lo leh Pathian hnena ngenngawl taka a hruaina i ngen ngawih ngawih a ngaih chang a awm ang. Pathian chuan chu mi thinlung chu a thlak a ngai ang. A nih loh pawhin thuneitu rilru chu a thlak thei a, a khawngaihna i ngen a ngai tawh kher lo thei. A nih loh pawhin – I chunga thuneitu chuan thil dik lo ti tura a tih che chuan i hna chu bansanin hna thar a pek che a ngai thei bawk. 

Eng pawh ni se, Pathian chu thuneitu ber a ni tih i hriat chu a dik ang. A hnathawh chu i hmu nghal mai lo vang. Rom 8: 28a a thutiam chu beisei tlat ang che: “Pathian hmangaihtu, ama ruat anga a kohte tân chuan, an ṭhatna tûrin engkimin a thawhsak ṭhîn tih kan hria,” tih a nih kha. 

Daniela kha thil dik lo ti lova huaisen taka a din ngamna chhan leh a lehpek chhut hauh lova a din ngam chham kha eng nge ni? Daniala chu Pathian nen inhnaih takin an khawsa dun a; Pathian nen an leng dun a, Pathian chu a ṭhian a ni tih a hriat reng vang a ni. A nunah chuan Pathian a tel ve tlat a, Pathian thutiam chu a vawng reng a, Pathian thlarau chu amahah a awm ve tlat bawk. Pathian mite chuan amah chu an hual tlat a ni. Pathian venhimna chu a nei a. Chung zawng zawng avang chuan a huaisen tlat a ni. 

Daniala tana dik kha i tan pawh a ni thei ang. Thuneitute i hmachhawn chang chuan heng thutak palite hi nangmah leh nangmah i inhriat thar nawntir fo a ngai ang:  

*Isua neitu ka ni.* Isua chuan “In hnenah ka awm zel ang” a ti [Matthaia 28: 20]. Mal riaua i inhriat chang pawh chuan malin i awm lo; Isua chuan a awmpui che. 

*Thlarau Thianghlim neitu ka ni.* Isua i kiangah a awm, Pathian thlarau chu nangmahah a awm. “Fate u, nangni chu Pathian aṭanga chhuak in ni a, nangmahnia awma chu khawvêla awma ai chuan a ropui zâwk avângin zâwlnei derte chu in ngam tawh e.” [I Johana 4:4]

*Pathian thutiam changtu ka ni.* Bible-ah hian thutiam 7000 chuang lai i innghahna tur a awm a ni. “Lalpa thu zawng zawng chu
fiah a ni tawh,
Amah ringtu zawng zawng tân
ani chu phaw a ni.” [Thufingte 30:5] 

*Pathian chhungte chuan min hual vel a ni* . Nangmah maia awm nia i inngaih chang chuan kohhran hote thlawpna leh tawngtaisakna chu thil pawimawk tawpkhawk a tling. “Chutichuan, in sualte thupha chawi tawn ula, inṭawngṭaisak rawh u; tichuan, tihdamin in awm dâwn nia. Ṭhahnemngai taka mi dik ṭawngṭaina chuan thil ropui tak a thawk thei a ni,” tiin. [Jakoba 5: 16]

Mi tute mahin tun dinhmunah chuan thil dik lo taka ti turin an nawr kher lovang che. Mahse heng thutak pali nghahchhana hmang hian hlauh nei miah lovin Pathian chu hun harsaah chuan i lo ring thei ang. 
 
Ngaihtuah zui atan. 

Thil dik lo tura sawmna awm thei chu i ngaihtuah mai pawhin i hlau lawk em? Eng vangin nge? 

Pathian mite chu khawhar taka i awm lai chuan engtiang takin nge i lo thlamuanpui ve tawh ṭhin? 

Thutak pali i nuna thuneitute i hmachhawn hun awm thei kan sawi takte kha han ngaihtuah leh teh. Hun harsa chu i hmachhawn theih nan Thutak pali kan sawi tak te kha thlaraua ṭhanglian turin engnge i mamawh zual ang? 

[ *Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...