Sunday, September 29, 2024

MI INNGAITLAWMTE HNENA THUTIAM PALI

_Ni 40 Chhung Ṭawngṭaina_

- Rick Warren 
- Sept 29, 2024
_"Thuhnuairawlhte chu rorêlna felah a hruai ang a: Thuhnuairawlhte chu ama kawng chanchin a zirtir bawk ang."_ (Sam 25:9)

Inngaihtlawmna hi hniam taka mahni indah lam a ni lovin mahni inhmuh len loh tihna a ni. Pathian lam i en tlat a midangte i ṭanpui chuan nangmah i inhmu lian lo telh telh ang.

Engvangin nge miin an mahni ni lova midang an ngaihtuah zawk tlat ang? A chhan chu, Pathianin ti tura min tih a ni, inngaitlawmte hnena a thutiam tam tak Bible-ah kan hmu bawk.

Nangmah ni lova mi dangte i ngaihtuah hmasak ṭhin chuan heng thil pali te hi Pathianin a tihsak ang che.

*I inngaihtlawm chuan Pathianin a hruai ang che:* Khawi lam nge pan tur- luh tur nge chhuah tur, chelh tlat tur nge kaltir tur i hriat loh chuan, inngaitlawm tawp mai rawh. I inngaihtlawm chuan Pathianin i pen lehna tur chiang takin a hrilh ang che. Thil i tisual tlem ang a; tin, i nun a Pathian duhzawng i hnaih sawt bawk ang. Sam 25:9 chuan, _"Thuhnuairawlhte chu rorêlna felah a hruai ang a: Thuhnuairawlhte chu ama kawng chanchin a zirtir bawk ang."_ a ti.

*I inngaihtlawm chuan Pathianin mal a sawm ang che:* He thutiam hi Pathian thuah kan hmu nual a. Isaia 66:2 chuan, _"Heng thil engkim hi ka kutin ka siam ani si a, chutichuan heng thil engkim hi a lo awm ta a ni, LALPAN a ti: amaherawhchu mi, rethei taka awm, rilrua inchhir ngawih ngawih, ka thua khur thina lam hi ka en zawk ang."_ a ti. Pathian chuan mahni hmasial leh chapo te, mi dangte aia mahni ṭha inti lutuk te mal a sawm ngai lo. Amah zawng hmasatute mal a sawm ṭhin.

*I inngaihtlawm chuan Pathianin thil thlak danglam theihna a pe ang che:* Thil thlak danglam theihna chu khawngaihna hi a ni. I nunah thil thlak danglam duh i nei a ni mai thei, mahse i thei lo. Khawngaihna i mamawh!

Engtin nge Pathian khawngaihna leh thil thlak danglam theihna chu i neih ang. _"Nimahsela, khawngaihna tam lehzual a pe ṭhin; chuvangin Pathian Lehkha Thuin, 'Pathianin mi chapote a dodal a, inngaitlawm te erawh chu khawngihna a pe ṭhin' a ti a ni."_ (Jakoba 4:6). I chapo apiangin Pathian epah i awm a ni- chu hmuna awm chu i duh lovang. I inngaihtlawm poh leh Pathianin khawngaihna a chantir ang che.

*I inngaihtlawm chuan Pathianin i hah a chhawk ang che:* I chapo chuan i hah a lo zual ang. Isua thusawi hi han ngaithla teh, _"Ka nghawngkawl bat ula, ka hnenah zir rawh u; thuhnuairawlh leh rilrua inngaitlawm tak ka nih hi: tichuan, in thlarau tan chawlhna in hmu ang."_ (Matthaia 11:29).

Engmah pek tur nei tawh lova i inhriat hunah chuan Isua hnenah inpumpek tawp rawh. Bible zirchian nan i hun hmang la, Isua entawnin zaidamna leh inngaihtlawmna zir la. Ṭawngṭai la, i inthlak danglam theih nan dil ṭhin rawh.

Tichuan i thlarauin a chak zel tih i hmu ang. I thlir i thlak chuan i nun tihdanglamin a awm ang.

Ngaihtuah zui atan.

Mi inringtawk tak leh huaisen tak mi i hriat kha han ngaihtuah teh. Engin nge chu an rilru puthmang chu inbûk tawk taka awmtir nia i hriat?

Tlawm taka i awm khan nangmah leh Pathian chungchangah engnge dik ni a i hriat?

He khawvela a awm lai khan Isuan eng kawngah te nge midangte a ngaihsakzia a lantir? Engtinnge Isua hnung zui hian thlir dan dik a neihtir che ni a i hriat?

*Pathiana hahchawl turin i inring em?*
Hahchawlhna hmasa ber chu Isua Krista Lal leh chhandamtua pawma Pathian nen inremna siam hi a ni. He ṭawngṭaina hian bul han ṭan teh le.

"Isu, ka sualna hian i lak ata min la hrang tawh lo sela ka duh a ni. Nang ka rin phawt che chuan ka sual min ngaidam ang tih min tiam a, min siam chhan ka zir ang a, engtik niah emaw i chatuan van inah min la hruai ang.

"I hmaah ka sual ka puang a, min Chhandamtu i ni tih ka pawm e. Ka sual ka puan a nang ka rin che chuan chhandamin ka awm ang tih min tiam kha. Chhandamna chu thiltih vang ni lovin, rinna avanga khawngaihnaa lo thleng a ni i tih hi ka pawm e. Ka Lal atan ka thlang a che. Ka nun zawng i tan ka hlan e.

"Ka nun zawng hi min siam chhan angin, mahni tan ni lovin i tana hman ka duh e. Ka nun i tan ka hlan a, min chhandam a i chhungkuaa min pawm turin ka dil a che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...