_A Tho Ta_
Rick Warren
April 1, 2024
”A Fapa, kan Lalpa Isua Krista thu chu tisa lam chhui chuan Davida thlaha piang a ni a, thianghlimna thlarau lamah erawh chuan; mitthi zîng ata ropui taka kaihthawh a nihna chuan Pathian Fapa a nihzia a tilang chiang a ni" Rom 1:3-4
Isua tuarnate, kraws-a a thihna te kan zir nachungin, Easter erawh a thawhlehna kan lawmna a ni a: Pathian chuan Isua chu thihna ata lachhuakin, thihna leh sual a hneh tih a tifiah a.
Isua a thih hnu khan, a ruang la thlain thlanah an zalh a, lung lian tak kawngkaah an dah a. Sakhaw hruaitute chuan Isua ruang chu an rukchhuah an hlau a, Rom sipaite hnenah chuan thlan vengtu tur an dil a. A thawh leh kha an duh lo a ni ber mai!
Mahse, a tho leh tho.
A thawnthu chu i hre vek a. Mahse, kum 2000 vel kal taa sakhaw hruaitu mi fel tak hriat rengna a ni satliah lova. Vawiina a la nun ngei avanga lawmna a ni zawk.
Keimah hi a finfiahna chu ka ni a - chubakah khawvel pum pui a ringtu kristian mi tluklehdingawn 2, Easter lawm tute pawh hi a finfiahna an ni bawk. Isua chu, ”thianghlimna thlarau lamah erawh chuan; mitthi zîng ata ropui taka kaihthawh a nihna chuan Pathian Fapa a nihzia a tilang chiang a ni (Rom 1:4).
Easter chu Pathian Fapa, kan Lalpa Isua Krista, he khawvelah nausen a lo piang a, Davida lal thlah a lo pianga Chanchin Tha chu a ni a. Hmanlai chanchin ziahna paliin a thawhlehna an chhinchhiah a, mi 500 lai pun khawmnaah a inlar nghe nghe a ni.
A thi a, a ni thum hnuah Jerusalem velah a tei kual vel tur chu i suangtuah thiam em? Thil mak tak a ni.
Isua kha krossah khaikan a nih khan, ringhleltu leh sawiseltute khan an chhaih nawmnah a, "Pathian fapa i nih takzet chuan Kraws atang khan engatinge i in lakthlak theih loh? Lo chhukin, Pathian i nihna chu han tilang ta che" tiin an ti el a.
Isua erawh chuan remruatna dang tha tak a nei thung. Tunlai tawngkam takin, "Ni thum chhung ka inphumtir che u anga, tu nge ka nih tifiah turin ka rawn tho leh ang" a ti a ni.
A sawi ang ngei chuan a ti reng bawk a!
Ngaihtuah zui atan...
Easter-ah Isua thihna leh thawhlehna hriat reng hi engnge a pawimawhna?
Isua thihna khan engnge a hlenchhuah? A thawhlehna pawhin engnge a hlenchhuah?
Isua a thi tih hmu rengtu ten, a ni thum hnua an hmuh leh khan eng tin nge an awma i rin le?
(Lettu: Msa)
No comments:
Post a Comment