Saturday, March 30, 2024

ISUA AVANGIN PATHIANIN A PAWM CHE

_A Tho Ta_

- Rick Warren 
- March 30, 2024
_"Pathianin kan sual la bo tura Isua kan rin phawt chuan mi felah min puangin min pawm dawn a ni a ti a. Chutiang chiah chuan engpawh tiin eng mi pawh ni ila kan vaiin chhandam kan ni thei, Krista kan pan phawt chuan."_ (Rom 3:22, TLB)

Mi tam tak chuan anmahni an inpawm lo tih hi mak i ti ang em? Rawngbawlin kum 40 chuang ke ka lo pen ve tawh a. Mi sing chuang ka kawm tawh a, chung zinga a tam zawk chuan an nun, anmahni kha an induh/inpawm hauh lo a lo nia. Midang nih an duh tlat. Mihrang hlak nih an duh a. Mize dang daih neih an duh a ni. 

Mi tam zawkte ang hi i lo nih ve chuan mahni inpawm miah lovin midangte pawm nih tumin i lo bei ve fe tawh tihna a ni ang. 

Midangte pawm nih tumin i bei a ni mai lo. Pathian pawm nih tumin i bei fe bawk. I thinlungah buaina lian tak i nei: Pathian chu a famkim a, nang chu i famkim lo tih hi. 

Mahse chanchin ṭha hriat tur a awm. Pathianin chung i buaina te chu a hria a, ruahmanna ṭha tak a nei tih hi.

A hmasa berah chuan i harsatna hi hrethiam phawt ang. Pathian chu famkimna hmun vanah a awm a. Chu hmunah chuan mi famkim lo an awm ve phal ta sela hmun famkim a nihna a bo ang.

A dawtah chuan, ruahmanna: Pathian ruahmanna hi "Thlak danglamna nasa" tak tih a ni fo.

Bible chuan, _"Pathian chuan sualna nei lo Kristaah chuan kan sualna chu a leih bua a. Chu mi thlak thleng tur chuan Pathian ṭhatna chu kan chungah a rawn leih a ni"_ tiin min hrilh (2 Kor. 5:21, TLB)

Mi famkim lo i ni, mahse Isua chu mi famkim a ni. Chuvangin Pathian chuan, "Nun kan inthlak thleng dawn nia. Isuan i sual a phur ang a, nangin a ṭhatna i nunah i seng thung ang" a ti.

Krista thihna leh thawhlehna avangin mifel nih tuma i thawh chhuah a ngai lo. Kritsa ṭhatna chuan Pathian tana pawmtlakah a siam che. Chu chuan engtik niah emaw vanramah, a hmun famkimah a hnena cheng turin a pui ang che. Pathian ruahmanna fel tak a va ni em!

Mi tam tak chu an nun kal tawhin a phuar bet ṭhin. "Ka thil lo tih tawh te hi hre vek ta la chu Pathian tan pawmtlak ka ni ngai lovang tih i hria ang" an ti ṭhin.

Engnge i lo tih tawh ka hre hauh lo, mahse Pathianin a hria, a la pawm reng bawk che: _"Pathianin kan sual la bo tura Isua kan rin phawt chuan mi felah min puangin min pawm dawn a ni a ti a. Chutiang chiah chuan engpawh tiin eng mi pawh ni ila kan vaiin chhandam kan ni thei, Krista kan pan phawt chuan."_ (Rom 3:22, TLB)

Pathian leh midangte hmaa pawmtlak nih tuma nun reng kha sim a hun. A chhan chu Isua thihna leh thawhlehnain pawmtlak ni tura min siam tawh avangin. 

Ngaihtuah zui atan. 

Midangten an pawm theih nan che i lo bei fe tawh em? Engnge a rah chhuak? 

Pathian tana pawmtlak ni turin eng kawngin nge thawk tura thlem i nih ṭhin? 

Isua thihna leh thawhlehnain Pathian tana pawmtlakah a siam che tih hriatna hian i nunah eng danglamna nge a thlen?

*Mihring taka Pathian tana ṭha nih i tumna kha bansan rawh* 

Eng ang pawhin tum mahla, Pathian tan i ṭha tawk ngai lovang. Thil theih loh a ni. Chuvang chuan Isua i mamawh a ni. Pathian pawmtlak ni tura tisa taka i beihna kha bansanin, chu ai chuan a chhandamna thlawn pek hi pawm turin i inpeih em? I inpeih chuan heti hian ṭawngṭai rawh:

Lalpa, ka thih hunah ka chanchin i hmaah ka sawi dawn a ni tih ka hria a. Midangte leh i hnen aṭang ngeia pawmtlak nih tumin ka bei fe tawh tih ka puang e. I lakah thil sual tiin i remruat ang ni lovin ka duh danin ka nung a ni tih ka hria. Tun aṭang hian ka nun dan thlak ka duh. Sual lak ata i hnen lam rawn pan ka duh. 

"Ka sual sual man ka tawrh loh nan ka sual zawng zawng ai thi tura Isua i rawn tirh a avangin ka lawm e. I ngaihdamna leh pawmna ka hlawh chhuak zo lo tih ka hria. Lalpa, i khawngaihna leh Isua ṭhatna chauhin min chhandam thei tih ka hria e. 

"Isu, min hmangaih em avanga ka sual zawng zawng i phurh avangin ka lawm e. Vanram luttlakah min siam a, min chhandam turin ka ngen a che. Tunah hian ka pumin, chatuan atana min chhandam turin ka dil a che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...