I Nundan Thlir Let La
- Rick Warren
- Jan 25, 2024
"Bumin awm suh u; Pathian chu hmuhsit zia a ni lo ve; miin a theh apiang, chu mi vek chu a seng bawk dawn si a." (Galatia 6:7)
Anṭam chi tuhin vaimim i thar daih ngai lo.
Chutiang chiah chuan khâkna chi tuhin hmangaihna i seng ngai lo. Sawiselna chi tuhin mite fuihna thu i dawng ngai lo bawk.
Galatia 6:7-ah chuan heti hian kan hmu, "Bumin awm suh u; Pathian chu hmuhsit zia a ni lo ve; miin a theh apiang, chu mi vek chu a seng bawk dawn si a."
Hei hi han chhiar leh teh: "Miin a theh apiang, chumi vek chu a seng bawk dawn si a." I sualna leiah chi i tuh chuan chhiatna i seng ang. Mahse i thlarau lam nuna chi i tuh chuan chatuana nunna i seng ang.
Kum sang tam tak liam taah khan Pathianin kan sualnain kan tuchhuante thleng a nghawng thei tih a lo sawi tawh. Entir nan, i thinrim a i fate chunga i thinrimna i leihbuak mai chuan chutianga ti ve turin i fate i zirtir tihna a ni. Sualna hian chhungkuaah nghet takin zung a kai thei a, chhuan tam tak thlengin a inchhawmtir theih. Inkungkaihnaah leh kan chheh vel boruakah te mai ni lovin a takin a lang chhuak thei. Kan nungchang, kan chin ṭhan hian kan thluak hi a ṭha lam emaw a chhe lam emaw pawhin a tidanglam thei tlat.
Mi tam tak chuan kan tleirawl chhoh hian kan thluak hi a nih tur ang ni vek tawhin a insawh nghet tawh viauah kan ngai ṭhin. Tunah chuan kan thluak fan theihzia leh kan dam chhunga kan siam danglam theihzia kan hre ta a ni.
Chumi hriat chu thil ṭha tak a ni! A awmzia chu i thluak kha beidawnna emaw thinchhiatna emaw zawnga hrual anih chuan a la danglam reng thei tihna a ni.
Mahse thil i thlir dan i thlak a ngai. Chu chu Bible-in simna emaw rilru thlakna emaw tiin a sawi. I rilru i thlak thei a, chutianga i thlak anih chuan i ngaihtuahna pawh a danglam ang. I ngaihtuah dan i thlak danglam chuan i chet dan a danglam nghal ang.
Tichuan thlarau lam nunah chi i tuh ta tihna a ni a, i nunah Pathianin rah duhawm tak a seng tur chu i thlir thei tawh ang.
Ngaihtuah zui atan.
I thil ngaihtuah duh danin engtinnge i nungchang a thlak danglam ni a i hriat le?
In chhungkuaah eng thutlukna dik lo nge inphum nghet ni a i hriat? Chung chu engtinnge i tihreh ang?
Engtinnge i ngaihtuahna hian a taka i chet chhuah dan a hril?
[Lettu: Mapuia Fanai]
No comments:
Post a Comment