Ni 50 Chhung Rinnaah
By Rick Warren
September 22, 2023
“Kum za dâwn lai a ni tawh a, a taksa ngaihtuah chuan mitthi ang mai a ni tawh a, Sari pawh chu fa nei rual a ni tawh lo tih a hre reng chungin, a rinna a chuai chuang lo va” [Rom 4: 19]
A chang chuan mi ṭhenkhat chuan rinna tih awmzia chu thil nihna dik tak en kan chu niin an ngai. Mahse, chu aia thudik ṭhelh chiang chu a vang mai thei!
Abrahama khan chu chu a hrethiam: “Kum za dâwn lai a ni tawh a, a taksa ngaihtuah chuan mitthi ang mai a ni tawh a, Sari pawh chu fa nei rual a ni tawh lo tih a hre reng chungin, a rinna a chuai chuang lo va” [Rom 4: 19]
Abrahama kha kum 99 a ni tawh a; a nupui pawh 89 a ni tawh. Mihring finna aṭanga chhut chuan fa nei thei a ni tawh lo. Kha thil nihna dik tak kha a pa lo. Rinna nen a hmachhawn mai a ni.
Rinna chuan thil nihna dik tak a en kân ngawt lo. Buaina awm reng chu awm lo ang maia ngaihna a nei lo. Rinna tih awmzia chu i nuna buainate inbawhbehtir lo va, a nihna ang taka hmachhawn chu a ni.
Ṭhenkhatte chuan Kristianna chuan kan harsatna te en kân a, nui liam mai mai turin min ti ni ang dawn dawnin an zirtir a. Mahse chu chu Isua min zirtir dan a ni lo.
Rinna chuan thil nihna dik tak hnawl turin a ti ngai lo vang che. Pha kual mai mai satliah nun chu a ni lo. Hun kal tawh vawn tlat pawh a ni chuang lo. Rinna chu mawl taka luhlulna satliah a ni lo lehzual.
I natna eng emaw avanga lungngaihna hmachhawn emaw i duhthusam thil boruaka zam ral ta avanga lungngaihna emaw chu thil thleng ngei tur a ni.
Mahse mahni leh mahni inkhawngaih avanga indawmkun tlat a ngai lo. Pathian hnenah thlen mai rawh, “Ka duhthusam ang chuan a awm ta miah lo mai a, ka nun tan hian kawng ṭha zawk min buatsaihsak ang tih hi ka ring tlat a ni” tiin.
Chu chu rinna awmzia chu a ni. Pathian chuan i nuna a thawh tum chu a la thawk zo lo. Pathian chuan i tan thil ṭha tam tak a lo buatsaih lawk a! Thudik tak hmachhawnin an tihbeidawn theih loh chein i awm thei.
Lehkhabu ziaktu leh Hitler-a tihduhdahna tuar tawhtu Corrie Ten Bloom-i chu a bialpa nen an inhual a, innei mai tawh tur an ni. Vawilehkhatah chu pa chuan an inhualna a titawp thut a, a ṭhian pakhat chu a nei ta mai a. A sawp hnawk a ni ber. Pasal a nei zui tawh lova, a ban tlang ta a ni.
Corrie Ten Bloom-i chuan amah leh amah chauh inngaihtuahin a kaikun reng lo thung. A hmangaihna chu thil dangah a hmang ta a. Kum zabi 20naa rawngbawltu mite ngaihnat ber a ni zui ta a ni, mi maktaduai zet nunna khawihtu a ni hial.
Chutianga a tih theih chhan chu thudik a hmachhawn vang a ni. Pathian a ring a, a rinna kaltlang chuan midangte a hmangaih a ni.
Chutiang chiah chuan i ti ve thei ang.
Ngaihtuah zui atan.
Lu sunna tih leh mahni inkhawngaihnaa hun hman tih chu engnge a awmzia?
Thudik kha tak emaw thil dik tak emaw i pawm mai a ngaih hun chu i lo tawng ve tawh em? I rinna chuan chutiang hun hmachhawn tur chuan engtin nge a puih che?
Rinna nena thudik hmachhawn dan chu engtin nge midangte i kawhhmuh ve theih ang?
Isua a lo let leh hun chuan engnge i tih ang?
Bible chuan Pathian, a Fapa Isua Krista kaltlang chauh chuan vanram i kai thei a ni tih a sawi: Nangmah chuan vanram i kai thei lo: “Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni,” tiin. [Ephesi 2: 8-9]
“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hrethiam ang a, ka chatuan inah chuan engtik niah emaw min lo la lawm ang.
“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamtu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e.
[Lettu: Peka]

No comments:
Post a Comment