Nun duhawm zawk nei tura inbuatsaih dan
By Rick Warren
December 1, 2022
“Chutichuan, thil eng pawh miin in chunga an tih in duh tûr ang apiang chu, mi chungah pawh ti ve rawh u.” [Matthaia 7:12]
Tute nen emaw in inbakkaih changin mite zah kaia khawsak dan kawng tam tak a awm zel. Nimin lam khan chutiang kawng thum chu kan thlir tawh: I ṭawng chhuah hmain ngaihtuah chiang hmasa rawh, in buaina a falin chingfel rawh u, mite ṭhatna lai ber thlir rawh.
Mahse, i tih hmasak ber tur chu hei hi a ni: Mite rilru puthmang hriatthiamsak rawh. Mite zahkai nih i duh chuan, an rilru put hmang chu i zahsak a ngai. I tuh ngei chu i la seng dawn. Bible chuan hetiangin a sawi, “Chutichuan, thil eng pawh miin in chunga an tih in duh tûr ang apiang chu, mi chungah pawh ti ve rawh u,” tiin [Matthaia 7:12]
Mite chu an nat chang emaw, lu an sun lai emaw, hlauh neia an awm lai emaw, dik lo takin tuten emaw an chungah an ti nia an inhriat changin chu chu a pawimawh lehzual. Mite chuan an thil paltlang mek chu i hriatsak an duh tlat. I ngaihsak tih an hriat hmasak zet loh chuan i hriatsak chu an duh kher lovang.
A nihna takah chuan, mite rilru natna tuarpui tur chuan an ngaihdan i ṭawmpui kher a ngai lovang. Mi tute emaw lungawi lo i hmuh changin, entirnan, an thutlukna chu pawmpui kher lo mah la, an thil tih chu eng vanga ti nge an ni tih hre turin hma i la thei ang.
Nehemia kha buaina a hmachhawn khan a thil tih hmasak ber chu: Hnathawktu lungawi lohna nei leh phunnawite kha an harsatna a hriatthiampui kha a ni. Hetiang hian a sawi, “An vui thu ka hriatin ka thinur hle a,” [Nehemia 5:6] A thinur satliah a ni lo. A thinur hle a ni tih a sawi.
Engnge a tih? Mi ṭhenkhat lungawi lohna neite kha a tarchhuak a ni. An thinrimna kha a awm a ni tih pawmpuiin a thinrim ve hial a nih kha. An thinrimna kha ngaihnepsakin “A ṭha e, thinrim duh suh u,” a ti mai lo, hriatthiampui takin “Kei pawh ka thinrim asin” a ti mai.
“Thinrimte chu sual a ni lo em ni?” i ti a ni mai thei. Aih, a reng chuan a ni lo. A chang chuan thinrimna hi hmangaihna lanchhuahna a ni thei. Ka chhungte zinga tu emaw ber i lo tina a, holam takin ka lo thlir liam vel mai mai a nih chuan ka chhungte chu ka hmangaih lo tihna a ni ang. Pathian Thuah chuan, Pathian chuan thinrimna dik leh dik lo a thliar hrang a, thinrimna ṭha leh thinrimna ṭha lo tiin. Ephesi 4: 26 ah chuan hetiang hian kan hmu, “Thinrim mah ula, thil sual ti suh u, ni tlâk thleng thlengin thinrim suh u,” tiin.
Isua pawh kha hruaituten ṭanpui ngai an pui lo a hmuh khan a thinrim ve viau a ni. Mark 3:5 ah pawh Isua khan thinrim taka anmahni en chungin, “An thinlung sakzia a hriatin pawi a ti êm êm a,” a sawi tih kan hmu.
Mi tute emaw tihnawmnaha an awm chang chuan hrehawm i lo ti viau ṭhin em? Mite zah kai nih i duh chuan, Nehemiah leh Isua te angin khawsa ang che. Mite rilru puthmang hriatthiampui rawh. Anmahni i thurualpui a ngai kher lo, an rilru puthmang hre thiam a, an thu i ngaithlaksak chuan, an zah em em ang che.
Ngaihtuah zui atan.
Mi tuten emaw an tuarpui chang che ngaihtuah let rawh. Engtin nge an ngaihsak ngei che a ni tih chu an lantir?
Buaina awmah engtin nge i lo hmachhawn ṭhin? Buaina tawktute chu i lo hre thiam ve ṭhin em? A nih loh chuan, engtin nge chutiang ni lo chuan i tih theih ang?
Eng ang khawngaihna dik lo nge nangmahah khan awm nasa ber? Engtin nge chutiang thil dik lo chu i siamṭhat theih ang?
[ *Lettu* : Peka]

No comments:
Post a Comment