Thursday, December 15, 2022

ENGAH NGE HNATHAWHNA HMUNA HMANGAIHNA LANTIR CHU A PAWIMAWH

Nungchang Siam Dan

By Rick Warren

December 15, 2022


“Mi tin hna thawh ṭhat leh ṭhat loh dân a la lang fiah ang; Krista ni chuan a la tilang dâwn si a, meia a inlâr dâwn avângin. Mei chuan mi tin hnathawh chu a fiah ṭheuh vang.” [I Korinth 3: 13]

Pathian chuan i hnathawhna hmun chu hmangin Isua anna kawnga ṭhang lian turin a duh che. Mahse Krista anna miziain a ken tel ṭhenkhat mawhphurhna, nungchang leh hmangaihna te chu thil awlsam an ni lo. Chutiang thil zir tur chuan Isuan chutiang mite a hmachhawn ang chiah chuan i lo hmachhawn a ngai ang – chung chu a chang chuan thil harsa tak pawh a ni ang. 

Tichuan, i hnathawhnaah Isua ang turin engtin nge hma i lak zel ang?  

*Pakhatna, a chhan chu Pathianin engtik ni emawah chuan i hna chu a endik ve ang.* 

Bible chuan I Korinth 3: 13-ah chuan hetiang hian a sawi, “Mi tin hna thawh ṭhat leh ṭhat loh dân a la lang fiah ang; Krista ni chuan a la tilang dâwn si a, meia a inlâr dâwn avângin. Mei chuan mi tin hnathawh chu a fiah ṭheuh vang,” tiin. 

I hnathawhnaa i thiltih zawng zawngte chu tarlan a la ni ang – a chhan chu rorelna niah chuan Krista chuan a la endik ang. Chu mi ni chuan, mitin thiltih awmzia leh thiltihzat chu mei hmanga enfiah a la ni ang.  

I hna tam berte chu mi tam berte hmuh loh leh hriat lova tih theih an ni a – mahse Pathianin a hria. A en che a, i hnathawh dan chu i la hrilh ve ang, te takte anga i ngaih zawng zawngte nen lam chuan. I tidik vek lo mai thei. Mi zawng zawnga aia ṭha i nih kher pawh a ṭul lo. Krista tana ti i ni tih inhre chunga i thawh erawh chu a ngai tlat – chu chu thil nihna dik tak a ni bawk.  

*Pahnihna, i hnathawhnaah chuan Isua ang deuh deuh tura i thawh a ngai, a chhan chu Pathian chuan chatuan lawmman hmangaihnaa i tih apiangah chuan a pe dawn che.* 

Hebrai 6: 10 chuan hetiangin a sawi, “In thil tih ṭhin, tûnah pawh in la tih zêl ṭhin, a hming vânga hmangaihna in lantîr te leh, mi thianghlimte rawng in bâwlsak ṭhin te hi theihnghilh mai tûrin Pathian chu mi fel lo a ni lo ve” tiin. Chu chang chu thawhtan zing apiangin ngaihtuah ang che. Pathian chuan eng tiang taka hahin nge I thawh tih a hmuh hmaih dawn lo, eng tin nge theihtawp i chhuah a, a hmingin engtin nge hmangaihna i lantir tihte nen chuan. 

I hna kha Pathian mit hmuhah a pawimawh. I damchhan pakhat chu Krista anna kawnga ṭhan len zel a ni a. Tichuan I hna pakhat tur pawimawh tak chu engtin nge Pathianin mawhphurhna a pek che i hlen chhuah a, eng nungchang nge i din a, engtiangin mite i hmangaih tih chu a ni. Chu chu midangte a hnena i hruaina kawnga hmanraw pawimawh ber a ni zawk hial thei.  

Ngaihtuah zui atan. 

I hnaah thil ṭha eng emaw i tih changin, chu chu midangten an hriat i duh em? Engvangin nge? 

Pathian chuan i hnathawk lai, midangte i hmangaih dan chu a hmu reng che a, engtik niah emaw chuan engah tarlan a la ni vek dawn a ni tih hriatna chuan nangmahah engtin nge hna a thawh? 

I hnathawhpuite chuan mite engtin nge i biak a, i dawnsawn tih leh, hun harsa i hmachhawn lai chuan engtin nge an hmuh ang che? Nangmahah chuan eng nge hmu sela i duh ang? 


*I hnathawh hmasawnna chu ṭawngṭaina tawite hmanga ṭan theih a ni.* 

I hnathawhte chu chatuan daih tura i duh a nih chuan he ṭawngṭaina hmang hian bul ṭan ang che: “Lalpa, hnathawhnaa mi rinawm zawk ni turin thutiama ding mi nih ka duh a, hun tiama hnathawh zo, thusawi umpha, ka mawhphurhna tla apiang hlen chhuah mi nih ka duh. Nungchang ṭha zawk neia than len zel ka duh a, ka nuna harsatna nen lam hian awmze neia hman a, dawhtheih deuh deuh, rinna kawnga ṭhan zel, lawm deuh deuh a, Thlarau rah tarlangtu nih zel ka duh e. 

“Aw Pathian, ka hna hmang hian mite hmangaih tak tak dan min zirtir rawh. Hmangaihna ngah tak nih ka duh a. keimah kaltlanga mite hmangaih thei turin min pui la, mi ṭhenkhat hmangaih har takte nen lam chuan.” 

Isua Krista zui tura thutlukna i siam thei a nih chuan a hnenah hetiang hian i sawi thei ang, “Isu, ka nun hi keima tana hmangin ka tan ka lo nung ngar ngar a, i tan leh i thil tum reng ka lo ngaihtuah ngai lo. Thil sual ka lo ti tawh a, nangmah chauh chu rinna, simna, leh chhandamna chang tura Pathian ka rawn pan theihna i ni tih ka hria. Kraws-a i thihna leh thawhlehna chuan chu chu min hriattir thei a, chatuana i hnena ka awm theihna a ni bawk. Ka nunah hian lo kalin I hmnagihna chuan min chhungkhat ang che. Ka nunnain ka ring che a, ka damchhunga zui  che ka duh e. Isua hmingin ka dil a che. Amen”

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[*Lettu*: Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...